sabato 16 aprile 2011

‘O RUOTO Ô FURNO

‘O RUOTO Ô FURNO
Chesta ricetta a Nnapule ‘o chiammammo " ‘o ruoto ô furno" (pecché s’appronta dinto a ‘na cummedità tonna (si fa in una teglia tonda)); pe pripararla se po’ ausà qualunque tipo ‘e carne, pure ammiscata: spezzato d’annecchia, spezzato ‘e puorco, sacicce)... ma cu ‘o crapetto o cu ‘o piecuro, che v’aggio ‘a dicere?..., tène tutto n’atu sapore e uno s’allicca pure ‘e ddete...e tant’è vero ca ‘sta ricetta è mmeglia cu ‘o crapetto o cu ‘o corachiatta( agnello laticauda) anticamente ‘sta ricetta era chiamata nun sulo ‘o ruoto ô furno, ma pure, (comme a dinto â canzone POPOLO, PÒ ‘e Ernesto Murolo e Ernesto Tagliaferri) ‘o quarticiello cu ‘e ppatane e a Nnapule, se sape ca ‘o quarticiello è ‘o miezu crapetto o ‘o miezupiecuro cuotto ô furno! Jammo annante

Chello ca serve pe sseje perzone

‘Nu kilò e mmiezo ‘e carne ‘e crapetto,
‘nu kilò ‘e patane vecchie ammunnate, lavate e tagliate a farinule (cubi),
Ddoje vecchie cepolle rusate ammunnate, lavate e tagliate fine fine,
Ciento gramme ‘e pesielle nuvielle,frische o surgelate,
‘Na buatta ‘e ‘nu kilò ‘e pummarole pelate,
cinquanta gramme ‘e ‘e pecorino ‘rattato,
‘Nu bicchiere d’ uoglio ‘auliva straverggine primma spremmetura a ffriddo,
2 cucchiare ‘e ‘nzogna,
sale fino ‘nu cucchiaro e mmiezo,
pepe niro macenato a ffrisco quanto ve ne piace.

Comme se fa :

Pigliate ‘a carne, sciacquatela cu acqua fredda currente e e mettitela a bbagno pe mez’ora dinto a ‘na zuppiera cu acqua e ‘nu cucchiaro ‘e sale fino,sgrunnatela e mettitela dinto a ‘nu ruoto prupurziunato. Aunitece ‘e patane tagliate a farinule , ‘e cepolle tagliate fine fine‘a buatta ‘e pummarole pelate,’e pesielle e ‘a ‘nzogna e rignite quase pe mmità o ruoto cu acqua cauda, aunite ll’uoglio, regulate ‘e sale e ppepe, aunite ‘o ppecorino e ‘nfurnate a 180° pe quase n’ora.Cuntrullate ‘a cuttura ca si ‘o ruoto s’êsse’a asciuttà troppo aunite n’ a’ ppoco d’acqua cauda. ffine cuttura assicurateve ca ‘o zuco ‘e ‘sta ricetta risultasse abbunnante pecché doppo d’avé sistimate ‘e piezze ‘e carne dint’ô piatto ‘e purtata, cupierte cu tantu zuco, cu chello ca avanza se ponno cunní seicente gramme ‘e vermicellune o ‘e pirciatielle chine ‘e pecurino e ppepe e songo accussí sapurite ca doppo ca ve ll’avite magnate v’âte a fforza fà ‘a scarpetta!
Vini: Curpuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na caraffa p’ ‘e ffà piglià aria e servute a ttiempo (temperatura) ‘e stanza ‘a magnà.
Mangia Napoli, bbona salute! Scialàteve e aggarbbatéve ‘o vernecale!
raffaele bracale

Nessun commento: