GENK-NAPOLI (ciampionsa 2/10/19) 0 A 0 ‘A VEDETTE ACCUSSÍ

GENK-NAPOLI (ciampionsa 2/10/19) 0 A 0

‘A VEDETTE ACCUSSÍ

Che delusione guagliú! Ajere, ‘mmerz’ê ssette, ‘o Napule jette agghiucà, p’’a siconna jurnata ‘e Ciampionsa, ‘mBergio contr’ê ggraunare d’’o Genche ca ‘mprimma jurnata êveno abbuscato seje a ddoje a Ssalisburgo e mme penzavo ca si nunn’avessemo sbrasato, allimmeno avessemo arfuzzato (vinto)… ‘mmece chi t’’o ddà! ‘O Genche, e mmo ve dico,  ce fermaje ‘ncopp’a ‘nu scunzulato zero a zzero, ‘nu russimmo (pareggio) ca nun sta né ‘ncielo, né ‘nterra  pecché ‘nfra nuje e lloro nce sta ‘nu fuosso tanto, ma ajere nun fovemo crestiane ‘e menarcele dinto, anze ce avettemo stà accorte nuje,asasa (soprattutto) ‘ncopp’ê tante e ttante tire ‘e squina (corner ) ca tirajeno lloro addó ca nuje ne tirajemo cinche o seje. ‘O zuco d’’o sibbacco (match) d’ajere fove scarzo e ssenza sapore: ‘o  Napule, dicimmo fove  periculuso sulo ô primmo ajone (nel primo tempo) cu ddoje afachíe   (traverse) covete da sant’Arcadio  e ccu ‘o palo ‘e Peppe ‘a ‘nguenta.Però pure ‘e ggraunare  attaccajeno spaventanno ô Jancone i â  cumbriccula soja ca a ll’arrancua (ripresa) ‘mmece ‘e migliurà risultaje bbatieja e rrazzinna  (lenta e compassata) cu ‘nu natiggia (risultato) ca rappresentaje ‘na grossa accasiona sprecata p’’e guagliune d’’o Jancone; cusicché doppo d’’o  straurdinario arnaca  (successo) ô  San Paolo pe ddoje a zzero  contro ê campiune d'Aiuropa d’’o Liverpul(lo), ce fossemo aspettate ‘e cchiú dô Napule  ca ‘mmece rummanette a vvocca asciutta ‘ncopp’ô zzero a zzro pure doppo ca trasetteno ‘ncampo  Ciruzzo ô 58, i ‘o Spetaccuso ô 72'.

 ‘Nzomma guagliú ajere ‘nterra berga se  vedette  ‘na scuatra [‘a nosta!] ancòra luntana dâ naddija (maturità),ca sciupaje cchiú ‘e n’accasiona bbona e  sse faddaje (espose)  periculosamente,arresecanno addirittura ‘e lassarce ‘e ppenne .. Tutto summato si ‘o zzero a zzero d’ajere fove bbusciardo  rappresentaje p’’o Jancone e ppe nnujaute ‘nu signale ‘mpurtante: mo pe ‘na cosa, mo pe n’ata ‘o mutarribbo(allenatore) nuosto nun riesce ancòra a ttruvà ‘o vestito justo p’’e suoje. E cquanno, quanno ‘o trova ‘stu saciccio ‘e vestito?

Passammo ê ppaggelle:

MERET[‘O Lungagnone] 6,5: Ddoje granni pparate durante ô primm’ajone (nel  primo tempo), nzerranno ‘a   sarracinesca a Berge  primma ô 36' e ppo ô 43'.

 DI LORENZO 6: Facette ‘o duvere suĵo difennenno  primma a ddritta e ppo pure a mmancina; peccato ca asspressuraje (spinse) poco.

MANOLAS[Chitelassa] 6,5:Priciso e ddiciso custrignette ê ggravunare a ttentà coccosa sulo da luntano.

KOULIBALY[‘O Ggialante] 7: cegnateco (grintoso) se dette da fà  sia arreto aizanno senza prubbleme ‘nu muro, sia annante  addirittura jenno vicino a ll’addaffa (rete) e missaidanno (assistendo) a sant’Arcadio.

Mario RUI 6: Jucaje sulo mez’ora po êtte ascí pe ‘nu prubblema adilaro (muscolare) â coscia mancina, ma dètte bboni ppalle asasa (soprattutto) dâ bbannerella  

[Dô 33' MALCUIT[‘O Tignuto] 6,5: Appressuraje (spinse) magnannose ‘a curzia  e ffove attiento a ll’epata difenziva (durante la fase difensiva).]

 CALLEJON[Peppe’a ‘nguenta] 5: ‘Nu zifo (voto) mancante pecché sciupaje ‘nu paro ‘e bboni accasione cumme quanno  ô 57', servuto da  Lozano, tiraje fora da pochi passe pure tenenno a ddispusizziona tutto ‘o parlànfaccia d’’a porta!

ALLAN[‘O ‘Ncrifato] 4,5:Pigliaje cchiú ‘nu sciuliamazzo uno dopo ll’ato perdennopallune assaje periculuse, evidentemente smarrunaje a scegliere ‘e scarpe. Nun ce ‘o pperdono!

ELMAS[‘O Turco] 5,5: Partette ‘nquarta, ma po s’ammusciaje ‘ncartannose ‘int’â munavara razzinna (manovra compassata) d’’a scuatra e sse vedette ca ‘mmiezo ô campo nun ce fove  ‘o prio(brio) nicessario suĵo.

[Dô 58' MERTENS[Ciruzzo] 6: Facette ‘o ppussibbile: ‘nu paro ‘e cunchiusione a ggiro e ppoco ato.

 RUIZ[Anema Longa] 6,5: Tutto summato fove isso a uzzemià (counfezionare) ll’azzione noste  cchiú periculose pure si fove custretto a ttampunà ‘e ffale (falle) d’’o ‘Ncrifato.  

 MILIK[Sant’Arcadio] 4: è ‘a curona d’’a capa mia e mme chiagne ‘o core ma ll’aggi’’a mettere dduje zife (voti) mancante pecché ajere me deludette e sse purtaje ‘ncopp’â cuscienza troppi marunne: apprimma, ô primmo ajone (nel primo tempo) sfurtunato e ppoco priciso pe ddoje vote cugliette ll’afachía (traversa) e ppiezzo e ppajo facette a ll’arrancua quanno sparette cumpletamente e sciupaje n’atu paro ‘e palle taminne (preziose) menannole ‘e capa  fora ‘mmece ca ‘mporta da poche passe.  

[Dô 72'  LLORENTE[‘O Spetaccuso] 4,5: ‘nu zifo (voto) e mmiezo mancante pecché è overo ca, mammuoccelo cumm’è,  faticaje a ccarannà (carburare), ma po facette sulo ‘e fuosse ‘nterra dint’â muntaca (area di rigore) berga senza cunchiurere ‘nu saciccio!]

 LOZANO [‘O Scugnizzo] 5,5: Miezu zifo (voto) mancante pecché sí e nno facette ‘nu paro ‘e cose bbunarelle; troppo poco pe cchello ca ‘o Jancone e nnuje ce aspettavemo!

All.  ANCELOTTI[‘O Jancone] 4,5: Nun le pozzo perdunà d’avé mannato ‘ncampo ‘na scuatra bbatieja (lenta) e ssenza zzurea (ritmo) ca perdette ‘na grannissima accasiona.

Arb. KOVACS 6 Facette ‘o duvere suojo.

E ffermammoce cca, dannoce appuntamento, si ‘o Cielo ‘o vvo’ pe llunnerí ca vene  doppo d’’o sibbacco (match) ‘e campiunato ca ‘o Ciccio va a ffà dummeneca  a Tturino contr’ê guagliune ‘e Mazzarri  a ll’ora d’’e ppastarelle e rrusolio e  spero ‘e putereve cuntà. ca ce simmo jute   a ppiglià ‘e tre ppunte pure si è ddifficile.

Staveti bbe’. R.Bracale Brak