|
PASTOTTO CU ‘E SSACICCE chello ca ce vo’ pe sseje perzone 600 gramme ‘e avemmarie (tubbettielle rigate), 4 cape ‘e sacicce fresche, ‘na cepolla ndurata ‘e Muntoro ammunnata e ntretata suttile, 50 gramme ‘e funge sicche, ‘na farinula pe bbroro veggetale, ‘nu bicchiere ‘e vino janco asciutto, 50 gramme ‘e ‘nzogna, miezu bicchiere d’uoglio ‘auliva dunciglio, ddoje bustine ‘e safrone, sale duppio ‘na vrancata, pepe janco macenato a ffrisco q.n.s. ‘nu puparunciello percante (piccante)lavato, asciuttato e grabbato (inciso) p’ ‘o lluongo, 100 gramme ‘e pecurino rattato finu fino. ‘nu túppeto ‘e prutusino lavato, asciuttato e ntretato finu fino.
|
|
comme se fa
Mez'ora primma d’accumincià ‘a cuttura mettere ‘e funge sicche a bbagno dinto a ‘nu tazzone d’acqua cauda;spellà ‘e sacicce e spullecarle. Mettere a ffuco allero ‘na prupurziunata cazzarola e ffà piglià calore â ‘nzogna, â ll’uoglio e ô puparunciello percante lavato, asciuttato e grabbato (inciso) p’ ‘o lluongo; agnadirve ‘a cepolla ndurata ‘e Muntoro ammunnata e ntretata suttile e appena s’è ffatta jonna auní ‘e sacicce spullecate, ‘e funge spremmute e asciuttate e ‘o bicchiere ‘e vino; avascià ‘o ffuoco e fà cocere pe ‘nu quarto d’ora. Fraditanto cu dduje litre d’acqua vullente e ‘a farinula appruntà ‘o bbroro, accumpliarve ‘e ddoje bustine ‘e safrone, metterlo a ffuoco allero e appena ‘o bbroro jesce a vvollere, arvere a meza cuttura ll’avemmarie e revacarle dinto â cazzarola cu ‘a cunnimma e lla a ffuoco miccio cumpletà ‘a cuttura agnadenno poco â vota tutt’ ‘o bbroro ca à dda essere assurbito tuttu quanto.A ffenetura ‘e cuttura derrammà ‘ncopp’ô pastotto tutt’ ‘o ccaso,tuiglià ‘nu poco, stutà ‘o ffuoco, misturà pe quacche mminuto, derrammà cu ‘nu túppeto ‘e prutusino lavato, asciuttato e ntretato finu fino, ‘mpiattà cumpletanno ‘e purzione cu abbunnante pepe janco mmacenato a ffrisco. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale
|
|
|
|
|
|
|
|
|
|
|
|
|
Nessun commento:
Posta un commento