CHESTA VERNATA

Chesta vernata…


I

E all’ intrasatta, ’a che so’ scumparute
’a primmavera e autunno…, pure st’ anno
s’ è appresentato vierno e m’ à cugliuto
dint’ a ’na scella… e mmo vaco scanzanno

chi tène ’a freva o chi fa ’nu sternuto,
chi s’ allamenta p’ ’o poco d’ affanno…
So’ gghiuto ’int’ ô nuvanta! So’ caduto
comme a ’nu piro nizzo e vaco ascianno

sceruppe e antireumine e bbubbazzèlle,
vaco ’nzerranno ’e pporte e ògne fenesta
preoccupato ’e ’na scippacentrella

ca me putesse farme ’na ddia ’e festa!
Me songo ’nchiuso dinto e chesta è ’a vota
ca nun me smove manco ’o terramoto!…

II

Dice: E pecché?… Ma che ssî addeventato?…
Te fa paura ’o friddo? E quannu maje!…
E bbravo ô fesso! Nun te n’ hê addunato
ca chisto nun è vvierno cchiú ormaje…?


Ma nun ’o vvide ca s’ è arrevutato
tutt’ ’affabbeto e ca pirciò nun saje
si, ascenno, hê ’a starte bbuono accapputtato
o ’mmaneche ’e cammisa?… E quanno vaje

scaruso, bbello e bbuono ’a tramuntana
t’ alliscia ’a coccia e te refredda ’a zella…
Si po’ te ’mpizze ’na sciascina ’e lana

faje ’e stufe ’arena giacché ’a calandrella –
ca ’e chisti mise nun ce azzecca niente –
te còglie all’ intrasatta, malamente!

III

Nun saje comme hê ’a vestirte, gioja mia…
Nun è ’nu vierno serio e naturale,
nun è ’a staggiona ca cumanna Ddio,
è n’ ata cosa… è rrobba p’ ’e spezziale!

E aje voglia d’ apararte comme sia!
Te… sciacca quanno vo’ e te fa male:
tosse, catarro, bronco-purmunia
e ’o miedeco… ce azzuppa e ce se sciala…

E ll’ unica difesa – nun fa’ ’o locco!… –
è cchella ’e stà ’int’ â casa, accorto e leso…,
naturalmente cu ’e preghiere ’mmocca

ca quaccheduno nun te fa… ’a surpresa
e te vène ’ammiscarte a… domicilio
cu ’a scusa ’e cunfurtarte nel tuo… esilio!


IV

Pe cui, tetí, t’ ’o ddico chiaro chiaro:
nun me vení a truvarme… Nun fa’ niente!
Si proprio vuó sentí a che s’ appara,
attàccate â curnetta… E si me siente

ca nun te parlo mazzecanno amaro,
vo’ dicere ca stongo ’nzarvamiento
e forze arrivo a scapulà fevraro,
tuccanno fierro… Ma però si a stiento

m’ îsse ’a sentí ’e risponnerte e ’nfuscato
nun t’ ’a piglià!… Sarrà ca ’un ce à pututo
tutt’ accurtenza mia e ’sta vernata

m’ à cumbinato ’o scherzo e m’ à futtuto!
E quanno i’ nun sto’ bbuono – n un sia maje! –
i’ arronzo chi sia sia, comme ggià saje!

Raffaele Bracale
(dal vol. 'E CCOSE D''O PPASSATO ed. Graus Napoli 2006)