NAPOLI – ATALANTA (C.I.02/01/18) 1 A 2 ‘A VEDETTE ACCUSSÍ

NAPOLI – ATALANTA (C.I.02/01/18) 1 A 2

‘A VEDETTE  ACCUSSÍ

E cche ne parlammo a ffà  guagliú,mannaggia ê cane ‘e cancielle! Si ‘o bongiorno se vede dâ matina ‘stu cacchio ‘e duimiladiciotto, nun prumette niente ‘e bbuono dàtose ca ajeressera ô san Paolo c’êttemo da zucà ‘o primmo dispiacere ‘e st’anno abbuscanno da ll’Atalanta [una d’’e ttre scuatre assineje (satelliti) d’’a vecchia zoccola], capitatace ‘nfra ê piere i ‘a facenna dipennette ‘mprimmose da Sarri [4] ca sbagliaje furmazziona mannanno ‘ncampo ‘na scuatra cu troppu rutizzio (turn-over) scuatra ca attaccanno  nun fove capace ‘e superà ‘e duje pulmanne mise ‘a Gasperini ‘nnant’â porta ‘e Berisha i arreto soprattutto cu Mario Rui [4] jette ‘int’ê chiavette cu ll’atalantise ca teneveno ‘e sette spirite e sguigliavano da sotto terra; ce se mettette po ‘na jella nera ca ce cundannaje a ppiglià ‘e duje stuche (gol) atalantisi doppo dduje sciuliamazze d’’e nuoste [uno ‘e Mario Rui ô 5’ ca dette via libbera a cCastagne e ll’ato d’’o Vampiro a ll’81’ ca mannaje Gomezzo a ccasticà Sepe [5]   ca nisciuna d’’e ddoje vote tentaje ‘e fà coccosa. Mettitece po a cchella mmunnezza futtuta ‘e ll’arbitro Giacomelli e d’’a chenca soja [3]ca ce siscaje sistematicamente contro, caputianno carí (falli) e llassanno ca ‘e jucature ‘e Gasperini mazzuliasseno ‘e nuoste senza ca isso facesse ‘na chieja; e ffósse stato niente si allimmeno doppo ‘e ll’addaffa (rete) ‘e Castagna êsse cecato a vvedé ‘nu carí (fallo) vuluntario ‘e vraccio ‘e Caldara dint’â muntaca (area di rigore) soja e cc’êsse dato ‘o ricore... ‘mmece nun vulette vedé, nè ssentí raggioni e nnun ghiette manco a cecà dint’’â varra d’’a sora.

Cusicché êttemo aspettà sulo ca Sarri se decidesse a mmannà ‘ncampo a  lLorenzigno i a  cCiruzzo ca a ll’85’ turnaje a ssignà dànnoce ‘na  speranzella ‘e russimà (pareggiare); ma nun succedette dàtose ca ce fove pocu tiempo pe ffarlo e ll’atalanta, ce jettaje fora dâ coppa itaglia. Dispiacette ‘e perdere nun dico ‘e no, ma tutto summato meglio accussí visto ca mo, da cca a mmaggio  ce s’à dda cuncentrà sulo ‘ncopp’ô campiunato e sperammo ca nun ce metteno ati prete ‘e ponte, cumme certamente cerca ‘e fà ‘a vecchia zoccola! Passammo ê ppaggelle:

SEPE 5  Nun me piacette; ô pprincipio nun êtte ‘a fà niente e ssulo doppo ‘na bbona mez’ora  Gomezzo lle scarfaje ‘e mmane; ‘ncopp’ê ddoje addaffe atalantese êsse avuto tentà coccosa ascenno e nnunn’ ‘o ffacette!

HYSAJ[Meza Cucchiara] 5,5 Urdinaria amministrazione  a ll’epata difenziva (in fase difensiva), ma annante se vedette poco o niente cuntentannose ‘e guardà ‘o bbidone... troppo poco!

CHIRICHES[‘O Vampiro] 5,5 Sfurtunato quanno sciuliaje dànno via libbera a Gomezzo, facette cchiú ‘e ‘nu  sfregazzo (sbavatura) a ll’epata ‘e repartita (ripartenza) arresecanno sempe quacche ccosa. 

KOULIBALY[‘O Gialante] 6 Tutto summato fove ‘o megglio lla ddereto pure si pur’isso, a ll’epata ‘e repartita (ripartenza), nun se cumpurtaje troppo bbuono!S’abbuscaje ‘nu cartellino jalizzo (giallo) a mmità d’’o primmo ajone, ma nun s’’o mmeretaje!  

MARIO RUI  4 ‘O peggio d’’o mazzo; ggiraje a vvacante annate i arreto e pur’isso jellato  ppigliaje ‘o sciuliamazzo   ca  favurette ll’addaffa (rete) ‘e Castagna. Sperammo ca torna ambressa Ghoulamme o ce serve n’atu terzino mancino!

ROG [‘A Bbelva] 6  Se dètte da fà subbeto cu ggenio e ccegna(grinta); peccato ca doppo pochi minute se facette angappà da  Caldara proprio quanno steva pe ttirà ‘nnante ô purtiere atalantiso; fove pur’isso nutizziato (ammonito), ma pe ‘na fessaria ‘e café.  

DIAWARA 5,5 Accumminciaje bbuono cu ‘nu bbellu lanzo pe pPeppe ‘a ‘nguenta, ma po, che ppeccato!,  sparette e cqui fu Napoli!

HAMSIK[Marekiaro ] 5,5 Sulo ‘nu granne lanzo pe pPeppe ‘a ‘nguenta doppo ‘na ventina ‘e minute,ma po poco ato; naturale ca Sarri s’’o chiammasse ‘mpanca.[dô 56′ INSIGNE 6 Appena trasuto se vedette poco, ma po a ll’85’ anventaje ‘o lanzo esatto pe cCiruzzo ca mettette a ffrutto.Êsse avut’’a trasí assaje primma!]

CALLEJON [Peppe ‘a ‘nguenta] 6,5 Uno d’’e cchiú tellecarielle, sempe ‘mmuvimento; ‘a primma vera accasiona fove ‘a soja ô  7′ quanno cu ‘nu càtaro (diagonale) velenuso spaventaje a  bBerisha ca salvaje cu ‘e pponte d’’e ddete; ancòra nun m’è cchiaro pecché  Sarri ‘o levaje doppo ll’uno a zzero atalantiso. [dô 56′ MERTENS [Ciruzzo] 6,5  Turnaje a ssignà arapenno n’ata vota ‘a mubbara  (partita), ma succedette troppo, troppo tarde!]

OUNAS 5,5 Ô pprincipio facette poco, primma ‘e truvà ddoje bboni gghiucate a mmità d’’o primmo ajone. Troppo poco! [dô 72′ ALLAN [‘O ‘Ncrifato] 5,5 Atalossa(prestazione) senza nomme e cugnomme; me fósse aspettato ‘e cchiú.]

ZIELINSKI 5 Serata no d’’o guaglione ca sciupaje ‘na bbona accasiona sotto â mez’ora e ppo sparette.

all.: SARRI 4  Sbagliaje furmazziona e sse vedette ca nun lle futteva niente d’’a coppa itaglia; quanno facette trasí ‘e  duje tenure titulare fove troppo tarde!

arb. GIACOMELLI I ‘a chenca soja 3 V’aggiu ggià ditto d’’e ffetenzie ca ce facette ‘stu sicchio ‘e lóta triestino venuto chiaramente ‘mmezziato ‘e fà vencere ‘a scuatra assineja (satellite) d’’a vecchia zoccola. I ‘o ffacette!

E ffermammoce cca. È gghiuta cumm’è gghiuta e nnun ce penzammo cchiú;  mo  âmm’’a turnà a ppenzà ô campiunato cercanno  ‘e vencerle quante cchiú se ne po’ da cca a mmaggio, accumincianno ggià  da sapato seje quanno a ll’ora d’’a tiella ô san Paolo veneno ‘e pariente ‘e chella zoccola ‘e Giulietta e vvedimmo ca parcheggiano ‘e pulmanne fora e nno  dint’ô terreno ‘e juoco ‘nnante â porta lloro.Accussí sperammo e ssi dDi’ vo’ ve ne parlo dummeneca  ca vène.

Staveti bbe’. R.Bracale Brak