RRAÚ MARENARO

 

RRAÚ MARENARO

Chello ca ce vo’ pe quatto perzone

400       gramme ‘e tagliuline a ll’uovo,

600 gramme ‘e calamarielle e gghiammere,

‘Nu bicchiere d’uoglio ‘alive dunciglio,

2 bicchiere ‘e vino janco asciutto,

2 spicule d’aglio ammunnate e ntretate finu fino,

‘nu tuppeto ‘e prutusino lavato, asciuttato e ntretato finu fino,

‘nu puparunciello percante lavato, asciuttato e ntretato

sale fino chello ca serve

sale duppio ‘na vrancata.

Comme se fa.

Pulezzà calamare e gghiammare, lavarle sotto a ll'acqua currente, asciuttarle cu ccarta p’’a  cucina e tagliarle a ppiezze piccerille;ricà dinto a ‘na prupurziunata tiella tutto l’uoglio e a ffuoco allero fà zuffriere spicule d’aglio   ammunnate e ntretate finu fino ‘nziem’ô  puparunciello percante.Quanno ll’aglio è juonno auní ‘e piezze ‘e calamare e gghiammare e lassà cocere pe tre minute sempe a ffuoco allero ammiscanno doce doce; ricà ‘o  vino, farlo svapurà, avascià ‘o ffuoco e cuntinuà ‘a cuttura pe ddiece minute; accuncià ‘e sale e mantené ‘ncaudo. Arvere ‘e tagliuline dint’âbbunnante acqua vullente salata cu ‘a vrancata ‘e sale duppio; scularle teniente teniente e aunirle dint’â tiella cu ‘o zuco appruntato e farlo ‘nzapurì pe quatto minute a ffuoco miccio; stutà ‘o ffuoco e derrammà  ‘e tagliuline cu ‘o tuppeto ‘e prutusino lavato, asciuttato e ntretato finu fino. Ammiscà, ‘mpiattà e serví súbbeto ‘ntavula. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute e scialàteve!

Raffaele Bracale