INTER – NAPOLI [16.12.20] 1 A 0 ‘A VEDETTE ACCUSSÍ

INTER – NAPOLI [16.12.20] 1 A 0

‘A VEDETTE ACCUSSÍ

 

Mannaggia, mannaggia e mmannaggia guagliú, ajeressera a Mmilano contr’â Bbisciona nce ‘ntussecajemo ‘a serata e tturnajemo â casa cu ‘na vranca ‘e mosche ‘mmano datose ca ‘o sibbacco  (match) contro â scuatra d’’o zelluso se cunchiurette cu ‘nu fetente uno a zzero ca premiaje ‘e lucale cchiú ‘e chello ca se mmeretajeno e cce lassaje a vvocca asciutta addó ca cu allimmeno ‘nu russimmo (pareggio) nun  nce  fossemo arrubbato niente. E ‘mmece, ‘mmece jette cumme v’aggiu ditto e ddoppo ‘nu primmo ajone (tempo) ‘e pacienza, passato a sse sturià senza farese male [tanto è overo ca nce foveno sulo ddoje accasione, una pe parte, e ppoc’ato…] tècchete ca a ll’arrancua ô 73’ ‘a Bbisciona nce ‘o mettette a ppitoffio cu ‘nu ricore [sacrusanto, pe ccarità!]   trasfurmato da Lukaku, cu ‘e cuane  (azzurri)  ca pure rummase ‘ndiece pe bbia ca ‘o capitano  Insigne fove [ forze senza justizzia]jettato fora da ll’ucummo (arbitro) Massa [4 e ppo ve dico…] foveno  periculuse ô niajo (nel finale) cu Handanovic(cio) dicisivo e ‘nu  palo cuoveto da Petagna. Quanno se dice ‘a sciorta.

Passammo ê ppaggelle:

OSPINA: 5,5. Maje ‘mpignato seriamente spurcaje ll’atalossa soja cu cchella manata ‘ncopp’ô pere ‘e Darmian(ne) ca se lassaje cadé ‘nterra pe ppigliarese ‘o ricore ca Lukaku nun sbagliaje. Che peccato!

 

DI LORENZO: 6,5. Fove ll’urdemo a llevà ‘o pere da ll’accelleratore pe ccupulià (dialogare) cu Llozano, tenenno ‘a pusizziona e arresecanno poco o niente.

MANOLAS[Chitelassa]: 7. Scupaje ‘a muntaca (area di rigore) ‘ncielo e ‘nterra sempe attiento e ppronto e Llautaro pigliaje sulo ‘na palla, ma no p’itimma (per colpa) d’’o creco.

 

KOULIBALY[‘O Ggialante]: 6,5. ‘Ncopp’ô zifo (voto) pesa ‘o rijalo fatto â Bbisciona quanno sbagliaje ascenno  favurenno a Llautaro ca furtunatamente smarrunaje. P’’o riesto ‘o Ggialante mettette ‘a musarola a Llukaku senza sfregazze  (sbavature).

 

MARIO RUI: 6,5. Jucaje assaje auto pe ttené vascio a Ddarmian(ne), ma nun sbaglije ‘nu ricupero. [Da ll’82’ GHOULAM: sv.]

 

DEMME: 6,5.  Aizaje n’aculla (muraglia) centrale,taglianno ‘e llinie d’’o nemico e ccrianno chelle d’’a suoje; ausaje  fosforo e ppusizziona justa e ascette sulo pe ppiglià sciato. [Da ll'84' ELMAS[‘O Turco]: sv.]

 

BAKAYOKO[‘O Mammone]: 6,5. Cercaje ‘e darese ‘na mossa cumme ll’êva addimannato  e isso ‘o ffacette surcanno ‘o campo cu fforza e ccegna (grinta)Cu Ddemme tagliaje ‘e llinie ‘e passaggio pe Llukaku e Llautaro strafuttennose ca Massa, p’’o cundizziunà ll’êva subbeto nutizziato! [Dô 75' FABIAN[Anemalonga]: 6. Ce mettette qualità,tacnía (tecnica) e ccapa auta  quanno ‘o Napule pruvaje a dd’ adderezzà ‘a varca. ‘E cchiú nun putette fà.]

 

LOZANO: 7,5. P’’o fermà ll’êtten’’a vattere: fove ‘na frezza ‘mpazzuta; ‘o meglio d’’e vintiduje ‘ncampo; me sto ancora addimannanno pecché maje Massa lassaje correre tanti fetenzie e ttanti trasute assassine ‘ncuoll’ô messicano senza jettà fora a Skriniar(re) e suppurtaje  ca o Young(he) o Bastoni o Brozovic(cio) ausasseno brutti mmanere  cu ‘o guaglione.

 

ZIELINSKI: 6,5. Facette a ffelle o campo currenno assaje e ‘ntennennosela cu Llozano;  fenomenale  e gghiucate ca murtificajeno a Ggagliardini i a Brozovic(cio).  Peccato ca fove poco  priciso quanno tiraje. [Dô 75' POLITANO: 6,5.Se dètte subbeto da fà asasa (soprattutto) duint’a ll’uno contr’a ll’uno. Cercaje ‘a porta cu ‘na bbella cagliosa però centrale e Handanovic(cio)  facette ‘na bbella parata. Peccato!

 

INSIGNE: 6,5. Voglio crerere a isso e nno a ll’ucummo (arbitro) ca sentette , cumme v’aggiu ditto, coccosa ca ‘o frattese dicette ‘e nunn’avé ditto! Bbella atalossa (prova) partenno addietrato pe ffà ‘o riggista laterale e favurí ‘e spiffere ‘e Mario Rui ca jucaje assaje auto. A ll’arrancua  (nella ripresa) sfresaje (sfiorò) ‘o stuco (il gol) ‘e meza sola. Spisso  Barella alluccaje ê cumnpagne:  “Prendetelo a calci, ma non deve stoppare la palla”.

 

MERTENS[Ciruzzo]: sv.Sfurtunato, ‘o guaglione ascette chiagnenno doppo appena  1ddudece minute ‘e juoco pe ‘nu ‘mpiccio a ll’arcalla  (caviglia). [Dô 16' PETAGNA: 6,5.  Menfello (spigoloso),cusso  (arcigno),nun sprecaje ‘nu pallone  dànno futezza ô juoco e ajutanno quanno nun tenettemo palla. Peccato p’’o palo cuoveto ô nuajo  (nel finale) quanno se vevette  a Dde Vrij e ttiraje da pochi passe: êsse pututo fà meglio cu Handanovic(cio)  fremmo!]

 

all. GATTUSO: 6,5. ‘A scuatra soja êsse avut’’a essere cchiú ccuncentrata e ffetente sotto porta, pecché custruette assaje, ma sciupaje allimmeno ddoje o tre accasione bbone; primmo ajone (tempo) senza maje sufferí ‘a fora p’o sfregazzo (sbavatura) ‘e Koulibaly; ‘e  guante ‘e Pastacrisciuta nun s’êtten’’a spurcà. ‘O Napule fove cundannato pe ‘na circustanza smalaurata, ma nunn’ascette dô Meazza spernacchiato e smancato.

arb.MASSA 4  Cumplessivamente poco sicuro e poco attiento. Se sparagnaje ‘o sciato, siscanno poco; ricore sacrusanto, ma po nun vulette vedé  tanti facenne  chiave ‘ntutto ll’arco d’’o sibbacco  (match); forze po pigliaje ‘nu granne zzarro quanno jettaje fora ô capitano nuosto accusannolo ca a auta voce ll’êva mannato a gghí ‘e cuorpo addó ca Insigne susteneva ca isso  nn’êva ditto niente. Sparagnaje aâ scuatra ‘e casa quacche cartellino jalizzo (giallo) e cquacchuno ch’esso pututo essere russo.

E ffermammoce cca, pacienza jette cumme jette e cchella d’ajere fove ‘na notte da se scurdà p’’a scuatra ‘e Gattuso, ma sulo p’’o natiggio ( punteggio), pecché cumplessivamente chella d’’o Ciuccio, p’’o riesto, fove ‘na mumazza atalossa (ottima prova) ‘e scuatra d’auta crassifica.

I allora mo si ‘o Cielo ‘o vvo’ ce sentimmo lunnerí ca vene pe ccuntareve che facimmo dummeneca a ssera contr’â scuatra d’’o pappavallo ‘e Lotito a Rroma. Pe mme a Rroma s’à dda sulo affuzzà (vincere). Staveti bbe’. R.Bracale Brak