TRASETURA CAPRICCIOSA

TRASETURA CAPRICCIOSA

Chello ca serve pe seje perzone:

250 gramme ‘e farenella jalizza,

¾ ‘e latte retunno,

300 gramme ‘e prusutto cuotto tagliate a ffarinule ‘e tre pe ddoje p’ unu centimetro,

300 gramme ‘e pruvulone piccante tagliate a ffarinule ‘e tre pe ddoje p’unu centimetro,

50 gramme ‘e caso pecurino rattato fino,

3 ova,

pane rattato q.n.s.

sale fino q.n.s.,

abbunnante uoglio pe frijere,

diciotto steccadente  bastantemente luonghe.

Comme se fa:

Mettere ‘na cazzarola a  ffuoco miccio, revacarle dinto ‘o llatte, salarlo e farlo scarfà; ricarve dinto poco â vota tutt’ ‘a farenella, ammiscà cuntinuamente cu ‘na cucchiarella e farne ‘na pulentina bastantemente massiva  (compatta.)

2

Levà ‘a pulentina  dô ffuoco quanno s’accummencia a staccà dê pparete d’ ‘a cazzarola.Arapí ddoje ove retonne dinto a ‘na ciotola, agnadirve ‘nu poco ‘e sale cu ‘o gghianco d’ ‘o terzo uovo e  sbatterle nfi’ a farle muntà; tené a pparte ‘o russo d’ ‘o terzo uovo. Fraditanto fà arrefreddà ‘a pulentina e agnadarvi dinto ‘o russo d’uovo tenuto ‘e parte e ‘o ccaso pecurino rattato fino; ammiscà e revacà ‘ncopp’ a ‘nu marmulo ‘e cucina verniciato cu ‘nu poco d’ uoglio pe frijere, schianà ‘sta pulentina cu ‘a lama ‘e ‘nu curtiello arriducennola primma  a ‘nu cuscio ‘e tre centimetre e ppo a ffarinule ‘e tre pe ttre pe ttre. Taglià a ffarinule pruvulone e prusutto.

A cchistu punto piglià ‘e steccadente bastantemente luonghe e ‘nfilarve ‘ncopp’ a ognuno ‘na farinula ‘e farenella una ‘e prusutto e una ‘e pruvulone e cuntinuà accussí nfi’ a rregnere ‘o steccadente. Quanno tutte ‘e steccadente so’ appruntate passarle apprimma dint’ê ddoje ova e ô janco d’ ‘o terzo bbuone  sbattute e ppo dint’ô ppane rattato e frijerle dinto a ll’uoglio vullente e prufunno. Scularle e servirle comme trasetura  cauda ‘e tiella accumpagnata ‘a fellate ‘e salame e capecuollo. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà. Mangia Napoli, bbona salute! Scialàteve e aggarbbatéve ‘o vernecale! Raffaele Bracale