BOURNEMOUTH- NAPOLI (am.le 06.08.17) 2 A 2

 BOURNEMOUTH- NAPOLI (am.le 06.08.17) 2 A 2

E cche saciccio guagliú! I’ sto’ avveluto; cca s’à dda vedé che s’à dda fà pecché si no, pure ‘sta tempurata (stagione) chillu cacchio ‘e scutetto janco russo e vverde ‘o vedimmo cu ‘o bbinocolo. Aggio paura ca ‘o Napule tene ‘ncuollo ‘na mala jastemma menata e dDela s’à dda dicidere a ppurtà jucature, mutarribbo (allenatore) mierece e ttutt’’o riesto d’’a cuncreca ‘mparanza a pPumpeje, a mMuntevergene o a ddâ Maronna ‘e ll’Arco..., e ll’à dda fà assulutamente bbenericere da quacche mmonaco amico suojo, speranno ca ‘e llibera dê  ssettenzie (maledizioni) ca se portano ‘ncuollo! E ggià pecché sulo ‘e ‘na mala jastemma se trattaje si ajeressera  si ‘o Napule nun riuscette a ffà soja ‘a guadí (l’amichevole) cu ‘e ‘ngrese  d’’o  Bournemouth(e) e   s’êtte accuntentà ‘e ‘nu russimmo (pareggio) scamuso pe ddoje a ddoje afferrato p’’e capille a ll’84’ cu ‘na scicca lacuta (colpo) ‘e bbigliardo ca mettette ‘a palla dinto a ll’angulillo ‘e mancina, addó ‘o Napule  se fósse mmeretato e vencere e ppure largo ggià durante ô primmo ajone! ‘Mmece ‘nu poco pecché ‘o purtiere lloro fove cacchio ‘e dicere no a ttutte ‘e tentative, ‘nu poco pecché ‘e nuoste nun foveno pricise ‘o primmo ajone fenette ‘ncopp’a ll’uno a zzero pe nnuje cu ll’addaffa (rete) ‘e Ciruzzo ca ô 30’ finalmente  riuscette a mmettere ‘mporta ‘nu tiro ‘e Lorenzigno doppo ‘nu bbassurero (suggerimento) ‘e Peppe ‘a ‘nguenta.  Peccato ca po ô 52’  Afobi, appustiato ‘ncopp’â linia ‘e porta  apprufittaje ‘e ‘na meza fessaria d’ Hysaj [ca deviaje ad capocchiam ‘na palla ca nun era periculosa] e cce futtette mettenno dinto ll’addaffa (rete) ‘e ll’uno a uno. Piezzo e ppejo ô 75’ quanno Francis(se) apprimma stennette ‘nterra a zZielinski,senza ca chella mmunnezza ‘e ll’arbitro ‘ngrese Stewart Atwell(e)[2 e ppo ve dico]siscasse e gghiette a ccastigà ‘o Prevetariello, trasuto ô posto ‘e Reina, ca nun ce putette fà niente. ‘Na vota avutato ‘o Vangelo fovemo custrette a ccorrere appriesso â natiggia (risultato) e ccomme v’aggiu ditto Sarri êtte ringrazzià a  zZielinski pe cchillu capolavoro suojo a ll’84’. Cunchiudenno  dicimmo ca ‘o  Napule se fósse mmeretato ‘e vencere e ca ‘o russimmo (pareggio) lle sta astritto; ora mo però a ddiece juorne dâ tarra (sfida) cu ‘o Nizza, Sarri êsse ‘a fà ‘e bbuche ‘ncapa ê suoje pe ffarle capí ca sí ‘a scuatra e ‘o juoco so’ bbelle, ma  sottoporta nosta o lloro nun s’à dda sbaglià tanto o si no se chiagne! Passammo ê ppaggelle:

REINA 6  Durante ô primmo ajone (tempo) nun êtte ‘a fà niente; ‘o russimmo (pareggio) d’Afobi nun fove itimma (colpa) soja, ma ‘e Ghoulam(me) ca s’’o perdette! [Dô 71′ RAFAEL(‘o Prevetariello) 6  Facette ‘o duvere suojo i ‘a seconna addaffa (rete) ‘ngrese nun dipennette da ‘nu prano (errore) suojo, ma da chillo ‘e ll’arbitro ‘ngrese!]

GHOULAM 5 – Granna corza ‘ncopp’â curzia p’appressurà  (spingere), ma poca attenziona arreto addó ô 52’ se perdette  Afobe, libbero ‘e mettere dinto ll’ uno a uno.

[Da ll’82’ DIAWARA  6 Se dette da fà]

ALBIOL[‘O Masto] 6  Cumannaje ‘a sezziona (reparto) comme sap’isso; sulo ‘nu paro ‘e sfregazze (sbavature), ma senza cunsequenzie. [Da ll’82’ MAKSIMOVIC sv]

KOULIBALY 6  Granna ‘ntesa cu ‘o Masto;’na chietta (coppia) ch’è ‘na caranzia!

[Dal 71′ Chiriches 6 Facette ‘o ssuojo]

HYSAJ 5,5  Miezu zifo (voto) mancante pecché è sfurtunato e ‘na scuatra ca vo’ arrivà ô scutetto nun s’’o po’ permettere a uno ca doppo ‘nu bbuonu primmo ajone (tempo), ‘int’ô mumento difficile sbaglia ‘na deviazzione ‘e ‘na palla ca nunn’ è  ppericulosa.

ALLAN[‘O ‘Ncrifato] 6  Nun mullaje maje, secutanno ll’avverzarie e azzannannole ê feliette pe rricuperà ‘na cifra ‘e pallune, dimustrannose funnamentale pe ll’armidanno (centrocampo).

     [Dô 61′ ROG [‘A Bbelva] 6- Appena trasuto sfresaje (sfiorò) ‘o stuco (gol), nun mullaje maje facennose rispettà addó capitaje capitaje; ‘e cchiú fove isso a ddà a zZielinski ‘o pallone d’’o doje a ddoje!]

JORGINHO 6 - Sempe a ccentro d’’o juoco nuosto, se facette nutà pure quanno nun tenettemo palla senza sufferí cchiú dde tanto ‘a pressiona  (pressing) ‘ngrese. [Da ll’82’ DIAWARA 6 Pe ppoco, ma dette ‘na mana.]

HAMSIK[Marekiaro] 6.5  Quase tutte ll’ azzione ‘mpurtante passajeno p’’e pere suoje; peccato ca nun riesce ancòra a ttruvà ‘a porta!. [Dô 70’ ZIELINSKI 7: miezu zifo (voto) ‘e cchiú pecché è overo ca  ‘nnaccasione d’’o doje a uno perdette  palla, però stiso ‘nterra  daFrancis(se) senza ca ll’arbitro siscasse,ma a ll’84’ se vennicaje mettenno dinto cu ‘na scicca lacuta (colpo) ‘e bbigliardo ‘a palla ca ce dette ‘o russimmo (pareggio)!]

CALLEJON [Peppe ‘a ‘nguenta] 6.5  Sfresaje (sfiorò) quase subbeto ll’addaffa (rete)cu ‘nu pabbuluso(delizioso) pallunetto ‘e tacco e pp’’o riesto cupuliaje (dialogò) a mmestiere cu ‘e cumpagne ‘e sezziona (reparto) senza scurdarse ‘e dà ‘na mana pure arreto. [Dô 78’ GIACCHERINI s.v.]

MERTENS [Ciruzzo] 6.5  Arruffone e ppoco priciso pe cquase tutto ô primmo ajone (tempo), finalmente ô 30’ riuscette a mmetterse ‘ncopp’â trajettoria ‘e ‘nu tiro ‘e Lorenzigno deviannolo ‘mporta; a ll’arrancua (secondo tempo) cercaje ‘a mudajafa (raddoppio) ma ce jette sulo vicino; êsse avut’’a essere meno cazzu-mio(egoista). [Dô 70’ Milik: 6 ‘E stima, pecché ‘e cumpagne nunn’’o vedetteno e nnun lle detteno maje palla.]

INSIGNE[Lorenzigno] 6 Sprecone,  ‘miegnaje sí tutt’’e dduje ‘e purtiere ‘ngrese, ma sempe cu cchilli tire a ggiro ca nun servetteno a nniente; ‘e bbuono chillu tiro deritto ca Ciruzzo mettette ‘mporta i ‘o fatto ca se trova a uocchie nchiuse cu pPeppe ‘a ‘nguenta. [Da ll’87’, PAVOLETTi: s.v.]

All. SARRI  6 ‘a scuatra ce sta e sse muvette bbona, ma – comme v’aggiu ditto – à dda fà capí a ttutte ca   sottoporta nosta o lloro nun s’à dda sbaglià tanto o si no se chiagne!

arbitro: STEWART ATWELL [Inghilterra] 2 Nun sulo partiggiaje chiaramente  p’’e suoje comme ô 75’ ‘nnaccasione d’’o doje a uno pe lloro, ma dimustraje pure d’essere scemo ô 90’  quanno apprimma assignaje tre mminute ‘e ricupero e ppo [appaurato ca ‘o Napule êsse pututo vencere] ‘ncapo ‘e duje siconne siscaje ‘o prazzo (la fine)!

E ffermammoce cca. E, si dDi’ vo’, ve donco  ll’ appuntamento a viernarí ca vene doppo ‘o guadí (amichevole) ‘e ggioverí  a ssera ô san Paolo  contro ll’Espanyol e sperammo ‘e vencere!

Staveti bbe’! R.Bracale Brak