’A fotografia…

’A fotografia…


Stasera m’è venuta ’a fantasia
’ metterme a scavà dint’ê tirette,
nfra mille fuoglie, lettere e vigliétte…,
senza raggione… quase pe pazzia.

E, scarta e scarta, ’na fotografia
m’ è asciuta sott’ê mmane… e ’e chi m’ ’a dette
me songo arricurdato… cu dispietto
e m’è venuta quase a frennesia

’e farne ciente piezze ’e ’stu ritratto…,
ma po’ ce aggiu penzato e riflettuto
e me so’ dditto: Nonzignore… statte!

Gnorsí nun ce ’sta cchiú, sí t’à traduto,
ma tiene mente quanto era pappona!…
Sciacquate ll’ uocchie e fatte ’na raggione…

Scordate d’ ’a passione…
Si nun è ccarne, è broro… meglio ’e niente,
tanto oramaje… nun ’e ttiene cchiú ’e diente!

Raffaele Bracale
(dal vol. 'E CCOSE D''O PPASSATO ed. Graus Napoli 2006)