SPALLA D’ANNECCHIA GURMANTE

SPALLA D’ANNECCHIA GURMANTE

chello ca serve pe 6 perzone
‘nu chilò e duiciento ‘e spalla d’annecchia tagliata a piezze ‘e cm. cinche pe tre e pe ddoje,
ddoje cepolle ndurate ‘e Muntoro ammunnate e ntretate,
200 gramme ‘e prusutto cruro tagliato a vvarriglie‘e cm. cinche pe tre e pe ddoje,
80 gramme ‘e farina,
2 bicchiere ‘e bbirra scura,
‘na tazzulella ‘e acito ‘e vino russo,
‘nu cucchiaro ‘e zucchero,
tre cucchiare ‘e ‘nzogna,
ddoje fronne ‘e lauro frisco,
‘nu tuppeto ‘e prutusino lavato, asciuttato e ntretato finu fino,
sale fino e ppepe niro mmacenato a ffrisco q.n.s.

comme se fa:

Mettere a ffuoco miccio ‘na tiella a sponne aute e farve sciogliere ‘a ‘nzogna;doppo d’avé lavate e asciuttate ‘e piezze ‘e carne, salarla, peparla e metterla a suassà dint’ â ‘nzogna vullente. Quanno ànnu pigliato culore aizarle cu ‘na spumadera e tenerle ‘ncaudo.Mettere a ‘ndurà dint’â tiella ‘a farina cu miezu bicchiere d’acqua cauda e agnadirvi ‘a mmità d’ ‘a bbirra e ttutto ll’acito. Doppo cinche minute agnadí ‘o ttrigliato ‘e cepolle, ‘e ddoje fronne ‘e lauro frisco e ‘e varriglie ‘e prusutto e ncapo a ddiece minute agnadí ‘e piezze ‘e carne,derrammarve ‘o cucchiaro ‘e zuccaro e ricà cu ‘o riesto d’ ‘a bbirra.Cummiglià ‘a tiella e lassà cocere, sempe a ffuoco miccio, pe ddoje ore e mmeza.â fine, stutato ‘o ffuoco derrammà ‘ncopp’â carne ‘o tuppeto ‘e prutusino lavato, asciuttato e ntretato finu fino,
Tuiglià dellicatamente e serví caudo ‘e fuculare. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve e cunzulàteve ‘o vernecale!
Raffaele Bracale