RICCE ‘E FURETANE CU ‘E VRUOCCOLE

RICCE ‘E FURETANE CU ‘E VRUOCCOLE

 

Chello ca serve pe quatto perzone

400 gramme ‘e ricce ‘e furetana,

 400 gramme (piso lisso) ‘e cemmetelle ‘e vruoccole barise ammunnate,

‘nu bicchiere d’uoglio ‘auliva dunciglio,

  4 spicule  d’aglio ammunnate e ntretate,

‘nu cerasiello  percante (piccante)lavato, asciuttato e grabbato (inciso) p’ ‘o lluongo,

100 gramme ‘e sulumiglie  d’alice salate sott’uoglio,

 

sale fino e   ppepe niro mmacenato a ffrisco q.n.s.

  sale duppio ‘na vrancata,

 ‘na farinula pe bbroro  veggetale.

Comme se fa
Ammunnà ‘e vruoccole staccanno sulo ‘e ccemmetelle; sciacquarle dellicatamente sotto ‘nu strepeto  acqua fresca.

 Arverle pe 8 minute dinto abbunnante acqua salata (vrancata ‘e sale duppio), scularle e cunzervà ll’acqua ‘e cuttura.  Dinto a ‘na prupurziunata tiella ricà ll’uoglio e a ffuoco allero fà piglià culore a ll’aglie ntretate, agnadí‘e sulumiglie  d’alice salate sott’uoglio, ‘nu cerasiello  percante (piccante)lavato, asciuttato e grabbato (inciso) p’ ‘o lluongo,  e farle accumplià dinto a ll’uoglio, agnadí ‘e ccemmetelle arvate, accuncià ‘e sale e ppepe e lassà suassà pe cinche minute agnadenno miezu bicchiere d’acqua vullente addó è stata accumpliasta ‘a farinula pe bbroro  veggetale.Dinto â stessa acqua ‘e cuttura d’ ‘e ccemmetelle, mettere a ccocere ‘e ricce ‘e furetane, scularle pronte pronte e revacarle dint’â tiella cu ‘e vruoccole, avascià ‘o ffuoco e lassà cocere pe 4-5 minuti ammiscanno.Derrammà cu abbunnante pepe niro mmacenato a ffrisco, ’mpiattà servenno súbbeto. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

Raffaele Bracale