NAPULE 'E MO

Napule ’e mo


I

 sera, quanno ’o sole è tramuntato
e ’a luna fa ’a ritrosa e ppo’ accumpare…,
chistu paese mio, si ’o guarde, pare
’nu quatro ’e ’nu pittore, c’ à pigliato

’e cchiú bbelli culure, l’ à ’mpastate
assieme â pelle d’ ’e pperle cchiú rare
e ll’ à stise p’ ’a terra, ’o cielo e ’o mare,
p’ ’e ccase e ’e strate ca se so’ allummate…

Luce ’o tturchino ’ncielo e chianu chiano
se mmesca cu ’o vvelluto d’ ’e ciardine…:
si guarde ’stu paese da luntano

te vene voglia ’e t’ ’o stregnere ’nzino,
d’ ’o cunnuliarle comme a ’nu criaturo
e dirle: Duorme! Nun avé paura!…

II

Ma è quatro ’e luntananza… Da vicino
è tutto n’ ata cosa… Che peccato!
Ah! ’Stu paese, ahimmé, comm’ è cagnato,
comm’è arridotto: bbello e malandrino!

Tutto facciata… po’ è ’nu marranchino!
’Nu galiota e ppeggio è deventato…
accussí tanto e cchiú s’è scuntraffato,
ca a s’accustarse mo ’int’ ’ammuina

nun truove cchiú alleria e cuntentezza,
nun truove passïone e ccore franco,
ma cade – mare a tte! – dint’ a ’na rezza

’e scellerate, ’nfame e ninchi nanco!
Sulo facciata! E ppo’ nun c’ è speranza:
Napule ormaje è quatro ’e luntananza!

III

Me chiagne ’o core… Ma ave raggione
quanno e chi à ditto: Oj ni’ fujtevenne!
Lassate ’stu paese ’a carrettone…

e spatriate… Nun c’è salvazzione
p’ ’e strate ’e ’sta città!… Brutta facenna!,
ma ’o fatto è chistu cca… Mo faje mmarenna
si vuó campà cuieto, ô Casalone…

Mo ’o puó guardà sultanto e chest’ è ’o bbrutto…,
te puó regnere ll’ uocchie e ’a fantasia…,
ma è ttutto falzità senza custrutto:

chistu paese ormaje è ’na buscia
ca pô ’ngannà sultanto ’o furastiero
ca se ll’ ammocca ancora e ca ce crere…

IV

Ma a nnuje nun pô ’ngannarce cchiú oramaje…
Nuje ll’ âmmo cunusciuto ’stu paese,
ca à perzo tutto e sta ’ncopp’ a ’na scesa
ca mena a pricipizzio e ca nun saje

addó te purtarrà craje o piscraje…
Simmo scafate! Ce aimmo fatto ’e spese,
nce âmmo refuso ll’ anema e ’o turnese
e ’ngiro ce à pigliato troppo assaje

pe farce fesse ancora… Avimmo dato
e mmo, mo stammo lése… E comme sia
quanno, guardanno ’stu golfo allummato

ce saglie dint’ a ll’ uocchie ’a pucuntria,
dicimmo: Accorto a tte!… ’Sta cartulina
te percia ’o core, ma po’ t’ arruvina!

Raffaele Bracale
(dal vol. 'E CCOSE D''O PPASSATO ed. Graus Napoli 2006)