ANTICA MMEDICINA POPOLARE NAPULITANA

REMMEDIE P’’E MALE
zoè a ddicere:
ANTICA MMEDICINA POPOLARE NAPULITANA
*Contro â ròsula (ggelune).
‘Nfunniteve ‘a ròsula bbuono bbuono cu ‘a piscia cavera ‘e ‘nu criaturo ‘e sette mise primma ‘e ve mettere dinto ô lietto. Facitelo pe quatto o ccinche sere ‘e sèguito, e ve faccio avvedé ca ‘a ròsula ve passarrà!

Pe sanà ‘a ròsula fa pure bbene ‘nu cataplasemo ‘e malva cotta, o ‘e sarvia, o puramente d'aglio pestato, o ‘e mele cotte, ‘e fravole mature o ‘e farina ‘e cicere. Se po’ pure auntarla (ungerla) cu ‘nu poco ‘e ‘nzogna ‘e panza ‘e ‘nu puorco masculo:ce se prova assaje rifriggerio.
*
Si po ve vulite fà passà chellu rrusso ca dà tanto turmiento specialmente ê criature, ‘a sera prmima ’e ve cuccà, mettite a scarfà ‘nu poco d'acqua, e ppo mettitece ‘e piede a mmòllo pe ‘na dicina ‘e minute.
Vedarrite che mmana santa!

*Contro ô male ‘e rine.
Accattate ‘nu sordo o duje ‘e lardo ‘e panza ‘e ‘nu puorco masculo, strufinàtavillo bbuono bbuono ‘ncopp’ â parte che vve dôle, e vedarritete ca doppo ‘nu poco ‘e tiempo ve sentarrite arrefriscate(risollevati).
Naturalmente, v’avite ‘a cummiglià ‘e rine cu 'na pezza ‘e lana scarfata cu ‘o fierro pe stirà.


*Contro ê puórre.
Pe levasse ‘o ‘mpiccio d’’e puórre nun ce vo’ niente.
Ghiate a dd’’o chianchiere e accattate ‘nu bbellu piezzo ‘e cotena ‘e curazza (cotica di groppa) ‘e puorco masculo, e strufinàteve bbuono bbuono tutte ‘e puórre ca tenite p’’o cuorpo e p’’a faccia. Fatta 'sta funzione pigliate chella stessa mmedesema cotena e ghiàtela a ghittà a ‘nu sito addó, doppo ca ce ll’avite jettata nun ce avite ‘a passà cchiú pe tutto ‘o tiempo d’’a vita vosta; pecché si, puta caso, ce passate, ‘e puórre ve tornano a vení e nun ve passarranno cchiú.Quanno po’ chella cótena medesema ca v'è sservuta se sarà tutta quanta seccata, allora ‘e puórre ca tenite se ne càdenono ‘a ppe lloro.
*
Si no,putite fà n’ata cosa: strufinàteve ‘ncopp’ ê puórre ‘nu cicero o ‘nu fasulo, ca però ànn’’a essere arrubbate ca si no nun vale; e ppo menate ‘o cicero o ‘o fasulo dint’ ô cesso e menate ll’acqua!
*
Ce sta pure chi l’attacca cu ‘nu capuzziello ‘e filo ‘e seta culor russo cardinale(è ‘mpurtante assaje ‘o culore!) ‘nsino a cche nun le se seccano e ppo le càdono a ppe lloro.
*
N’ atu remmedio pe ffà sparí ‘e puórre è chillo ‘e ‘nfonnerle pe ddoje o tre vvote cu chillu sango ‘e quanno ‘na femmena tène ‘e ccose soje
*
O puramente accattàte ‘nu mazzetto p’’o broro e strufinatavillo bbuono buono ‘ncopp’ ê puórre pe paricchi vvote e ppe ddiverzi juorne.
Quanno ve site servuto ‘e chillu mazzetto, mettitelo a seccarlo ô sóle. ‘Na vota seccato ‘o mazzetto, pure ‘e puórre se séccano e se ne càdono!

* Contro l'aridropisia.(idropisia)
Faciteve dà da ‘o sempricista(erborista medicinale) chella ràdica (ca mo nun saccio ccome se chiamma a llengua nosta) ca tène ll'uocchie, ‘o naso, ‘a vocca, ‘e bbraccia e ‘e gamme comme a ‘nu crestiano (1) , facítela vollere dinto a ‘na tianella ‘e terraglia, chiena d'acqua, e bbevitavella pe 'na ventina ‘e juorne, â matina a ddiune e ve passa tutto cosa!
(1). - La pianta che à la radice a forma umana è la Mandragola.
(nota originale coeva (1750))

*Contro ê ’nturzamiente (gonfiori),contro ê bbotte(colpi) e contro ê fferite.
‘Nfromme ‘na persona ave zoè s’abbusca ‘na mazzata,o ‘nu punio o pure ‘na ferita, llà ppe llà le farrà súbbeto bbene si nce mette paricchia chiara d’uovo sbattuta cu ‘nu pizzeco ‘e sale o puramente ‘nu poco ‘e farina ‘e posema fatta a ‘nchiasto, o ‘nu poco ‘e ‘nzogna ‘e panza ‘e ‘nu puorco masculo stesa ‘ncopp’ a ‘nu piezzo ‘e carta straccia.
*
N’ ata mano santa è metterce ‘nu poco ‘e chella ‘nguenta gialla, naturale, ca sta dint’ ê rrecchie, o pure ‘nu ‘nchiastillo fatto cu ‘a porvere pe sparà e ‘na presa d’ànnese.
Anze ve dico ca nun ce sta nisciuno remmedio meglio ‘e ‘stu gnastillo lloco pe sanà ‘a fora ê ‘nturzamiente, bbotte e ferite, pure ‘e sfoghe ‘e pelle e tanti ati malanne! Nun se trova niente ‘e meglio!



* Pe stagnà ‘o sango ch'esce p’’o naso.
Ce stanno ‘nu sacco ‘e remmedie: uno meglio ‘e ll’ato.
1) Se fa ‘na croce cu ddoje mazzarelle e se mette ‘ncapo â persona ca lle jesce ‘o sango da ‘o naso.

2) Cu ‘a féde d’’a mugliera o cu chella d’’o marito o pure d’’a cummara o d’’o cumparo se ségna ‘na croce ‘ncapa a chillo o a cchella ca lle cola ‘o sango p’’o naso.

3) Se fa mettere ‘a persona ca tene ‘o sango ca lle scorre da ‘o naso, ‘ncopp’ ê pponte d’’e piede, e à dda starse ccu ‘e ddoje mane aizate tese cchiú ca se po’ ‘nfacci’ ô muro, ‘nsino a ttanto ca nun se ferma ‘o sango.

4) Cierte vote ‘o sango se stagna aizanno ‘e ddoje bbraccia.
Presempio: si ‘o sango ve cola p’’a fròcia dritta s'aiza ‘o vraccio dritto; s'invece ve cóla da ‘a fròcia mancina allora aizate ‘o vraccio mancino.

5) Fa pure bbene a chi le cóla ‘o sango a vuttarle all’intrasatta ‘nu poco dd'acqua gelata addereto ô cuollo.
Chella ‘mmpressione nce ‘o stagna llà ppe llà.


*Contro la ‘moraggía moroidale.
Beviteve l’acqua vulluta cu ‘e ràdeche d'ellera e ‘nu cucchiarino ‘e mèle.Stateve però attiente a prucurarve chelli ràdeche ca cresceno dinto ê mmura; pecché si fósseno ‘e chelle ca nàsceno ‘mmiezo ê tterre, nun ve faciarriano ‘o riesto ‘e niente!


* ’Na cura pe farse sicche.
S'accummencia a bevere â matina, a ddiuno, ‘nu dito d'acito, ma ‘e chellu fforte; po a mmano a mmano,’mmece ‘e ‘nu dito, ddoje dete, po miezu bicchiere, e si uno ce ‘a fa , pure ‘nu bicchiere sano. Ma s’à dda jí chianu chianillo, pecché cchi fa 'sta cura si nun se sta attiento po’ farse accussí ssicco ca terque quaterque nce po’
rummanerce adderittura!



raffaele bracale
(da un testo anonimo di fine 1700 ripreso anche dal poeta romano GIGI ZANAZZO.)