giovedì 2 dicembre 2021

SASSUOLO – NAPOLI [1.12.21] 2 A 2 ‘A VEDETTE ACCUSSÍ

SASSUOLO – NAPOLI [1.12.21] 2 A 2

‘A VEDETTE ACCUSSÍ

E cche sanco ‘e chi ll’è bbivo! Guagliú sto’ avveluto. Pare proprio ca ‘o Palazzo [addó Dela conta quanto ‘o doje ‘e coppa â bbriscula quanno ‘o triunfo è a mmazze…] nun ce ‘o vvo’ fà fà ‘o spezziale; cumminfatte  ajeressera ‘a tarra (sfida) cu ‘o  Sassuolo [una d’’e scuatre assineja (satellite) d’’a vecchia zoccola.. ] sibbacco (match) d’’a quinnicesima jurnata se cunchiudette cu ‘nu russimmo (pareggio) pe ddoje a ddoje addó nsi’ ô sissantesimo ‘o Ciuccio steva ‘nnante pe ddoje a zzero grazzie a ll’addaffe (reti) d’Anemalonga [52’] e dde Ciruzzo [60’]; fove tanno ca, vista ‘a mala parata, ll’ucummo Pezzuto [4 e ppo ve dico] abbiaje a ssiscà sempe ‘ndanno nuosto caputianno ll’acataste (i falli) e ‘mmentannose contr’ô Ciuccio timmurrie (punizioni) malegne nsi’ a cche apprimma  Scamacca[72’] e ppo Ferrari [89’] nun purtajeno ‘e lucale ‘ncopp’ô doje a ddoje; anze ll’ucummo tentaje ô 92’ d’‘e ffà affuzzà (vincere) facenno passà pe bbona n’addaffa (rete) ‘e Defrel(le) signata doppo n’acatasta (un fallo) ‘e Berardi ca Pezzuto nun vulette vedé, ma s’ êtte ‘a fà dint’ô prozo  e avette annulla ‘o stuco (gol) doppo ca ‘a var(ra)’o mettette a dduvere. Cusicché jette a ffení  cu ‘nu russimmo (pareggio) e cce purtajemo â casa ‘nu punto surtanto addó ce n’êssemo pututo purtà tre si ll’ucummo (arbitro) nun c’êsse scassato ‘o saciccio.

 Sto’ avveluto guagliú. Chiste nun ce vonno fà fà ‘o spezziale…, ma p’’o mumento simmo ancora primme pure si sulo cu ‘nu punto ‘nchiú dd’’o Diavulo russo e nniro .

Passammo ê ppaggelle:

 OSPINA[Ecchesepastacrisciuta] 6:Forze êsse pututo fa coccosa ‘e cchiú ‘ncopp’ô tiro centrale, ma putente ‘e Scamacca, ma ‘ncopp’â tacatarrassa (colpo di testa) ‘e Ferrari, lassato troppo sulo nun ce putettefà niente e p’’o riesto  difennette ‘a porta cu dduje o tre bbuoni tacculle (interventi).

 DI LORENZO 5,5: Miezu zifo (voto) mancante giacché dô 70' a dritta ll’epata difenziva  (la fase difensiva) nun fove d’’e mmeglie.

RRAHMANI 5:Me dispiace ma ll’attocca ‘nu zifo (voto) mancante pecché apprimma se perdette a Scamacca e ppo ô 93’ ‘a facette sporca; pe ffurtuna ce penzaje ‘a var(ra).

 KOULIBALY[‘O Ggialante] 6,5:  Pettenato (perseguitato) dâ scalogna se nn’ascette a ll’uttantesimo pe prubbleme â coscia mancina; forze si fósse rummaso ‘ncampo nce fossemo purtate â casa ‘e tre ppunte. Sperammo ca se repiglia p’’a tarra casalinca ‘e sapato contro a ll’Atalanta [n’ata scuatra assineja (satellite) d’’a vecchia zoccola.]

[Da ll'80' JUAN JESUS: s.z.]

 RUI 5,5 :Ll’aggi’’a levà miezu zifo pecché se cumpurtaje a dduvere scennenno a mmancina sulo  p’’a primm’ora  però a ll’89’ lassaje sulo a Fferrari e nun ce ‘o ppozzo perdunà.

Sebastian LOBOTKA 6,5:N’ata bbona atalossa (prestazione) d’’o centrale d’armidanno (centrocampo) ca foce acciaccuso  (agguerrito) i apprettatore (aggressivo) ô nicessario.

 RUIZ[Anemalonga] 7,5: Appena asciuto dô campo se sentette ‘a mancanza soja e cce mancajeno ‘e fficre (idee) soje i ‘o cuverno ‘e palla; assaje bbello ‘o stuco  (gol) ca signaje quase ‘a fora muntaca da fuori area (seppur di pochissimo).

[Dô 66'  POLITANO 5,5: miezu zifo mancante pecché facette poco ‘mpignato a ffà aculla (contenimento) ca nunn’è ccosa soja.]

 LOZANO 5: Nu zifo mancante pecché se vedette sí e nno  p’’o primmo ajone (primo tempo) cu quacche bbona scaravugliata (sgroppata), ma senza maje cercà e ttruvà ‘a porta.

[Dô 73'  DEMME 5: faticaje a ttruvà  ‘a zzurea (ritmo) rummanenno ‘mbuttigliato lla ‘mmiezo. Peccato.]

 ZIELINSKI 7,5: Atalossa (prova) pusitiva d’’o pulacco ca participaje cu mmissidde (assist) a zzuco ‘e caramella a ttutt’’e ddoje ll’addaffe (reti) noste.  

 INSIGNE 6: Jucaje ‘e primme quarantacinche minute cu bbuonu zarrabbujo (palleggio) zurea (ritmo) e vuduja (lucidità) po   Spalletti ‘o levaje pe pruteggerlo datose ca lle se ‘ntustaje ‘o purpone (polpaccio) e nnun vulette arresecà d’’o perdere p’’a tarra (sfida) cu ll'Atalanta.

[Dô 46' ELMAS[‘O Turco] 6:Ô ssolito  se facette nutà p’’o zzarrabbujo  (palleggio).

 MERTENS[Ciruzzo] 7,5: Sceriato e allustrato  ce facette alliccà ‘e bbaffe pe ccumme signaje recuglienno cu ) zurea (ritmo) e vuduja (lucidità) ‘o jabbro (cross) e Zielinski e depositaje ‘a palla ‘mporta.

[Dô 65' PETAGNA 6: Se mettette a ddisposizzione d’’e suoje addó fove nicessario p’attaccà.]

All. SPALLETTI 6,5: E ch’’o vuó dicere? Nun fove itimma (colpa) soja si  pe cchiú ‘e n’ora ‘a scuatra soja jucaje a mmestiere e steva affuzzanno (vincendo) e ppo fove angappata quanno isso  fove custretto a pperdere ‘o capitano, Anemalonga i ‘o Ggialante proprio quanno ll’ucummo abbiaje a ddà ‘e nummere!

Arb. PEZZUTO 4 Mannato pe rromperce ‘o saciccio,ucummaje (arbitrò) p’’a primma vota ‘na mubbara (partita)d’’o Napule e sperammo ca nun ‘o mannano cchiù

‘A facette overo grossa ‘ncopp’ô stuco (gol) ‘e  Ferrari quanno nce fove n’acatasta  (fallo) lloro e isso nce siscaje ‘na timmurria  (punizione) contro!

E bbasta accussí; è gghiuta cumm’è gghiuta e ‘nu poco ‘e pacienza, strignimmo ‘e diente e guardammo ‘nnante.

Mo si ‘o Cielo ‘o ccunzente ce sentimmo dummeneca ca vene pe ccuntareve che succere sapato a ssera ô Maradona contr’ a ll’Atalanta. Facimmo ‘e ccorna e sperammo ca nun mannano n’ucummo ‘mmezziato a rromperce ‘o saciccio.

‘E cchiú, ‘e cchiú, ‘e cchiú Ciuccio fa’ Tu!

Staveti bbe’ Raffaele Bracale Brak