UDINESE - NAPOLI (19/11/16) 1 A 2 ‘A VEDETTE ACCUSSÍ

UDINESE - NAPOLI (19/11/16) 1 A 2 ‘A VEDETTE ACCUSSÍ ‘Assa fà â Maronna guagliú.... Tutto a pposto! Ajere mmerz’ê sseje ‘o Napule,â faccia ‘e chilli dduje cestarielle ‘e gentile e mmarocchi, ‘ncapo ‘e cinch’anne riuscette a tturnà a vvencere â casa ‘e ll’Udinese e ‘o ffacette cu ‘na pareglia (doppietta) ‘e Lorenzigno ca finalmente, doppo nun saccio quantu tiempo se sbluccaje signanno ‘e pprimme addaffe (reti) soje ‘ncampiunato ca decidetteno ‘a tarra (sfida) d’’o "Friuli" e sse trattaje ‘e na nichemata (vittoria) pulitelica assaje (preziosissima), ca nce permette ‘e mantènere allimmeno duntachirro (inalterato) ll’anfizallo (distacco) dâ vecchia zoccola e ddê ppusizione d’auta crassifica e d’ affruntà cu ‘nu bbuonu arcabbanno (viatico) ‘o sibbacco (match) ‘e Ciampionsa cu ‘a Dinamo ‘e Kievve, senza cuntà ‘a suddisfazzione d’avé mazziato ‘na scuatra scamosa ca si nun è ‘a vecchia zoccola veste pur’essa ‘nu schifo ‘e maglia janca e nnera! Passammo ê ppaggelle: REINA 6 Nunn’êtte ‘a fà miracule, ma fove priciso e dachicco (puntuale) quanno ascette; durante ‘o primmo ajone (primo tempo) dicette ‘e no a zZapatone, facennole annuzzà ‘ncanna ll’addaffa (rete). Peccato ca ô 59’fove cuoveto ‘e surpresa dâ cabbesera (colpo di testa) ‘e Perica ca zumpaje senza cuntrasto e mmettette ‘o pallone fora dâ purtata ‘e Pepe! HYSAJ 6 Cafillo (svagato) e mpriciso durante ‘o primmo ajone (primo tempo) se riscattaje a ll’arrancua (ripresa) quanno fove assaje muttano (propositivo)trovanno spisso ‘o spazzio p’ affunnà ‘ncopp’â curzia ‘e dritta. CHIRICHES 6.5 S’’a vedette ‘e bbello cu zZapata, sfuderanno tavuchitto (tempismo) e ‘sperienza;sustanziuso pure a ll’epata ‘e daimmo (in fase di appoggio) KOULIBALY 7 Granna atalossa (prestazione) d’’o centrale cuano (azzurro) ca fora ‘e quanno nun cuntrastaje a pPerica, fove sempre attiento e ccuncentrato,soprattutto accuttanno (anticipando) e sse facette truvà sempe ô posto justo ô mumento justo. GHOULAM 6 Ati vvote ‘o vedette cchiú spisso attaccà ‘ncopp’â curzia ‘e mancina, ma ajere se dètte da fà a mmestiere ‘int’ a ttutte ‘e ddoje ll’epate (fasi). ALLAN 6 Durante ‘o primmo ajone (primo tempo) nun me piacette, però criscette a ll’arrancua (ripresa) dànno coccosa ‘e cchiú. DIAWARA 6 Quacche prano (errore) ‘o facette a ll’epata ‘e reclaggía (in fase di impostazione), ma fove sempe mumazzo (ottimo) a ll’epata ‘e trancatura (in fase di interdizione) HAMSIK 5,5 A ccurto ‘e sciato e fforze ggià dô primmo minuto nun fove ‘o prutacunista ca, ‘ntribbuna divano, ce fósemo aspettato, e s’accuntentaje ‘e fà ‘nu sibbacco (match) ‘e sacrifiggio addanno (limitando)nummero ‘e jucate e dducusso (raggio) d’azziona. [dô 72′ ZIELINSKI 6 Miso troppo tarde ‘ncampo piazzaje súbbeto ‘nu paro d’’e scatte suoje taglianno ‘o campo e pp’ ‘o riesto fove pulitelico (prezioso) gestiunanno (gestendo) ‘o pussesso palla.] CALLEJON 6.5 Se vedette ‘e cchiú a ll’arrancua (ripresa)quanno addivintaje ‘na spina dint’ ô scianco d’’a trasera (difesa) ‘e ll’udinese e cunfezziunaje ‘na granna jusaida (assist) p’’o primmo stuco (gol) ‘e Lorenzigno ca ringrazziaje! MERTENS 6 D’accordo fove ancòra custretto a gghiucà addó nunn’êsse ‘a jucà naturalmente ma ‘a cegna (grinta) e ll’ ambusciaggio (impegno) nun mancajeno maje e soprattutto a ll’arrancua (nella ripresa)fove assaje priciso e truvaje pure ‘o tiro cchiú ‘e ‘na vota.[da ll’ 88′ EL KADDOURI s.v.] INSIGNE 7.5 Finalmente doppo 45 minute ‘e tutala mubbala (totale apatia), e assaje prane (errori) se sbluccaje e addiventaje ll’ommo-mubbara (uomo-partita) ô pprincipio d’arrancua (ripresa) spaccanno ‘o sibbacco (match) cu ‘na pareglia (doppietta) ‘e stuche (gol) e ppure ddoje granni accasione sprecate.[dô 78′ GIACCHERINI 6 Se sistemaje a mmancina jucanno quinnece minute sustanziuse e mmuttane (propositivi).] All. SARRI 6- Quanno se vence vence pure ‘o mutarribbo (allenatore) e ave raggione isso; cumminfatte ajere liggette bbuono ‘a mubbara (partita) e scigliette bbuono ‘e suoje, ma sbagliaje pe nun avé chiammato cchiú pprimma ‘mpanca a mMarekiaro ca steva a ccurto ‘e sciato e fforze! arb. BANTI 4 ‘O solito sacchetto cu ‘o sciocco ca ajere dimustraje pure d’essere scemo! Grossi ffetenzie nun ce ne facette, ma spisso siscaje ad capocchiam caputianno ‘e carí (falli). Menu male ca nun riuscette a danniggiarce! E ffermammoce cca ringrazzianno ô Cieolo p’’a nicessaria nichemata (vittoria) d’ajeressera. Ve ringrazzio ‘e ll’attenziona e, si dDi’ vo’, ve dongo appuntamento pe ggiovedí ca vene doppo d’’a mubbara (partita) casalinca ‘e Ciampionsa. Ca s’à dda vencere assulutamente! Staveti bbe’. Raffaele Bracale Brak