lunedì 3 dicembre 2012

NAPOLI - PESCARA 02/12/12 5 A 1’A VEDETTE ACCUSSÍ

NAPOLI - PESCARA 02/12/12 5 A 1 ’A VEDETTE ACCUSSÍ Missione cumpiuta, guagliú! Ajere, a ll’ora scòmmeta d’ ‘a tiella, s’êva vencere pe tené ‘o passo d’ ‘a rubbentus(sa) ca sàpato a ssera, ajutata ‘a chillu nnacchennello ‘e Rocchi, êva scummato a ssanco ‘o Toro... e ppe cunfermarce ô siconno posto ‘ncrassifica, e mantenercelo ‘stu beneditto posto ca mo comme a mmo è ‘o mmassimo ca se po’ uttené visto ca a rubbentus(sa) cuntinua a essere accumpagnata p’ ‘a mano a vvencere ‘e fullé e soprattutto visto ca De Chiacchiaroniis cuntinua a ccuntà dint’ ô Palazzo quanto ô doje ‘e coppe a bbriscula, quanno ‘o triunfo è a mmazze!’Nzomma ajere s’êva vencere e se vincette anze se stravincette espallanno (dilagando) e facenno ‘e valle ‘ncopp’â mmunnezza contr’ â scuatra urdema ‘ncrassifica ca sinamparco (comunque) ô primmo aione ‘na rredda ce ‘a facette doppo ca nn’aveva ‘ncassato ddoje e ce tenette ‘ncopp’â corda pe ‘na bbona mez’ora tanto ca me truvaje a ppenzà: Êsseme ‘a fà ca mo chiste quatte profuche d’ ‘o Pescara pigliano curaggio e fernesce comme a ccontro ô Milàn(no)? Pe furtuna ca me sbagliaje e turnate ‘ncampo p’ ‘o siconno aione ‘o Napule facette ‘o sbafante smargiasso e cu Inler(ro) ca bissaje chella d’ ‘o primmo aione e ddoje vote cu cCavani risulvette ‘a pratica nchiudenno ‘o fullé ‘ncopp’ô cinche a uno e ssaglienno ‘ncrassifica a trentatrè ppunte ca me pare ‘na bbona premessa pe gghí a sfità dummeneca a ssera ca vène ll’Inter(re) a Milano! Passammo ê ppaggelle: DE SANCTIS 5,5 Êsse pututo tentà ‘e fà quaccosa ‘ncopp’â capata ‘e Bjarnason(no)(pe parta soja marcato ‘na chiaveca ‘a Mesto ê spalle), ma nun ‘o facette restanno fremmo comme a ‘nu paracarro. N’atu paro ‘e vote se ‘ncasinajeno isso e Cannavaro e stette pe succedere ‘o ‘nguacchio. P’ ‘o riesto d’ ‘o fullé nun tenette niente ‘a fà. GAMBERINI 6,5 – L’ècchese difenzore centrale d’ ‘a Fiorentina, marcanno a mmestiere a vVukusic rijalaje ‘na granna atalossa ê tifuse prisenti ‘ncopp’ô San Paolo e a cchille d’ ‘a tribbuna divano. (dô 68° DZEMAILI 6 Atalossa urdinata durante ‘na fase d’ ‘o fullé assulutamente tranquilla p’ ‘e cuane.). CANNAVARO 5.5 ‘A chiena e ttanti vacante, comme a cchelli ddoje sciucchezze fatte ‘ncasinannose cu De Sanctis Spisso mancaje d’attenziona sciupanno quacche bbona clèsema(chiusura) fatta cca e lla.Ascette pe ‘nu prubblema musculare. (da ll’ 80° EL KADDOURI 6 Mazzarri facette trasí a isso ‘mmece ca a Fernandez(zo), forze pe valutà ‘o guaglione ca se facette subbeto nutà trasenno ‘nfullé. Venette fermato ô mumento d’ ‘o tiro doppo ‘na bbella jucata e ati ddoje vote, pe fermarlo, ll’êtteno ‘a vattere!) BRITOS 6 Bbona ll’atalossa ‘e ll’ècchese difenzore centrale d’ ‘o Bologna ca mettette ‘a musarola mo a vVukusic e mmo a wWeiss(so) e ô finale pure a Abbruscato! MESTO 5,5 Meglio ‘nfase difenziva, ca quanno se trattaje d’ appressurà. Ô finale, ascenno Cannavaro e Gamberini, se ritruvaje quase a ffà ‘o centrale, ma nun è ppe cchesto ca fuje pigliato! Sinamparco accuntentammòce e ausammolo pe cchellu (ppoco!) ca sape e ppo’ ffà! BEHRAMI 6.5 ‘Nu cane ‘e presa a centrocampo, azzannaje ê feliette a cchiunche se truvaje passanno e ‘o ffacette cu ttanto muvimento nfi’ a ll'urdemu minuto ‘e juoco. ‘Nfase ‘e sustàtera (impostazione) facette ‘na bbona atalossa spisso cullabburanno cu Inler(ro). INLER 7,5 ‘O turco-napulitano à finalmente fatte capace a ttutte quanto dimustranno d’essere ‘nu granne jucatore. Ajere a pparte ca arapette ‘o fullé cu ‘na rredda spettaculare e cuncedette ‘o bbisso cu ‘a rredda d’ ‘o cinche a uno, ajere sagliuto ‘ntusiello e se mettette a cummannà ll’urchestra a mmestiere! ZUNIGA 5,5 Riuscette, specie a ll’arranqua, a sfunnà cchiú ‘e ‘na vota ‘ncopp’â mancina, ma ‘nfase difenziva, ô mumento cchiú difficultuso d’ ‘o primmo aione cuncedette troppo. HAMSIK 7 Pe ffurtuna decidette ‘e farese súbbeto ‘e diece minute suoje.Ma nun signaje solo ‘na rredda ‘mpurtante facenno quase ‘nu bballetto. Ll’ azzione cchiú periculose passajeno spisso p’ ‘o pere suojo, specialmente a ll’arranqua. INSIGNE 7+ Accumminciaje assaje forte e ppe fermarlo ll’êtteno ‘a mettere ‘o ssale ‘ncopp’â córa; peccato ca fuje ‘mpriciso dinto a quacche cunchiusione. ‘Ncumpenso fuje assaje bbella ll’ajuda quanno lanzaje a cCavani ca se prucuraje ‘o ricore ca nchiudette ‘a quistione. (dô 75° VARGAS 6 Trasette súbbeto ‘nfullé cu bboni ghiucate favurito dô mumento felice d’ ‘e cuane ‘nzuperiorità nummerica). Cavani 7,5 Doppo d’ ‘e rredde d’Inler(ro) e de Marekiaro addivintaje ‘nu poco troppo cazzu-mio (egoista). Ce pruvaje cu ògne pallone, tentanno pure cunchiusioni vulante ‘a for’â camma. Mettette ‘a firma sott’ ô 3-1 cu ‘nu bellu ricore ca fuje bravo a prucurarse e a mmettere ‘mporta; cuncedette ‘o bbisso sotto mesura recuglienno ‘nu bbellu bassurero ‘e Marekiaro e dinto a cchiú n’accasione jette vicino â terza rredda cu ttutto ca nun parette assaje ‘mpalla. MAZZARRI 6.5 ‘O Pescara cunfermaje d’essere poca cosa, ma ‘o Napule trasette ‘ncampo diciso a ffà ‘a parte d’ ‘o guappo, pure si sufferette ‘nu poco troppo doppo d’ ‘o 2-1 ‘e ll’abbruzzese.Cu curaggio facette jucà a Inler(ro) diffidato e fuje furtunato pecché ‘o turco-napulitano nun sulo se scansaje ‘o periculo ‘e ‘nu cartellino jalizzo, ma signaje pure ddoje rredde ‘mpurtante! ‘Na vota tanto ‘ncarraje ‘e cagne preservanno a Insigne (visto ca ‘e chisti tiempe in attacco d’ ‘o guaglione ‘e Fratta nun se ne po’ ffà a mmeno) e cuncedenno quacche minuto pulitelico ( prezioso) a vVargas e a El Kaddouri. arbitro PERUZZO 5 Troppo guaglione pe pigliarlo ‘ncusiderazzione! E cu cchesto ve saluto e ssi dDi’ vo’ ce sentimmo viernarí doppo d’ ‘o fullé d’ E.L. Staveti bbe’! r.Bracale Brak

Nessun commento: