DON CICCILLE ‘NCRUVATTATE SAFRUNATE

DON CICCILLE ‘NCRUVATTATE SAFRUNATE

chello ca serve pe sseje perzone
600 gramme ‘e don ciccille ‘ncruvattate,
300 gramme ‘e ricotta rumana,
150 gramme ‘e pancetta affemmecata tagliata a varriglie (cm. 5 pe 2 pe 1),
2 bustine ‘e safrone,
‘nu bicchiere d’uoglio dunciglio,
‘na cepolla ndurata ‘e Muntoro ammunnata e ntretata fina fina,
sale duppio ‘na vrancata
sale fino e ppepe niro mmacenato a ffrisco q.n.s.

comme se fa:


Dinto a ‘na prupurziunata tiella a sponne aute ricà ll’uoglio e a ffuoco allero fà piglià culore ô ttrigliato ‘e cepolla; agnadirve ‘e varriglie ‘e pancetta affummecata e farle suassà pe cinche minute. Àrvere teniente teniente ‘e don ciccille ‘ncruvattate dinto a ‘na caurara cu abbunnante acqua vullente salata (vrancata ‘e sale duppio) e, ‘na vota sculate, revacarle dint’â tiella ammiscannole a mmestiere pe farle ‘nzapurí a ffuoco miccio; e ssempe a ffuoco miccio agnadí ‘a ricotta dellajata cu ‘nu cuppeniello d’acqua ‘e cuttura d’ ‘a pasta e cu ‘e ddoje bustine ‘e safrone;ammiscà e ‘mpiattà cumpletanno ‘e piatte cu abbunnante pepe niro mmacenato a ffrisco.Serví caude ‘e fuculare. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute!
Scialàteve e cunzulàteve ‘o vernecale!
Raffaele Bracale