NAPOLI - JUVENTUS (13.2.21) 1 A 0
‘A VEDETTE ACCUSSÍ
E cchi s’’o crereva, chi se ll’aspettava guagliú ca ajeressera doppo d’’o sibbacco (match) ô Maradona i’ avesse pututo spilà sciamagna e ppastiggià cu ‘a Moet(ta). Ma vuje ce penzate ca ajere ‘mmerz’ê sseje ‘o Ciuccio scennette ‘ncampo ggià cu ‘na furmazziona arrangiata pe bbia ca seje d’’e nuoste steveno ‘nfermaria e ccumme si nun fósse avastata pochi minute primma d’accummincià se fermaje pure Pastacrisciuta e Ggattuso êtt’’a mannà ‘mporta ô Lungagnone ca nun se ll’aspettava. ‘Ntribbuna-divano penzajemo: “Miette ‘a meglia! Cumme stammo cuncertate, cu ‘na trasera (difesa) addó mancano Pastacrisciuta Chitelassa, Kalidú e Mmezacucchiara, n’armidanno (centrocampo) senza Demme e ‘na primma linia senza Ciruzzo si pigliammo meno ‘e quatto cresommole ce putimmo chiammà asciurtate… E ‘mmece, ‘mmece [e ppe cchesto è bbello ‘o juoco d’’o pallone…] chella ca êva ‘a essere ‘na mazziata addivintaje n’arnassa taminna (una vittoria preziosa) pure si sulo p’uno a zzero cu n’addaffa (rete) ‘e ricore signata dô capitano ô 31’; ‘o Ciuccio ce ‘o mettette a ppitoffio a ll’amaruascia (zebra), Gattuso se sentette cchiú ssicuro ‘e magnarese ‘a pastiera i ‘o Napule se mettette tre ppunte sustanziuse dint’â sacca ca p’’o mumento ce permetteno ‘e stà a cquaranta punte ‘ncrassifica ‘nchietta cu ‘a Roma, ‘ncamma (in zona) Ciampionsa… E nunn’è ppoco.
Passammo ê ppaggelle:
MERET[‘O Lungagnone] 8 Fove ‘o meglio d’’e suoje e d’’o riesto; mannato ‘ncampo poco primma d’accummincia pe bbia ‘e ll’additto (infortunio) ‘e Pastacrisciuta se facette truvà pronto sfuderanno allimmeno tre ttacculle (interventi) ca ce cunzentetteno ‘e salvà ‘o natiggio (risultato): dicette no a n’artifaffa (deviazione) da duje passe ‘e Ronaldo,a ‘na cagliosa ‘e Chiesa i a ‘na zampata a bbotta sicura ‘e Morata ‘int’ô niajo (finale).
DI LORENZO 5,5 Quanno Chiesa ‘o puntaje jette sufferenza e ss’arrangiaje pure cu ‘e mmane arresecanno pure ‘o siconno jalizzo (giallo).
RRAHMANI 7,5 Nun me ll’aspettavo, ma ‘o guaglione fuderaje n’atalossa (prestazione) ‘e granna ammanna (sicurezza) ‘nafatizzanno (marcando) o ancercanno (anticipando) contro a ccierti mali accunte (clienti).Mantenette auta ‘a cuncentrazziona nsi’ a ll’urdemo e ggià ô primmo ajone s’era prucurato ‘o ricore saglienno annante. ‘Nzomma fove overamente mucannajo (convincente)!
MAKSIMOVIC[‘O ‘Ntontero] 7 – Quanno tutto à dda jí bbuono! Pur’isso ajere s’abbuscaje ‘a pagnotta: tutta n’ata atalossa (prestazione) a ppietto ‘e chella scarza ca vedettemo ’nCoppa Itaglia contro ll’Atalanta: ajere fove sempe sicuro e attiento asasa (soprattutto) ‘ncopp’ê ppalle aute.
Mario RUI 6 – Funzuinaje ‘a catena cu Llozano asasa (soprattutto) ‘int’ô primmo ajone urdinato e ssenza fessarie; quacche sfregazzo (sbavatura) a ll’arrancua quanno dê pparte soje se ll’êtte ‘a vedé cu Ddanilo e ccu Cchiesa. Ma s’’a scapuliaje.
ZIELINSKI 6 Migliuraje a ppietto ‘e chello fatto vedé a Bbergamo addó jucaje malamente; ajere ce mettette cegna (grinta) e ccorza pure senza fa cape d’angelo; a ll’arrancua (nella ripresa) se ne scennette e ffove chiammato ‘mpanca.
[dô 64' ELMAS[‘O Turco] 5,5 Spaisato, tuccaje pochi pallune i ‘a spetaccosa amaruascia (lebbrosa zebra) ne apprufittaje
BAKAYOKO 7 Suoccio trascurzo fatto p’’o ‘Ntontero; jucaje bbuono asasa (soprattutto) facenno aculla (diga) ‘mmiez’ô campo, aiutanno ê cumpagne mutaiffanno (raddoppiando) sempe e cunfermanno ‘e tené senzo ‘e pusizziona; cumplessivamente fatica mumazza (ottima) cu sulo pochi sfregazze (sbavature) senza cunzequenzie. POLITANO 5,5 ‘A bbona vuluntà nce ‘a mettette ma ‘o zuco fove poco; ccercaje d’accentrarese, ma senza cacciarne coccosa. Peccato!
[dô 65' RUIZ[Anemalonga] 6 Gattuso ‘o mannaje ‘ncampo pe se sacrificà e ffà aculla (diga) e isso ‘o ffacette dànno ‘na mano addó nicessario.
INSIGNE 7,5 Jucaje a ttutto campo, s’avasciaje spisso, faticaje p’’e cumoagne e ffinalmente truvaje finalmente ‘o cientesimo stuco (gol) cu ‘a maglia luvarda (azzurra) mettenno dinto cu pricisione ‘o ricore e scrullannose ‘a cuollo ‘a jastemma vecchia zoccola janca e nnera!
[d all'88' LOBOTKA 6 ‘e stima pecché jucaje sulo otto minute.]
LOZANO 6,5 Curaggiuso e cquase arroico (eroico) cumbattette contro a Ccuadrado, macenanno chilometre taglianno e crianno prubbleme a cchi capitaje cosa ca mannaje ‘ncrisa ‘a spetaccosa e lle fruttaje ‘a timmuria (punizione) ca ‘o capitano mettette ‘mmiezo addó Rrahmani, s’abbuscaje ‘o ricore pe bbia ‘e ‘nu buffettone ca Chiellini lle dette.
OSIMHEN[Caromecosta] 5,5 Forze nun sta ancòra ô mmeglio e avette poche accasione pe ccercà ‘a porta però facette ‘a fatica cchiú sporca tenenno auta ‘a scuatra e ppiglianno mazzate mo da uno, mo da n’ato.
[dô 75' PETAGNA 6 Trasette e cce mettette cegna (grinta) pe ffà chello ca lle dicette ‘e fà Gattuso: cercà ‘e mantené quacche ppallone pe ffà rispirà ‘a scuatra.
all.: Gennaro GATTUSO 7 Vattere ‘a vecchia zoccola nun è ccosa ‘e pochi mumente; farlo cu ‘a ‘nfermeria chiena è cquase ‘mpussibbile, ma isso ne fove capace cunfermanno ‘e tené ‘a scuatra dâ parta soja. E fforze se magna ‘a pastiera i ‘o beneditto!
arb. DOVERI 6 Ajere facette ‘o duvere suĵo pure si pe ddarece ‘nu ricore gruosso accussí ll’êtten’’a chiammà chille d’’a Varra; ‘ncumpenso s’addunaje súbbeto ca tanti spetaccuse (lebbrosi) janche e nnire nun sulo vatteveno ‘e nuoste, pe pparta lloro se menaveno ‘nterra senza ca nisciuno ll’êsseno tuccate…e nun ce ‘a facette bbona!
E bbasta accussí; â faccia ‘e chi ce vo’ male, d’’a jella e dd’’e tanti cestarielle luntane e vvicine alliccammoce ‘e bbaffe e gghiammo annante. Mo si ‘o Cielo ‘o ccuncede ce sentimmo viernarí ca vene pe rrennerve cunto ‘e chello ca facimmo a Granada ggioverì diciotto. Facimmo corna. Ciuccio fa’ tu! Staveti bbe’. R.Bracale Brak
Nessun commento:
Posta un commento