SO' GGHIUORNE TRISTE...

So’ gghiuorne triste…


I

E che ce pienze a ffà, core ’ngannato?
Cu cchi t’ ’a piglie si tutt’ è fernuto?
’A colpa è sola ’a toja: tu l’ hê vuluto,
si ’mmiezo a ’na via nova t’ à lassato…

Sbàttete ’mpietto e ddí: Aggiu sbagliato…
so’ stato fesso e cchesto n’aggio avuto…
Proprio accussí, tetí, t’îve creduto
d’ essere ancora ô tiempo ’e mamma e tata

e ’e avé a cche ffà ancora cu ’na zita
’e ll’ ebbreca ’e ’na vota… e de stà cuïeto…
E invece, mare a tte, nun hê capito

ca s’ è cagnato tutto ll’ affabbeto
e t’ hê truvato, ’o bbi’…?, tutto ’na vota
scasato comme a dopp’ ô terramoto!…

II

E mmo cu chi t’ ’a piglie?… ’O minuetto
ca te penzave fosse ancora adatto,
a spese toje, ’na bbrutta fine à fatto
e mmo t’ ’a puó chijà sulo a libbretta…


e t’ hê ’a scetà, oj co’, cagnà pruggetto –
t’ ’o ddico a ccore franco, chiatto chiatto –
si nun te vuó truvà curnuto e sfatto
â prossima occasione ca s’ ammette…

’A femmena oramaje è ’na deritta
ca nun vo’ mullechelle e ppane cuotto
e ’o core, si t’ ’o dà, t’ ’o dà in affitto

e si manca ’a sustanza d’ ’o viscuotto,
te molla, te dà ’o sfratto e – chest’ è ’o bbrutto –
nun se ne fotte ’e comme t’ à arredutto!

III

Chiste so’ ’e fatte… Mo vo’ sulo ’o spasso
’na femmena e ’e nient’ ato s’ interessa…
’O sentimento?… Oj co’ quanto sî ffesso!
Ma n’ ’o ccapisce? Ll’ à mannato arrasso

e si parla d’ ammore t’arrepassa
e ’ncopp’ ô bbene nce à cantata ’a messa!
Mo ’a vita è ’nu triato addó è permesso
’mbruglià ’ammore e pazzia, una matassa…

Tu nun me cride?… Nce hê sbattuto ’o musso
e nun t’ arrienne ancora… E falla ’a mossa!
Asciúttete chist’ uocchie russe russe,

ricòrdate ca t’ à cardate ll’ ossa
e ’mmece ’e fà chesta faccia ’e scurisso,
attrézzate e mànnala a subbisso!


IV

E ffa’ comme t’è ffatto! E dda’ ’ncuntante
cu ll’ istessa muneta, alleramente…
senza penzà, senza scrupolo ’e niente!
E nun te ce applicà nemmanco tanto,

ca ’a femmena s’ammereta sultanto
d’ essere ausata, e indifferentemente,
po’ misa ’e parte… Oj co’, tiénela a mmente
chesta lezzione, si nun vuó ca ’o chianto

te percia ancora futo futo dinto
e t’ arriduce, ’o ossa’?…, quann’ è all’ assunto
distrutto comme sî… Fatte cunvinto:

chello ca sto’ cuntanno nun è ccunto,
ma amara verità, ca chi t’ ’o cconta
nc’ è ggià passato e mmo ne porta… ’e pponte!

V

Nce so’ ppassato tale e cquale, oj core
p’ ’a stessa strata… Ll’ aggiu fatta i’ pure…
e m’ è custato e m’ è saputo a dduro
pruvarla ’a delusione d’ ’o sapore

d’ ’e vase date e avute senz’ ammore,
d’ ’e vase scurchigliate ca – t’ ’o ggiuro –
te lassano scuntento… E t’ assicuro
ca nun m’ ’o sso’ scurdato ’a tanno!… E ll’ ore

passate assieme a cchi, si tu me crire,
nun te cunzola, te lassano ’amaro
dinto a ll’ anema, oj co’…, tuosseco niro…

e si te vuó salvà, ’o fatto è cchiaro,
nun ce sta niente ’a fà… nun è mistero:
t’ hê ’a scurdà ’o bbene e t’ hê ’a piglià ’o piacere!

VI

E mmanco quanno vuó… ’A storia è cchesta
e ormaje pe nnuje songo jurnate triste
e ’a femmena, tie’ cca, è n’ egoista
ch’ è ffatta a ffatte suje, e pure onesta

è pronta a farse ’e cunte lesta lesta:
tanto pe tanto… E comme ô farmacista
pesa ’ncopp’ â valanza e tene a bbista
chello ca t’ à da dà: se chiajete ’o riesto

e nun se sbaglia, sa’… e dice: Basta!
quanno ca ’ncapa a essa ’o piso è gghiusto…
E aje voglia ’e fà: se joca ’e ccarte e arrasta.

Proprio ô mumento ca tu pruove gusto
essa te ’nchiomma llà: muccio te costa
ma, si à deciso, oj co’, nisciuno ’a sposta!

VII

Pirciò che pienze a ffà? Che te rizziele?
Ce vuó cadé malato?… E a che te vale?
’O bbene, ’o sentimento è gghiuto a mmale
e è inutile magnarse pane e ffèle!

Rassígnate e pígliate pe mmèle
chell’ora ca puó avé… Te sape ’e sale
chestu pparlà d’ ’o mio? Che te ne cale!
Si s’ è cagnato ’o munno e si ’o vvo’ ’o cielo

tu comme ll’ adderizze?… È ’na parola!
È tiempo perzo: cumbatte tu sulo
e nun ’a vince: scanze ’na tagliola

ma puó ’ncappà ’int’ a n’ ata e comme a mmiulo
faje ’o zerrizzere, nce cunzume ’o pile,
ma – a cunte fatte – oj co’, chest’ è ’a trafila!

VIII

Dunque stamme a sentí e vienetenne
a cchello ca i’ te dico: i’ nun te ’nganno…
Te voglio bbene oj core e sto’ parlanno
comme parlasse a mme… E si me ’ntienne

te puó capacità ca i’ sto’ dicenno
’a verità e nient’ ato… pirciò quanno
tu t’ accurgisse ’e starte ’nnammuranno,
ogge o dimane, di’: Che sto’ facenno?…

Addó vaco cu ’o ciuccio?… Se va a ffunno
pe chesta strata cca e nun ce ponno
né llacreme o minacce… Chist’ è ’o munno!

Pirciò, me’ jammo, scétate d’ ’o suonno:
miettete a pparo o nce arrefunne ’e ppenne
e ffatte, oj co’, capace: ammore è vrenna!

Raffaele Bracale
(dal vol. 'E CCOSE D''O PPASSATO ed. Graus Napoli 2006)