NAPOLI - DINAMO KIEV - [C.L.] (23/11/16) 0 A 0 ‘A VEDETTE ACCUSSÍ

NAPOLI - DINAMO KIEV - [C.L.] (23/11/16) 0 A 0 ‘A VEDETTE ACCUSSÍ E cche saciccio guagliù! N’ atu bbuco ‘int’ a ll’acqua… n’ata delusione! Ajeressera ô san Paolo ‘o Napule nun riuscette a vvencere e nnun ll’abbastajeno nuvantatrè minute pe rriuscì a ssignà ‘na fetenzia ‘e stuco (gol) p’assicurarese tre ppunte ca nce avesseno permiso ‘e passà ‘o turno cu’nu sibbacco (match) ‘e tacaddammo (anticipo)comme, tirennoce ‘e piere ce arricurdaje, pe ttutt’’o tiempo, chillu cestariello ‘e ll’armuillacco (telecronista) ‘e Mediasette. ‘Nzomma pe nnunn’’a tirà a llongo, doppo ‘na mubbara (partita) scarza ‘e sale, zuco e ccunnimma, cu gghiucature musce, spajsate ssenza chèllete (idee) cuncrete, nun se vincette i ‘a Dinamo, jucanno cu ‘o sanco a ll’uocchie, ma senza cercà maje ‘e vencere, se purtaje â casa ‘nu punto ca nun lle serve a ‘nu cacchio, ma ca a nnuje ce ‘o scassaje, visto ca mo pe ppassà ‘o turno e essere primme ce attocca ‘e jì a vvencere a lLisbona, dàtose ca ‘nu pareggio ce mettesse a rriseco ‘e fernì siconne cu ttutte ‘e cunsequenzie d’’o caso! Passammo ê ppaggelle: REINA 5: Restaje a gguardà pe quase tutta ‘a mubbara (partita), ma cunfermaje ‘e attraverzà ‘nu mumento difficultuso quanno ô finale ascette auto e pperdette ‘a palla ‘a mano. HYSAJ 5.5: P’’o primmo ajone (tempo) nun ce fove male, ma po lle mancaje ‘o sciato e sbagliaje troppo ‘int’ê ddoje epate (fasi). ALBIOL 6: Turnaje doppo quase dduje mise e ppure si nun fove ancòra a ll’arriba (top) furnette ‘na bbona atalossa (prestazione) cumannanno a mmestiere ‘a linia d’’a tràsera (difes). KOULIBALY 6: ‘A nurmale atalossa (prestazione) quase matàla (perfetta),’a fora ‘e quanno se facette piglià dâ mecalattunía (esuberanza) abbuscannose ‘nu cartellino jalizzo (giallo)ca ce puteva stà e ‘nu poco cchiú ttarde arresecanno ‘e pigliarsene pure n’ato! GHOULAM 5.5: Pur’isso cumm’ô cumpagno ‘e dritta, passanno ‘o tiempo, se stutaje comme a ‘nu micciariello cunzumato, forze pavanno cu ddemmora (ritardo) ‘a nàcchella (trasferta) ‘nnAffrica cu ‘a nazziunala soja. ZIELINSKI 5: ‘O guaglione pulacco, peccato!, fove ‘a granna délusione d’’a serata.Andivinaje sì e nno ‘nu lanzo urtizzato (verticale) pe lLorenzigno, po sparette annascunnennose. [Dô 78’ ALLAN sv:nun facette quase niente. ] DIAWARA 6- :Facette ‘o duvere suojo ma nun arresecaje quase maje ‘na jucata guappa, Po’ ffà ‘e meglio. HAMSIK 5,5: ce mettette ll'anema custringenno ô purtiere Rudko a ‘nu paro ‘e tacculle (interventi) cumpricate, ma po, venuto meno ‘int’ê ccosce i affaticato nun fove crestiano ‘e carrecarese ‘a scuatra ‘ncuollo… E si nun ‘o ffa jsso, chi ll’à dda fa? CALLEJON 5,5: Dette ‘o mmeglio recuperanno pe ddà na mana â tràsera (difesa) i a ll’armidanno (centrocampo). Ma ‘nnattacco mancaje d’’a pulunessa (brillantezza) d’ati vvote. MERTENS 5.5:Ô pprincio sciupaje ‘nu paro ‘e accasione favurevule po passanno ‘o tiempo, attanagliasto ‘mmiez’â morza d’’e centrale ucraìne appalesaje tutt’’e ddifficultà ssoje ‘a ffà ‘o marcazzo (centravanti). [Da ll’86’ Giaccherini sv.] INSIGNE 4,5: Ô ssolito fove cazzumio, sparacchianno dduje tire scunchiusunate i ad capocchiam e ddimustraje quant’è ffesso e scemo currenno a uocchie nchiuse senza guardà ‘nterra pe vvedé addó metteva ‘e piere, cosicché sciupaje ‘a meglia accasione ca avette piglianno ‘nu pontapere e cadenno a dduje passe dô purtiere Rudko quanno trasette libbero e franco dint’â camma ucraina.Uh! Ca ll’ànn’ ‘accidere e nnun ll’ànn’’a pavà! [Dô 66’ 21 GABBIADINI 5,5:Nunn’è ‘nu marcazzo (centravanti) i ‘o ssape primm’isso però trasette cu ‘o ggenio ‘e fà coccosa e ‘ncap’’e duje minute, pe ddoje vote cercaje ‘a porta; forze Sarri avesse sturià coccosa e sfruttarlo pe cchello ca sape e ppo’ ffà.] All. SARRI 4:Si ‘o Napule nun fove cacchio ‘e vencere ‘a primma respunzabbilità ‘a tenette isso,’nu mutarribbo (allenatore) ca nun se sape ‘mmentà niente e ssona sempe ‘a stessa canzona; è overo ca cu cchellu lignammo ca tene chille so’ ‘e strummole ca po’ ffà, però isso ce mette ‘o ssuojo ustinannose a pruponere sempe ‘a stessa menesta senza aizà ‘a voce cu ‘o presidente e ffarele capí ch’è nicessario arapí ‘o cogliapiecuro, visto ca [aspettanno ca torna sant’Arcadio ca ajere avesse saputo sfruttà chillu tummolo e ‘na sporta ‘e tire ‘e squina (corner)avute] nun putimmo fà a mmeno ‘e ‘nu vero marcazzo (centravanti) auto e dde sustanza capace ‘e fà spazzio ê surece ca tennimmo lla ‘nnante! Fósse nicessario po ca capesse ch’ è ora ‘e cagnà juoco datose oramaje tutte sanno a memmoria chillo d’’o Napule e ssanno ccomme bluccarlo! Arbitro: HATEGAN (Romania) 6 Facette ‘o duvere suojo. E fermammoce cca. E si dDi’ vo’ ce sentimmo marterí ca vene doppo d’’o scontro casalinco ‘ncampiunato cu ‘o Sassuolo, n’ata scuatra ca, essènno assineja (satellite) d’’a vecchia zoccola, certamente lunnerí a ssera vene ô san Paolo a ffà ‘o sibbacco (macht) d’’a vita, ma i’ spero ca ve pozzo cuntà ca ‘o Napule nun à fatto n’ata fessaria! Staveti bbe’. R.Bracale Brak