A N’ATU POSTO?

A N’ATU POSTO?

I
A n’atu posto?Addó!? Chest’ aria fina,
chest’aria prufumata ‘e mille addore,
ca saglie ‘ncielo ‘a tutte ‘sti ciardine
ch’è ‘nu barzamo doce p’ògne ccore

ca ssana tutt’’e male ‘e cchiú traíne...
sta sulo cca… Chest’aria ‘e millesciore
sta sulo a chistu sito ch’è strafino
e se nomma Ssurriento ‘ncantatore!...

E i’ cca venesse ‘into a ‘na casarella
cu ‘nu muorzo ‘e ciardino cu ‘e llimone,
cu ‘o furno pe ffà ‘o ppane o ddoje freselle

e cu ‘na ferza ‘e mare chiacchiarone
ca smicciasse ‘a luntano dint’ â casa
‘ncopp’ê ttianelle e ‘ncopp’â rattacaso!

II

‘Assateme sunnà ‘stu suonno bbello
e sfrennesià cu ttutta ‘a fantasia;
me voglio lusingà, ca comme sia,
‘nu juorno calzo ‘ncuollo ‘o jeppunciello,

arronzo tutto, avoto ‘o sciavechiello
e vengo a sistimarme ‘a chesta via
pe ‘nchiudere ‘mbellezza ‘a vita mia
dinto a ‘nu muorzo e casa e ciardeniello,

‘ntra facce nove, amice nuove e ggente
maje vista primma, ggente maje saputa
ca ‘un me spiasse e nun vulesse niente

manco ‘e sapé comm’ i’ stesse ‘nsaluta
ca ‘e ‘nu surzo ‘e cafè s’accuntentasse
e casu maje me ne ringrazziasse!

R.Bracale
(proprietà riservata)