giovedì 22 dicembre 2011

NAPOLI – GENOA (21/12/11) 6 A 1!!!LL’AGGIU VISTA ACCUSSÍ

NAPOLI – GENOA (21/12/11) 6 A 1!!!
LL’AGGIU VISTA ACCUSSÍ
Doppo d’ ‘a partita d’ajeressera che pozzo dicere, guagliú?Niente! Ca va bbuono accussí e ghiesse sempe accussí, pure si – dicimmoncello aummo aummo – âmmo fatto ‘e valle ‘ncopp’â mmunnezza... e c’ è mancato ‘o curaggio ‘e ‘ntufarle cumpletamente ê crifune dannole, comm’era pussibbile, otto o nove purpette ‘mmece d’ ‘e sseje ca lle dettemo! Ma nun voglio esaggerà si no coccheduno dice ca so ‘ncuntentabbile e ttenco sempe ‘a dicere... Accuntentammoce d’ ‘o risultato e ppassammo ‘ncrazzia ‘e dDio ‘e ffeste ca stanno venenno speranno ca ll’anno prusciàino (prossimo) pure jucanno ògne ttre gghiuorne ‘o Napule rispunnesse sempe ô mmassimo e ce desse ‘e suddisfazzione ca ‘o pubbrico luvardo s’aspetta e ca s’ammereta!
Venimmo ê ppaggelle:
DE SANCTIS 6 Miezu voto mancante p’esserse fatto sfují dê bbraccia ‘nu pallone ca si nun era pe Cannavaro puteva darce ‘o siconno dispiacere d’ ‘a serata. Putette fù assaje poco ‘ncopp’â redda de Jorquera. P’ ‘o riesto urdinaria amministrazzione.
CAMPAGNARO 6 Partita senza anzietà: Caracciolo lle sfujette ‘nvelocità sulo ‘nu paro ‘e vote, ma senza cunzeguenze.
CANNAVARO 6- ‘Ngenerale nun sufferette cchiú ‘e tanto a Caracciolo, custrignennolo (spisso ‘e forza) a ggirà a llargo e alluntanannone ‘a minaccia senza prubleme.’Nchiattuto e appesantuto ggià primma d’ ‘e ffeste nun riuscette a cchiudere ‘ncuoll’a Jorquera cunzentennole ‘e darce ‘o dispiacere.
(dô 65° FERNANDEZ sv Se limitaje a fà ggirà ‘o pallone quanno doppo d’ ‘o seje a uno ‘a partita praticamente fernette e s’aspettaje sulo ca Valeri facesse ferní chillu strazzio!)
ARONICA 6,5 Dê pparte soje ‘o Napule nun sufferette maje.Dinto a ‘na serata bastantamente facile arremmediaje n’ inutile cartellino jalizzo!
MAGGIO 6,5 Nun me piacette troppo, pecché pure currenno assaje aizaje parecchia póvera. Però riuscette a sserví ‘nu granna ajuda a Ccavani ca putette sbluccà ‘a partita.
INLER 7 ‘O turco napulitano riuscette finalmente a ddà ‘a justa cupertura â difesa e spisso spisso accumpagnaje l'azzione prupizzianno ‘e repartite (ripartenze) d’ ‘e cuane.
GARGANO 7,5 – Atalossa (prestazione) straurdinaria pe ll'urucuajano. Tantu, tanto muvimento cuntinuo ca mette ‘ndifficultà ‘o centrocampo cummitato (ospite). Assaje bbella ‘a redda ‘a fora ca valette ‘o cinche a uno!
(dô 60° DZEMAILI 6,5 Trasette súbbeto ‘mpartita e cchiú ‘e ‘na vota cercaje ‘a surtita (spunto) perzunale riuscenno a semmenà ‘e crifune dint’ô stritto).
ZUNIGA 7,5 - Mazzarri le cuncedette fiducia e ‘o culumbiano doppo d’avé pe paricchiu tiempo aizato póvera, â fine facette n’ atalossa abbastanza suddisfacente, cunnita cu ‘na redda majeteca ca fissaje ‘o punteggio ‘ncopp’ô seje a uno e ‘nchiudette ‘e juoche.
HAMSIK 8 ‘O slovacco ajeressera ‘o vvulette fà e ffacette n’atalossa overamente bbella: mettette ‘a fima sott’â redda d’ ‘o doje a zzero, ma fuje ‘ncredibbile furnenno ajude (assist) e arapenno a mmestiere p’ ‘e laterale comme quanno pennellaje ‘o passaggio pe Gargano, piscato sulo sulo a bbalatuso (rimorchio) ‘e ll’attaccante.
PANDEV 7 Prutagunista apprimma cu ll'ajuda pe Hamsik e ppo cu ‘na rredda overo bbella doppo n'azziona perzunale. Se fósse mmeretato pure ‘nu ricore a ffavore quanno avette ‘nu struncone ‘a Mesto, ma Valeri facette vedé ca nun êva visto e stanno a Natale perdunaje ô crifone.
(dô 78° LUCARELLI sv Nun avette nisciunu pallone ‘a jucà)
CAVANI 7 – Miezu voto mancante p’avé falluta cchiú ‘e ‘na vota ‘a tripletta.Sbluccaje ‘a partita cu ‘na granne diacunale, e ppo s’anventaje ‘na bbella cucchiarella p’ ‘o tre a zzero ‘ncapo ‘e vinticinche minute.ô siconno tempo avette ‘nu paro ‘e uccasione retissante, ma nun fuje priciso; quanno po riuscette a sfruttà n’ata uccasione signanno, embé tanno ‘nu guardalinia signalaje n’órzo ‘e cóse(fuorigioco) ca nun ce steva.
All. MAZZARRI 6,5 – ‘O Genoa arrivaje a Nnapule cu vintuno punte ‘ncrassifica,ma cu ‘na furmazziona sciaccata mmerecata e cunciliante (arrendevole) e ‘o Napule facette ‘o vallo ‘ncopp’â mmunnezza facenno unu muorzo d’ ‘e crifune, senza nisciunu prublema, ma le mancaje ‘o core ‘e distruggerle e se fermaje sulo a sseje purpette addó ce nn’ êsse pututo dà otto o nove !
ll’arbitro VALERI 4 Carta canusciuta pure ajeressera dimustraje ca è n’arbitro ca nun serve e ca ce ll’ave cu ‘o Napule e – si po’ – ‘o tratta ‘na chiaveca: ajere nun le dètte ‘nu ricore e ll’annullaje ‘na redda bbona!
E fermammoce cca. Ve faccio tanti auguri p’ ‘e ffeste prusciàine e v’arricordo chello ca nun à dda mancà ‘ncopp’ ê ttavule:
Chello ca se mangia a NnAPULE dint’ê ffeste:
VIGGILIA ‘E NATALE
A mmiezjuorno:
Pizza ‘e scarole
Furmagge misti assurtite
‘O Cenone
trasetura Purpo â ‘nzalata
oppure ‘nzalata ‘e mare
oppure crustine cu crema ‘e tunno,
Vermicielle a vvongole,
Frittura ‘e jammare e ccalamare,
oppure Spigola a ll’acqua cotta
oppure Ciefere ô tiesto (al forno),
Mussillo ‘e baccalà fritto oppure pezzelle ‘e baccalà
‘nzalata ‘e rinforzo,
Capitone a ll’acro oppure fritto
Vruccole ‘e fronne a ll’acro
Frutta fresca
Frutta secca (scioccele)
Dorge ‘e Natale (struffole – pasta riale – mustacciuole – roccocò – raffiuole semplici e a cassata – sapienze – divino amore)
NATALE
Trasetura Fellate assurtite,
Menestella ‘e Natale
Tagliatelle â maestosa
oppure pasta ‘mbuttunata
oppure sartú ‘e riso,
Brasciole ‘mbuttunate ‘e locena d’annecchia ô zuco ‘e pummarole,
oppure purpette ammiscate ‘e manzo e ppurciello fritte e passate ô zuco ‘e pummarole,
Patane arrustute,
‘nzalata ‘e rinforzo,

Capitone a ll’acro oppure fritto
Vruccole ‘e fronne a ll’acro
Frutta fresca
Frutta secca (scioccele)
Dorge ‘e Natale (struffole – pasta riale – mustacciuole – roccocò – raffiuole semplici e a cassata – sapienze – divino amore)


SANTO STEFANO
Trasetura Fellata assurtita,
Tagliuline ricotta, funge
e prusutto
Crapetto â cacciatora
oppureCorachiatta acito e rosamarina
Patane fritte
‘nzalata ‘e rinforzo,
Capitone a ll’acro oppure fritto
Frutta fresca
Frutta secca (scioccele) Dorge ‘e Natale (struffole – pasta riale – mustacciuole – roccocò – raffiuole semplici e a cassata – sapienze – divino amore)
E mmo overamente ve saluto e ce sentimmo si vo’ dDio doppo d’ ‘a Pifania.
Staveti bbe’
R.Bracale Brak

Nessun commento: