giovedì 22 marzo 2012

NAPOLI – SIENA (coppa Italia 21/03/12) 2 A 0

NAPOLI – SIENA (coppa Italia 21/03/12) 2 A 0
LL’AGGIU VISTA ACCUSSÍ
È ffatta guagliú; doppo quinnece anne ‘o Napule riuscette a arrivà ‘nfinale ‘e Coppa Italia e mmo ê vinte ‘e maggio ll’aspetta a ll’Ulimpico ‘e Roma ‘a rubbentus(sa) ‘e chillu nnacchennello ‘e Del Piero ca à ditto ca vo’ vencere tutto cosa: Coppa e Campiunato, ma i’ penzo ca ô cchiú ô cchiú se po’ zucà ‘nu franfellicco, visto ca p’ ‘o campiunato ce penza ‘o Milan(no) a farcelo annuzzà ‘ncanna e p’ ‘a Coppa nce penzano ‘e guagliune cuane, ca ajere ssera fujeno acàbate (perfetti),e pure si cu a lengua ‘a fora, a ccurto ‘e sciato, cu ‘nu siconno tiempo ‘e sufferenza rimuntajeno ‘o risultato ‘e ll’annata, vattenno pe ddoje a zzero ‘o Siena dint’â rencontra ‘e ritorno d’ ‘a semifinale ‘e Coppa Italia. ‘A pratica Siena ajeressera ‘e cuane ‘a risulvettero súbbeto ô primmo tiempo pe ddoje granne jucate ‘e Cavani ca ‘mprimmese cu ‘nu córpo ‘e tacco custringnette a Vergassola a ffà n’autorredda (autogol) e ppo poco doppo cumpletaje ll’opera cu ‘na precissa capata chiudenno n’azziona ca mustraje a ll’opera ‘e tre tenure.È overo ca po ô siconno tiempo ‘a scuatra jette ‘nsufferenza e fuje custretta a ggestí (amministrare) ‘o vantaggio, ma nun ghiette maje dint’ê chiavette. Comme jette e comme venette ‘o ‘mpurtante era arrivà ‘nfinale e ‘e guagliune ce riuscetteno. E cchesto conta!
DE SANCTIS 5,5 Raramente ‘mpignato se facette sempe truvà attiento quanno servette; ma s’à dda ‘mparà a puggià (rilanciare) senza sbaglià!
CANNAVARO 6 Ll’attacco d’’o Siena ajeressera fuje overo poca cosa e ‘o capitano nun avette particulare prubbleme (‘a fora ‘e ‘na capata ‘mmocca ca ‘o rumpette a ssanco). CAMPAGNARO 6,5 Stesso discorzo p’ ‘o cumpagno ‘e reparto cu ‘nu pellizzo (pizzico) ‘e qualità ‘e cchiú.
ARONICA 6 Tenette sotto cuntrollo cu granna attenziona ògne pussibbile situazzione periculosa.
INLER 6,5 Fuje ‘o mastanguanguero (leader) d’ ‘o centrocampo. Sfresaje (sfiorò) ‘a rredda cu ‘na cagliosa a vvolo ca però ‘o purtiere riuscette a respingere
GARGANO 5,5 Quacche jerro ‘e troppo ca cu ‘na scuatra meglia d’ ‘o Siena êsse pututo custà caro. S’abbuscaje pure ‘ngiustamente ‘nu cartellino jalizzo e scunfiato (diffidato) mo è custretto a zzumpà ‘a finale.Peccato! ( dô 62° DZEMAILI s.v.)
MAGGIO 6 Iellato, pure ‘sta vota fuje costretto a ascirsene primma d’ ‘o tiempo. Sperammo ca se putesse ricuperà ambressa!. (dô 40° DOSSENA 4,5 Purtroppo chesta è ‘a zita e se chiamma Sabbella; chisto tenimmo e ‘ncaso ca mancano o Maggio o Zuniga nun tenimmo a chi mettere; è ‘na sufferenza vederlo jucà! Nun serve proprio!).
ZUNIGA 6+ Jucaje cu cchiú cunvinzione d’ati vvote e cu tanta qualità; fuje pure prutagunista ‘e quacche ‘mpurtante ricupero.
LAVEZZI 6 Nun sta all’arriba.Me parette ‘nu poco stanco e senza ggenio, ma, cu ttutto ca ‘o vattettero comme pigliava ‘a palla, quacche vvota riuscette a ffà saglí ‘a scuatra. Ascette ‘nfra ll’applavuse d’ ‘o pubblico.Sperammo ca dummeneca torna a essere isso! (da ll’ 81° PANDEV s.v.)
CAVANI 7.5 Fuje isso ca decidette ‘a rencontra cu ddoje jucate a mmestiere e ‘a veru campione. Sempe periculoso, sfresaje (sfiorò) ‘a rredda cchiú ‘e ‘na vota.Sperammo ca se nn’è astipate ‘nu paro p’’e vinte ‘e maggio!
HAMSIK 6,5 Ll’ajuda (l’ assist) pe Cavani ô mumento d’ ‘a siconna rredda fuje rrobba d’univerzità d’ ‘o pallone. Fonnamentale p’ ‘e manovre uffenzive.

MAZZARRI 6 ‘e stima p’avé purtato ‘a scuatra ‘nfinale, ma ‘a Coppa s’ à dda vencere!
ll’arbitro VALERI 4 ‘Nu guajo eterno ll’arbitraggio ‘e ‘stu libbero prufessiunista (‘e che nun se sape...) rumano ca siscaje sempe, pe partito pigliato, contro ô Napule caputianno ‘e ffalte (i falli) e permettenno ê delinquente tuscane ‘e chiavà mazzate ‘a cecate specie ‘ncuollo ô Pocho; ce facette ‘o rialo ‘e ammuní ‘ngiustamente a Gargano ca scunfiato (diffidato) mo è custretto a zzumpà ‘a finale cu ‘a rubbentus(sa).
E fermammoce cca. Si dDi’ vo’ ce sentimmo lunnerí ca vene e sperammo ca dummeneca cu ll’ora lecale e cu ‘o Napule ca torna a gghiucà ê ttre ce purtasse bbuono.Staveti bbe’
R.Bracale Brak

Nessun commento: