BOLOGNA – NAPOLI (25.05.19) 3 A 2 ‘A VEDETTE ACCUSSÍ

BOLOGNA – NAPOLI (25.05.19) 3 A 2

‘A VEDETTE ACCUSSÍ

E accussí guagliú ajere fenette pure  st’ata fetenzia ‘e  campiunato e nnujaute ‘ntribbuna divano c’eramo creruto ca    ‘o Ciuccio êsse diciso ‘e nchiudere ‘mbellezza e ‘mmece fenette cu n’azzimma(sconfitta), ca  fove  ‘na delusione cucente,chella stessa ‘e quacche semmana fa quanno ce rennettemo cunto d’avé pigliato ‘nu brutto zzarro quanno ‘o campiunato  era accumminciato e  cce ll’êvemo creduto tutte quante ca fósse stata ‘a vota bbona ‘e vencerlo n’atu cacchio ‘e scutetto,’mmece pure ‘sta vota ll’âmmu pigliato ‘int’ê rine e simmo arrivate sulo sicunne, cosa ca forze fa cuntento a Dela,ca penza ê pesielle d’’a Ciampionsa, ma nun certo a nnuje ca  ‘o ssapimmo bbuono ca ‘o primmo è pprimmo e ll’ate so’ tutte strunze! E vv’aggi’’a dicere ‘a verità nce simmo sfastediate ‘e passà pe strunze! Però mo parlammo d’ajeressera e ddicimmo ca ‘o Ciuccio ô Dall’Ara no, nun se facette annore ‘nu poco pe ll’uocchie sicche ‘e troppi cestarielle ca nun c’’e vvonno levà ‘a cuollo e assaje pe bbia d’’o Jancone [5 e ppo ve dico] ca se ‘nfessette  facenno jucà a Vverdi i a Lorenzigno ca nun ne ‘ncarrajeno meza e cquanno, cu ‘e cazune ‘mmano se dicidette a llevarle fove troppo tarde e ‘a frittata era stata servuta ‘ntavula e stévemo abbuscanno pe ddoje a zzero! E cche saciccio!  Ma mo ve songo cchiú cchiaro e vve conto: Bologna e Napoli nun tenevano niente  da addimmannà da ll’urdema jurnata ‘a fora ‘e nchiudere ‘a facenna cu ‘na bbona atalossa  (prestazione). Jette a ffení ch’ affurzaje (vinse) ‘a scuatra ‘e casa i ‘o Ciuccio turnaje â casa cu ‘na vranca ‘e mosche ‘mmano.’O sibbacco (match)p’’a primma mez’ora fove sciacquo e ssenza zuco cu zzureje  (ritmi) vasce e  poche accasione pe ll’una e ll’ata scuatra...,  po ‘mpruvvisamente ‘e mmurtatelle d’’o Zincaro s’affacciajeno   periculosamente dâ parte d’’o Creco e sotto â mez’ora  Lyanco ‘e capa ‘ncopp’a  ‘nu tiro ‘e squina (corner) ‘e Pulgar(re) artattiaje  (scheggiò) l’afachia (traversa). Po êttemo aspettà ‘o 43’ quanno ‘o Napule sbannaje e da mancina Palacio, zucannose ô Tignuto mettette ‘mmiezo ‘na palla  pe chillu demmonio ‘e  Santandèr(ro) ca ‘e capa, senza ca Luperto allimmeno ‘o ‘mpicciasse ce ‘o mettette a ppitoffio ô Creco i a nnujeaute, ca maje ce ‘o ffossemo aspettato, purtanno ‘a scuatra d’’o zincaro ‘ncopp’ a ll’uno a zzero... Vuje capite? Piezzo e ppejo poco doppo quanno, manco ‘o tiempo ‘e mettere ‘o pallone a ccentro ô 45’ ‘e mmurtadelle se mettetteno ‘ncopp’ô doje a zzero i ‘o ffacetteno cu n’ècchese: Dzemaili ca se pigliaje ‘nu pallone perzo malamente ‘mmiez’ô campo da Lorenzigno e sse purtaje poco fora dâ muntaca (area di rigore) nosta i ‘a lla, senza ca nè Luperto, nè quacche matustejo (mediano) ascesse a nchiuderlo, piazzaje ‘nu càtara (diagonale) ‘e dritto senza ca ‘o Creco, menatese tarde ‘o fermasse!

Quanno se turnaje ‘ncampo ‘o Napule ce dètte ‘a ‘mpressione ch’êsse vuluto fà coccosa ‘e cchiú pe nun abbuscà e ccumminfatte se facette vedé cchiú annante i  ‘a primma accasione ll’avette Anema Longa ca però tiraje ‘e poco a llato..., ma finalmente arrivate  a ll’11’ Ghoulam(me) riuscette a dd’accurtà ll’armasafeje (distanze) e ppartuto quase  ‘nnattasallullo i(n fuorigioco) se presentaje sulo ‘nnante a   Skorupski i ‘o superaje piazzanno ‘a palla addó s’à dda mettere: sotto ll’afachia(traversa) cu ‘nu mancino priciso. Allora finalmente ‘o Jancone se decidette a llevà a Vverdi i a ffà trasì Peppe ‘a ‘nguenta i ‘e cuane  súbbeto pigliajeno ‘o cuntrollo d’’a mubbara (partita) i ‘o russimmo (pareggio) fove angappato  ô 79 cu Cciruzzo [trasuto ô 63’ ô posto ‘e Lorenzigno ]; ‘o scugnizzo servuto a zzuco ‘e caramella dô Mmerecato mettette ‘a palla dinto a ffilo ‘e palo.Ddoje a ddoje! Però nun fenette lla i ‘o Ciuccio avette ‘accasione addirittura d’affurzà (vincere) cu Zielinski ca però cugliette ‘o vintisejesimu palo ‘e ‘sta caracuddamma (stagione) jellata e cquanno ‘o sibbacco (match) parette proprio ca se fósse cunchiuso cu ‘nu russimmo (pareggio),’o vvi’ lloco ll’acqua!..., succedette ‘o llutto e cchillu demmonio ‘e Santandèr(re) cu ‘na bbotta ‘e mazzo,cadenno ‘nterra ‘nfra Luperto i ‘o Masto fove centrato da ‘nu tiro spuorco ‘e Svanberg(he)  cuglienno  ‘e capa ‘a palla e mmannannola lla addó ‘o Crec, surpreso, nun arrivaje. E ffenette ca ‘o Napule,azzimmato (sconfitto)salutaje ‘o campiunato senza arrivà a ll’uttanta punte. Che delusiona!    ‘Nzomma jette accussí e ppacienza: se vede ca accussí steva scritto i accussí êva ‘a jí. Mo ‘o Jancone po’ ddicere chello ca vo’ isso, ca chesta azzimma (sconfitta) nun abbruscia e cca ggià êvemo arrivate addó vuleva arrivà: ô siconno posto. I’ ‘a penzo ‘e n’ata manera e ddico ca s’è trattata ‘e ‘na caracuddamma (stagione) sciupata i avimmo fatto ‘nu buco dint’a ll’acqua!  E mmo passammo ê ppaggelle:

KARNEZIS [‘O Creco] 5: Peccato, ajere nun me piacette: i’ pozzo capí ‘a primma addaffa (rete) pigliata da Santandèr(re), troppo sulo, libbero e ffranco, ma ‘ncopp’â siconna e soprattutto â terza aveva e pputeva fà coccosa ‘e cchiú, e nnun ‘o ffacette!   

MALCUIT[‘O Tignuto] 4,5: Brutta mubbara (partita):jucaje troppo auto senza frutto, ma custrignenno spisso ‘o Masto a llassà ‘a pusizziona p’appilà ‘o pertuso; pejo se cumpurtaje difennenno  cu Ppalacio ca s’’o facette spisso cumme ‘nnaccasione d’’a primma addaffa (rete).

ALBIOL[‘O Masto] 5,5:Me dispiace ma ll’aggi’’a mettere miezu zifo (voto) mancante pe bbia ca custretto spisso a dd’ascí p’’e ssurtite  uffenzive d’’o Tignuto êtte ‘a lassà troppu spazzio ê spalle soje  lassanno ‘a pusizziona.

LUPERTO 4:Nun po’ gghiucà ô posto d’’o Ggialante, nunn’è arta soja e sse vedette ajere ca  Santander(re) pe tutte ‘e nuvanta minute, ne facette sanco ‘e puorco e cce futtette ddoje!

GHOULAM 6,5: Appressuraje (spinse) assaje ‘ncopp’â ferza e ll’addaffa (rete) soja permettette ô  Ciuccio ‘e arapí n’ata vota ‘o sibbacco (match).

FABIANRUIZ [Anema Longa] 6: Uno d’’e poche ca se dètte da fà; fove isso ca servette a Ghoulam(me) ‘a palla d’’o doje a uno.

ZIELINSKI 6: Custretto a ffà cchiú d’’o suojo pecché mancava ‘o ‘Ngrifato, sulo ‘o palo nun lle cunzentette ‘e signà n’addaffa (rete) cauzante si fósse arrivata!  

YOUNES [‘O Mmerecato] 5,5: Miezu zifo mancate pecché durante ô primmo ajone (tempo) facette overamente poco e ssulo a ll’arrancua se facette apprezzà servenno pure ‘na gguioja ‘e palla pe Cciruzzo, chella d’’o doje a ddoje. [Da ll’84’ GAETANO: sv Avette pocu tiempo pe ffarese apprezzà!]

VERDI 4: Chisto è mmeglio si cagna aria: pure ajere nun facette niente! [Dô 64’ CALLEJON[Peppe ‘a ‘nguenta] 6,5: Ce vuletteno isso e Cciruzzo pe ffà cagnà passo ô Ciuccio.]

INSIGNE[Lorenzigno] 5: ‘Nu zifo (voto) mancante giacché aizaje suulo porvera: tiraje ddoje vote a ccapa ‘e saciccio e pp’’o riesto nun cunchiudette ‘nu saciccio, perdette ‘na palla ‘mpurtante ‘mmiez’ô e campo e Dzemaili n’apprufittaje futtennoce cu ‘o doje a zzero [Dô 63’ MERTENS [Ciruzzo] 6,5: Fove ll’acqua ‘ncopp’ô ffuoco, trasette e ccu Ppeppe ‘a ‘nguenta mette ‘ncundizziona ô Ciuccio ‘e crederce signanno pure ‘o doje a ddoje.]

MILIK[Sant’Arcadio ] 6: Facette ‘o ppussibbile jucanno durante ô primmo ajone (tempo) p’’e cumpagne e a ll’arrancua (ripresa) cercanno ‘a porta ‘e cchiú, ma nun riuscette a essere periculuso.Peccato.

all. ANCELOTTI[‘O Jancone] 5: V’aggiu ditto e ve cunfermo ca se ‘nfessette  facenno jucà a Vverdi i a Lorenzigno ca nun ne ‘ncarrajeno meza e cquanno, cu ‘e cazune ‘mmano se dicidette a llevarle fove troppo tarde e ‘a frittata era stata servuta ‘ntavula e stévemo abbuscanno pe ddoje a zzero.’Nzomma ‘a furmazziona ca mettette ‘ncampo nun fove a ll’ardezza d’a facenna dimustranno ca quanno se perde ‘o primmo respunzabbile è proprio ‘o mutarribbo (allenatore).

Arb. DI PAOLO 5, 5 Facette quase tutto ‘o duvere suĵo, cumpreso chillo ‘e chammà ‘a VAR(ra) ‘nnaccasione ‘e ll’addaffa (rete) ‘e Ghoulam(me).

E bbasta accussí. Fermammoce cca e si ‘o Cielo ‘o vvo’ mo ce sentimmo p’’e primme asciute d’’o Napule d’austo ca vene. Staveti bbe’. Raffaele Bracale Brak