TRASETURA CAUDA ‘E CANNELLINE

TRASETURA CAUDA ‘E CANNELLINE

Chello ca ce vo’ pe 6 perzone

dduje buccaccielle ‘e fasule cannelline arvate,

150 gramme ‘e pacetta affummecata a vvarriglie ‘e cm. 5 pe 2 pe 1,

200 gramme ‘e passata ‘e pummarola,

ddoje cepolle ndurate ammunnate e ntretate,

‘na pastenaca grossa ammunnata e ntretata,

’na lomma (costa) d’accio ammunnata e ntretata,

‘nu gruosso tuppeto (ciuffo) ‘e prutusino lavato, asciuttato e ntretato fino fino,

‘nu bicchiere e mmiezo  d’uoglio ‘auliva dunciglio,

‘na fronna ‘e lauro frisco,

miezu bicchiere ‘e vino janco asciutto,

sale fino e ppepe janco macenato a ffrisco quanto ne serve.

Comme se fa:

appruntà ‘mprimmese ‘na sarzulella dinto a ‘na  prupurziunata tiella a ffuoco miccio cu  ‘nu bicchiere   d’uoglio ‘auliva dunciglio, duiciente gramme ‘e passata ‘e pummarola,

‘na cepolla ndurata ammunnata e ntretata,

‘na pastenaca grossa ammunnata e ntretata,

’na lomma (costa) d’accio ammunnata e ntretata, ‘na fronna ‘e lauro frisco; accuncià ‘e sale e ppepe e fà cocere pe ‘nu quarto d’ora;mantenere ‘ncaudo;

 cuntemporaneamente dinto a n’ata tiella a ffuoco allero fà suassà cu ‘na cepolla ndurata ammunnata e ntretata dinto a miezu bicchiere d’uoglio, ‘e vvarriglie ‘e pancetta tenennole ô ffuoco pe ‘nu quarto d’ora;ricà ‘o miezu bicchiere ‘e vino janco asciutto e farlo svapurà;  mantenere ‘ncaudo; a chistu punto arapí ‘e bbuccacce cu ‘e fasule arvate e revacà ‘e fasule dint’ô zuchillo e a ffuoco miccio farle ‘nzapurí pe ‘nu quarto d’ora;agnadirve dinto ‘e vvarriglie ‘e pancetta suassate, ammiscà, derrammà  cu ‘o tuppeto (ciuffo) ‘e prutusino lavato, asciuttato e ntretato fino fino,tuiglià e mannà ‘ntavula ‘sta trasetura cauda ‘e fuculare. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà.

Mangia Napoli, bbona salute! Scialàteve e cunzulàteve ‘o vernecale!

Raffaele Bracale