NAPOLI – CHIEVO (08.04.18) 2 A 1 ‘A VEDETTE ACCUSSÍ

NAPOLI – CHIEVO  (08.04.18) 2 A 1

‘A VEDETTE  ACCUSSÍ

Che parpitazziona ‘e core , guagliù,ma po tutto a pposto e ajere a ll’ora d’’a tiella scanzajemo ‘nu granne  fuosso   ô san Paolo addó ‘nnante a scarze  cinquantamila masciadde (spettatori) ‘o Ciuccio  riuscette a vvattere chilli quatto  campanare d’’e pariente lasche ‘e Giulietta e â faccia ‘e tutte ‘e cestarielle e dde chilli dduje pirete, almullacche (commentatori) ‘e Sky [ca ce secciajeno malamente pe ttutto ‘o sibbacco (match)]acchiappajemo p’’e capille tre ppunte ‘mpurtante  e i quase quase ancòra nun ce  crero visto ca ‘a nichemata (vittoria) nosta fove ‘nu vero e pproprio  miraculo  ca arrivaje  sulo ô 93’ cu Diawara doppo ca a ll’89’ sant’Arcadio êva pattato ‘o stuco ‘ncassato dô Ciuccio ô 73’ pe bbia ‘e ‘nu nquacchio nfra Tonelli e Koulibalý. Pe ffurtuna ca [e ‘o ddico a cchi nun ce crede] ‘e miracule succedeno e uno succedette proprio ajere ô san Paolo! Passammo ê ppaggelle:

REINA 6  Nunn’ êtte ‘a fà nisciunu taccullo (intervento) pecché ‘o  Chievo nun tiraje maje ‘mporta pure durante ô primmo ajone (tempo) quann’’o Napule arrancaje senza cunchiurere ‘nu saciccio; po però ‘mpruvvisamente a ll’arrancua ( nella ripresa) ô 73’, ‘o bbi’ lloco ll’acqua, e cumme v’aggio anticipato capitaje  ‘o pasticciotto ‘nfra Koulibalý e tTonelli e  Stepinski, libbero e ffranco piazzaje ‘na palla ê spalle d’ ‘o spagnuolo senza ca ce putesse fà niente!

HYSAJ[Meza Cucchiara] 5,5  Rummanette a gguardia d’’o bbidone, ma appressuraje (spinse) poco e nniente lassanno sulo a pPeppe ‘a ‘nguenta, senza cupulià (dialogare) maje.

TONELLI 5,5  Nun partette malamente e nnun le scappaje maje ll’avverzario a pparte quanno cunzentette ‘a repartida (ripartenza) ‘e Giaccherini ca fruttaje ‘o stuco (gol) ‘e Stepinski ca ce fósse pututo custà caro!

KOULIBALY[‘o Gialante] 5,5  Me dispiace ma nun pozzo metterle ‘o seje pecché si fove overo  ca a  ccentro d’’a trasera (difesa)se facette rispettà  senza prubbleme  e ppruvaje  a scennere ‘nnante ‘ncopp’ê tire ‘e squina (corner),però senza zuco, è ppure  overo ca ô 73’ se facette zumpà da Stepinski e ssuccedette ‘a disturbbata d’’o stuco verunese. Che peccato!

 RUI 6 - Se prupunette assaje accumpagnanno Lorenzigno , e facennose valé ‘mpercussiona. Peccato ca fove nutizziato (ammonito) e à dda zumpà ‘a mubbara (partita) ca vène.

ALLAN 5  Me dispiace, ma ajere nun me piacette e nnun fove isso! Pe ccorrere ‘o ffacette sí, ma a vvacante sbaglianno troppi pasiglie (passaggi) pure chilli cchiú ffesse! [Dô 70' ZIELINSKI 5,5 Trasette senza spustà ‘e niente ‘e ccose  da cumme steveno!]

DIAWARA 6,5 Nsi’ ô 93’, quanno truvaje ‘o miraculo d’’o stuco (gol) ca ce facette vencere, zampettaje p’’o campo chianu chiano, quase passianno senza maje urtizzà (verticalizzare) o ‘nventarese coccosa e sse fósse mmeretato cinche, ma po signaje e cce dette ‘a nichemata (vittoria)!

HAMSIK[Marekiaro] 6 – Tutto summato, ‘e chille lla ‘mmiezo, fove chillo ca me parette meno addurmuto; se facette vedé ‘nnante mettenno allimmeno ‘ndifficultà ‘a tràsera (difesa) avverzaria  . S’accummudaje ‘mpanca quanno s’êtt’’a tentà ‘o ttutto pe ttutto! [Dô 63' MILIK [sant’Arcadio] 7 – Che ‘nsertamiento (inserimento) che stuco(gol), che libberazziona! Cu ‘o  Sassuolo fove  fermato sulo dô travesagno  (traversa); ajere pe bbona sciorta nosta,â primma accasiona e ppalla justa  ce rijalaje ‘o mumentanio russimmo (pareggio). Ah! Fósse trasuto primma!]

CALLEJON[Peppe ‘a ‘nguenta] 5 – Sbagliaje troppo pure sottoporta facenno sempe ‘o muvimento ô ccuntrario e dànno sempe ‘a ‘mpressiona ‘e nun sapé moverse ô  mumento justo pe ttruvarese ê spalle d’’o terzino. E cche saciccio!

MERTENS [Ciruzzo] 4,5 Me dispiace, ma tanto se mmereta! Ll’atalossa (prestazione) soje fove scadente assaje: nun sulo sbagliaje ‘o ricore ch’êsse pututo rennere ‘a mubbara (partita) meno cumpricata, ma cumplessivamente mancaje ‘e pruntezza, senza pigliarla quase maje, senza maje riuscí a smarcarese e a mmettere paura ô purtiere. Che peccato!

INSIGNE [Lorenzigno] 6  Forze s’ammeretasse cchiú ppoco pecché pur’isso sprecaje assaje sottoporta, però po, tutto summato, fove lla ‘nnante chillo ca se muvette ‘e cchiú mettenno ‘ndifficultà a  dDe Paoli e mmannannolo spisso ‘ncrisa e soprattutto a ll’89’ truvaje ‘nu granne pallone p’’a capa ‘e sant’Arcadio ca ce dètte ‘o mumentanio uno a uno.

all. SARRI 5 – M’aggiu sfastediato ‘e dicere sempe ‘e stessi ccose: ‘o peggio difetto ‘e st’ommo è d’essere cucciuto e nnun cagnà maje pure quanno ggià cunosce ll’avverzario,  cumminfatte ggià ‘o ssapeva  ca ‘o Chievo se difenne bbuono e se nchiude a rriccio e ca a nniente serve metterle contro ‘na scuatra ca custruisce sí, ma troppo cuoncio cuoncio e cumplicatamente addó ajere nce fósse vuluta sverdezza e ‘nteliggenza; sí forze ‘nu  Napule  "nurmale" ‘ncap’’e diece minuto êsse risolta ‘a facenna, ma ‘o prubblema è ca chillu Napule d’’o ppassato nun c’è cchiú... e sse vedette ajere. Scummettimmo ca nun se n’è ancòra addunato?!  

arbitro MANGANIELLO 6 pur’essenno ‘e  Pinerolo [liggite Torino] fetenzie nun ce ne facette!

E ffermammoce cca! Ringrazziammo ô Cielo ‘e cumme è gghiuta e  mmettimmoce cu ‘a capa a ddummeneca ca véne quanno  a ll’ora d’’a tiella se va a mMilano contr’ê diavule e ssi Ddi’ vo’ ve ne parlo lunnerí ca vène.

Staveti bbe’! R.Bracale Brak