NAPOLI – INTER (19.05.19) 4 A 1
‘A VEDETTE ACCUSSÍ
Sto’ schifato guagliú,
ma no pe ccumme se cumpurtajeno ‘e guagliune cuane (azzurri ) ca ajeressera ô
san Paolo asfaldajeno a dduvere chilli quatte profuche d’‘e
bisciunare ‘e chella faccia ‘e cacchio ‘e Spalletti, ma proprio p’’o natiggia
(risultato) ca fove bbusciardo pe bbia ca se fósse pututo arfuzzà (vincere)
mantenenno ‘a porta acrata (inviolata) e ffósse succieso si chillu scacchetto
‘e ll’ummeto ‘e Doveri [3 e ppo ve dico] nun avesse assignato ê bbisciunare a
ll’81’, ‘ncopp’ô quatto a zzero, ‘nu ricore pe cchillu figlio ‘e coperativa
d’Icardi ca se menaje ‘nterra ‘int’â muntaca (area di rigore) nosta senza ca
‘mprattica nisciuno ll’êsse fatto niente e ttutto chesto me spustaje ‘a
nervatura vedenno cumme nsi’ ô mustalà (fine) ‘e ‘stu schifo ‘e campiunato ‘o
palazzo nun ‘a fenesce ‘e romperce ‘o saciccio trattannoce a ppisce ‘nfaccia
cumme stabbilito da ll’accummenzaglia (principio) e ssi nun ce ponno spezzà ‘e
passe... ‘nu sfreggio ce ll’ànn’’a fà datose ca ‘o Ciuccio, accummincianno dô
presirente, ‘int’ô palazzo conta cumme a doje ‘e coppe a bbriscula quanno
‘o triunfo è a mmazze. Però ajere ‘o Napule s’êva ‘a vennecà [i ‘o ffacette cu
‘nteresse!...] levannosee pacchere ‘a faccia pigliate a san Ziro a ddicembre
d’’o duimila diciotto quanno ‘e
bbisciunare, cu n’atu paro ‘e fetenzie, mo nun me ricordo ‘e chi, foveno
accumpagnate a dd’ arfuzzà (vincere) p’uno a zzero. Pirciò capíteme pecché sto’
schifato e ddico votta a fení e ppassammo ê ppaggelle:
KARNEZIS[‘O Creco]
6,5 Pur’ isso participaje â festa cu ddoje
bboni pparate, ‘na vota ‘ncopp’a ‘na
cuchiusione ‘e Lautaro Martínez(ze) e n’ata vota ‘ncopp’ a
una ‘e D’Ambrosio. Peccato ca se facette cartià dâ
nfenta d’Icardi e nun riuscette a ffermà ‘o ricore: s’’o ffósse mmeretato!
tMALCUIT[‘O Tignuto]
7 Nunn’arresecaje niente cu Perisic(cio) e pp’’o riesto, cumme ô ssolito
tanta corza,ma ajere nce mettette pure cchiú pricisione; bbello chillu missiddo
(assist) ô 71’p’’o tre a zzero d’ Anema longa.
ALBIOL[‘O Masto ] 6 Jette bbuono ô primmo [primo tempo] po êtte ‘a
faticà ‘e cchiú a ll’ arrancua
(ripresa)
e sse vedette. Pe Ddoveri fove isso ca guardanno stuorto a Icardi ‘o facette cadé
a ll’81’! Cose ‘e pazze!
KOULIBALY[‘O Ggialante]
7,5 Fove ‘mpratteca matàlo (perfetto) e ccu ttutto ca, senza ‘nu mutivo, era
stato nutizziato (ammonito) quase súbbeto,
fistiggiaje bbuono ‘o mmavvajo (premio) avuto dâ Leca cumme meglio
madaffio (difensore) d’’a Serie A, arrivanno a ttutt’’e pizze, fremmanno a cchi
capitasse e llevanno dâ porta ‘na palla quase trasuta. Naturale a ascenno se
chiammasse ll’applavuse d’’o san Paolo e d’’a tribbuna-divano. [da ll’84’
LUPERTO 6 ‘e stima - Nun curerette
pericule].
GHOULAM 6,5 Me parette ‘ncopp’â bbona strata pe tturnà a
essere isso: se fósse pututo sparagnà quacche nnarro ‘e cabbo (colpo di tacco),
ma p’’o riesto ce piacette.
CALLEJÓN 7[Peppe ‘a
‘nguenta] Faticaje bbuono e assaje a
ll’armidanno (centrocampo) ‘ntennennosela a mmaraviglia cu ‘o Tignuto e ‘a meglia cosa ‘a facette ô 61’ quanno
mettette ‘mmiezo ‘na palla a zzuco ‘e caramella p’’a capa ‘e Ciruzzo ca ‘a
mettete a ffrutto! Peccato ca doppo, quase ‘nchiusura, sfresaje (sfiorò)
sulamente ‘nu stuco (gol)!
ALLAN 7[‘O ‘Ncrifato] ‘O
solitu lione ‘e ll’armidanno (centrocampo) aggennammanno (conquistando) ‘na cifra ‘e pallune e tenenno
luntano dâ muntaca (area di rigore) nosta ‘e bbisciunare ‘e Spalletti.
ZIELINSKI 7,5 – Forze ‘o
meglio d’’e suoje: nun sulo sbluccaje ‘a facenna cu ‘na precisa cagliosa ‘e
dritta ca Handanovic(cio) vedette sulo ‘e passà e ttrasí, ma cu ttutto ca
nunn’è mudirro (regista) ce facette spassà
cu bbelli mmimmadde (verticalizzazioni).
FABIAN RUIZ[Anema Longa]
7,5 Sí partette cu ll’ allaramello
(freno) tirato, ma a ll’arracua (ripresa)
jucanno cu cchiú jatimma (attenzione)
assummaje addiritturatruvanno ô71’ e 78’
‘na pareglia (doppietta).
MERTENS[Ciruzzo] 7 Cumme
ô Ggialante fove ‘mpratteca matàlo (perfetto) mantenenno ll’allasaffeje (distanze) juste ‘nfra
armidanno (centrocampo) e ll’uggiummo (attacco), asasa (soprattutto) facenno male ‘nfra ê llinie e signanno ô 61’ n’addaffa (rete) cu ccazzimma ‘e
scugnizzo accumparenno ê spalle d’’e duje centrale e ‘nfilannose ‘mmiezo pe
recogliere chella granna palla ‘e Peppe ‘a ‘nguenta e mmetterla dinto ‘e capa,
isso ch’è tantillo!, p’’o doje a zzero,
mettennose addirittura a pparo cu ‘a bbonanema ‘e Sallustro ‘int’â crassifica
d’’e nassie (marcatori) ‘e tutt’’e
tiempe d’’o Napule. [dall’80’ YOUNES[‘O Mmerecato] 6 ‘e stima Cercaje ‘e jucà chilli troppe pochi pallune avute a mmettaja (disposizione)].
MILIK[Sant’Arcadio] 6 Sí nun signaje e fforze fove poco priciso
‘int’â muntaca (area di rigore) ‘e ll’
avverzarie, ma sinamparco (comunque) focve capace ‘e tené auta ‘a
scuatra soja dànno ‘o margiao(riferimento) ê cumpagne ‘e ll’armidanno
(centrocampo). [dô 76’ INSIGNE[Lorenzigno] 6 Avette justo ‘o tiempo ‘e capí ‘e
che se trattava, ma ‘o ffacette bbuono sfresanno (sfiorando) prure ll’addaffa
(rete d’’o cinche a uno].
all. ANCELOTTI[‘O Jancone] 7 Mettette bbuono ‘a
scuatra ‘ncapo i ‘a facette jucà ci ggenio e ccegna (voglia e rabbia) cosa ca
spisso erano mancate ll’urdemi vvote.
ar. DOVERI i ‘a chenca
soja 3 Chisto ce porta bbuono, ma è
scemo i ‘o ddimustraje cchiú ‘e ‘na vota ajeressera cu ddicisione a ccapa ‘e
saciccio, siscanno a bbienetenne, nutizzianno, senza mutive, ê nuste, ‘nchiudenno ll’uocchie ‘ncopp’ê carí (falli)
d’’e bbisciunare e siascannoce ‘nu ricore contro a ll’81 senza ca chille d’’a VARra ca lle cunzola ‘a zia
moneca ll’alluccase ‘int’ê rrecchie: “Ma tu che ccacchio staje facenno? Viene
vide ca staje smarrunanno....”
E ffermammoce cca. Schifo
e bbusciardezza d’’a natiggia (risultato) v’aggiu ditto e vv’’e cunfermo. E mmo
ve d dico sulo ch’âmm’’a vencere
ll’urdemu sibbacco (match) ca rummane,
chillo ‘e dummeneca vintiseje a Bbulogna pe
‘nchiudere allimmeno a 82 punte. Accussí sperammo e vve saluto. Staveti bbe’!
R.Bracale Brak
Nessun commento:
Posta un commento