‘NZALATA CRAPICCIOSA

‘NZALATA CRAPICCIOSA Chello ca ce vo’ pe sseje perzone ‘nu pere ‘e ‘ncappucciata, ‘na cepolla janca ammunnata e ntretata fina fina, ‘na grossa fella ‘e 300 gramme ‘e murtadella tagliata a ffarinule ‘e ‘nu centimetro ‘e squina, ‘na grossa fella ‘e 300 gramme ‘e pruvulone percante d’ ‘o monaco tagliata a ffarinule ‘e ‘nu centimetro ‘e squina, ‘nu tuppeto ‘e vasenicola lavato, asciuttato e ntretato a mmano senza curtiello, ‘nu bicchiere d’uoglio ‘auliva dunciglio, ‘o zuco passato a culaturo ‘e ‘nu limone ‘e Surriento, sale fino e ppepe janco mmacenato a ffrisco q.c.n.v. comme se fa Mettere dinto a ‘na ciotola ‘e ffarinule ‘e murtadella, cchelle ‘e pruvulone, ‘a cepolla e ‘a vasenicola ntretate; agnadí ll’uoglio, ‘o zuco ‘e limone passato a cculaturo, sale fino e ppepe janco mmacenato a ffrisco e ammiscà dellicatamente; cummiglià e lassà arrepusà pe quase n’ora;. fraditanto ammunnà ‘o pere ‘e ‘ncappucciato,farlo fronne fronne e tagliarle tutte ‘nzieme a giugliana; lavarle, asciuttarle metterle dinto a ‘na zuppiera, ricarla cu ‘o cumposto cunnito e ammiscà a mmestiere.Primma ‘e servirla comme trasetura fà passà ‘sta‘nzalata crapicciosa allimmeno pe n’ora dint’â jacciaja. Magna Napule, bbona salute! Brak .