'A FESTA 'E SAN GENNARO

’A festa ’e San Gennaro


I

E pure st’ anno – ringrazzianno a Ddio –
nun s’ è ffatto priarse, san Gennaro
e senza fà muttiette e paro e sparo
l’ à fatto ’stu miraculo!… P’ ’a via

mo sa’ che bancarelle ’e mercanzia,
vetrine illuminate… e ’e putecare
starranno ggià a cuntiggià ’e denare
c’ abbuscarranno, ’mmiezo a st’ alleria

ca mo se vedarrà pe chesta strata
ca ggià sta chiena ’e tutta quanta ’a ggente
venuta a se gudé chesti ghiurnate

senza penzà ê penziere, alleramente
cu franfellicche, ammènnole atterrate,
sciu-sciú, nucelle e zzuccaro filato…

II

’A quanno s’ ànno… fatta Piererotta
sultanto chesta festa c’è rimasta…
’O riesto – bbellu mio – pampuglie e craste
menate ’a copp’ abbascio a mezanotte…

Ce âmmo ’arranggià: niente cchiú cape rotte
nè llengue ’e menellicche, nè cuntraste
a bbott’ ’e mazzarielle o ’o tasta-tasta
ca ’e cchiú spuntute, ’mmiez’ ô votta-votta

facevano cu ’e nenne cchiú pappone…
Che vvuó tastià?!… Chesta è ’na festa santa!
Puó ffà ò ’o rattuso ’mmiez’ â prucessione?…

Certo ca no!… Pe cui, mane vacante
e uocchie chine, sfuoche ’e fantasia
magnànnote ’o tturrone ’ngrazzia ’e Ddio!

III

Tu dice: Ma ched’ è ’sta jacuvella?
S’ ammesca ’o Cielo e ’a terra una ’mbrugliata?…
Ma tu che vaje accucchianno?! E t’ ò pregato
ca chesto nc’ è rummaso… sott’ â tiella…

Justo ’sta festa cca… fratu mio bbello!
E nce âmmo ’a scapriccià ’e ’sta jurnata,
avimmo ’a fà chello ca p’ ’o ppassato
’stu popolo faceva: tarantelle

banda, tammorre, musica e casino
treciente juorne a ll’ anne… Che te pare?
Che dice ’o santo?… Embè nun l’ andivine?

E ch’ à da dí?! Se tratta ’e san Gennaro:
E si nun stesse ’ncielo ’mmiez’ ê sante
curresse cca pur’ isso a ffà ’o sciacquante!



IV

E se sentesse, e t’ ’ o dich’ io, cuntento
felice e allero comme a ’nu guaglione
pecché ’stu santo nuosto curazzone
chesto sultanto vo’: stà ’mmiez’ â ggente

’mmiez’ ô popolo suojo… e nun fa niente
si ’a prucessione s’ avota a ccanzone
e dint’ ô Duomo nce scapp’ ’accasione
’e cumbinarte quacche… appuntamento!

Ca isso nce perdona e aiza ’a mano
si no nun se chiammasse san Gennaro,
nun fósse ssanto ’e cca, napulitano

ca s’ accuntenta ’e poco e nun vvo’ ’o rraro.
Ll’ abbasta ’e se sentí vuluto bbene
e ce ricambia, oj bbello, nun s’ ’o ttène!

V

E ce prutegge sempe, sissignore…
ce guarda sempe e porta ’nsalvamiento.
O terramoto, o lava isso è prisente,
mette ’a bbona parola cu ’o Signore

ce fa fà ’e capitune ’na mez’ ora,
ma po’ ce appara e a ll’ urdemu mumento
quanno ce vede perze overamente
s’ affaccia ’a Cielo e ’sta città nun more!

…E pure st’ anno, ’o vvi’, chist’ anno pure
ce à fatto ’a grazzia e ’o sango s’ è squagliato…
e mo chistu paese sta sicuro

ca ’o santo, d’ isso, nun se n’ è scurdato
e ponno assummà guerre e pestilenze
nuje ce salvammo, oj ni’! Isso ce penza!


Raffaele Bracale
(dal vol. 'E CCOSE D''O PPASSATO ed. Graus Napoli 2006)