VERMICELLUNE ‘E ‘NTERR’A LL'ARENA

VERMICELLUNE ‘E ‘NTERR’A LL'ARENA

 

chello ca serve pe sseje perzone

 

600 gramme ‘e vermicellune,

400 gramme ‘e tunno sott’uoglio,

 ‘nu bicchiere e miezo  d’uoglio  ‘auliva dunciglio,

dduje spicule d’aglio ammunnate e ntretate,

100 gramme d’aulive nere desciussate e ntretate,

100 gramme ‘e chiapparielle sotto sale sciacquate e asciuttate,

100 gramme ‘e sulumiglie d’alice salate sott’uoglio,

 ‘nu cerasiello  percante (piccante)lavato, asciuttato e grabbato (inciso) p’ ‘o lluongo,

100 gramme ‘e pane ‘rattato arruscato ô tiesto,

‘nu tuppeto ‘e prutusino lavato asciuttato e ntretato finu fino,

sale duppio ‘na vrancata,

sale fino e ppepe janco macenato a ffrisco q.n.s.,

Comme se fa

Dinto a ‘na prupurziunata tiella a sponna auta ricà ll’uoglio, agnadirve  ‘e duje spicule d’aglio ammunnate e ntretate, ‘nu puparunciello  percante (piccante)lavato, asciuttato e grabbato (inciso) p’ ‘o lluongo e farle callentà a ffuoco allero; appena ‘o ttrigliato d’aglio  à pigliato culore agnadí ‘o ttunno sculato e smullecato,  ‘e sulumiglie d’alice salate sott’uoglio e lassà suassà tutto cosa   sempe a ffuoco allero pe cinche minute;agnadí ll’aulive desciussate e  ntretate, ‘e chiapparielle  e lassà cocere avascianno ‘o ffuoco   pe quinnece minute accuncianno, a ffine cuttura  ‘e  pocu ssale fino e ppepe macenato a ffrisco.

 

Mettere a ffuoco auto  ‘na caurara cu otto litre d’acqua salata (vrancata ‘e sale duppio) e appena ll’acqua jesce a vollere, àrvere pronte pronte ‘e vermicellune; scularle nun troppo asciutte  e revacarle dint’â tiella cu ‘o zuco, derrammarle cu  ‘o ppane ‘rattato arruscato ô tiesto  e tuïglià pe quatto  minute a ffuoco miccio;fora d’ ‘o ffuoco derrammà cu ‘o tuppeto ‘e prutusino lavato asciuttato e ntretato finu fino, ammiscà e ‘mpiattà  servenno ancòra  caude ‘e fuculare chisti vermicellune sabruse!

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

Raffaele Bracale