TIMPÀNO ‘E MULIGNANE

TIMPÀNO ‘E MULIGNANE Clello ca serve pe sseje perzone 6 grossemulignane longhe viulette napulitane, 50 gramme ‘e ‘nzogna, 300 gramme ‘e prusutto cruro tagliato a ffelle suttile, 300 gramme ‘e scamorza percante tagliate a ffellocce suttile, 5 ova, 100 gramme ‘e farina, abbunnante uoglio pe ffrijere, 4 cucchiare ‘e sale duppio. Comme se fa Lavà e asciuttà ‘e mulignane levanno ‘e streppune e ‘e ddoje ponte; tagliarle a felle doppie ‘nu centimetro e sestimarle a ccuscie (derrammate ognuno ‘e sale duppio) dinto a ‘nu scolapasta pe ‘na mez’ora. Farle spurgà, sciacquarle sotto a ‘nu strèpeto d’acqua fredda, spremmerle , ‘nfarenarle e frijerle dinto a ‘na tiella ‘e fierro niro cu abbunnante uoglio pe ffrijere vullente. Scularle e tenerle a mmanese.Fraditanto ògnere cu ‘a ‘nzogna ‘na prupurziunata cummedità bbona p’ ‘o tiesto e ssistimà apprimma ‘nu cuscio ‘e mulignane fritte,po uno ‘e prusutto cruro tagliato a ffelle suttile e ppo uno‘e scamorza percante tagliate a ffellocce suttile; cuntinuà nfi’ a cche ce sta rrobba ‘a sistimà; ll’urdemo cuscio à dda essere ‘e mulignane; agnadí ‘ncopp’ a ttutto quacche tuppetiello ‘e ‘nzogna ‘Nfilà ‘a cummedità dint’ô tiesto ggià caudo a 180C° e tenercela pe ‘nu quarto d’ora; fraditanto sbattere ll’ova cu ‘nu pizzeco ‘e sale, arapí ‘o tiesto e derrammà ‘o timpàno cu ll’ova sbattute e metterle ancòra dint’ô tiesto pe cinche minute pe ffà quaglià ll’ova. Serví tagliato a felle ‘stu sabbruso timpàno ancòra caudo ‘e tiesto. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! raffaele bracale .