VERMICELLUNE CU 'E SSECCETELLE

VERMICELLUNE CU ‘E SSECCETELLE   Chello ca ce vo’ pe sseje perzone 600 gramme ‘e vermicellune, 500 gramme (piso lisso) ‘e seccetelle pulezzate, lavate e ttagliate a vvarriglie, ‘nu bicchiere e mmiezo d’uoglio ‘aulive dunciglio, dduje spicule d’aglio ammunnate e ntretate, 500 gramme ‘e passata ‘e pummarola, ‘nu bicchiere ‘e vino janco asciutto, ‘na lomma d’ accio ammunnata,  lavata e ntretata, ‘na pastenaca ammunnata,  lavata e ntretata, meza cepolla ndurata ‘e Muntoro ammunnata e ntretata, dduje puparuncielle  pirciante (piccanti)lavate, asciuttate e grabbate (incisi) p’ ‘o lluongo, ‘nu tuppeto ‘e prutusino lavato,asciuttato e ntretato finu fino, sale duppio ‘na vrancata sale fino e pepe janco  q.n. s.   Comme se fa Ricà dinto a ‘na prupurziunata cazzarola, pruvvista ‘e cupierchio, ‘nu bicchiere d’ uoglio,agnadirve ‘o ttrigliato d’aglio, cepolla, accio e ppastenaca e a ffuco allero farle piglià culore, agnadí ‘e seccetelle pulezzate, lavate e ttagliate a vvarriglie,’nfonnerle cu ‘o vino, lassarlo svapurà, agnadí ‘a passata ‘e pummarola‘e dduje puparuncielle  pirciante (piccanti)lavate, asciuttate e grabbate (incisi) p’ ‘o lluongo,salà e cuntinuà ‘a cuttura a cazzarola cummigliata pe vinte minute. Àrvere teniente teniente ‘e vermicellune dinto a otto litre ‘e acqua vullente salata (vrancata ‘e sale duppio), scularle e revacarle  dint’ â cazzarola cu ‘o zuco caudo. Tenerle a ffuoco allero pe ‘nu paro ‘e minute e a ll’urdemo,  fora dô ffuoco, derrammàrle cu ‘nu tuppeto ‘e prutusino lavato, asciuttato e  ntretato. Ammiscà, ‘mpiattà, derrammà ‘e purzione cu abbunnante pepe janco mmacenato a ffrisco e cu ‘nu filo d’uoglio a ccruro.Serví caude ‘e fuculare ‘sti sabruse vermicellune cu ‘e seccetelle.   Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale             .