NAPOLI- TORINO (6/05/18) 2 a 2 ‘A VEDETTE ACCUSSÍ

NAPOLI- TORINO (6/05/18) 2 a 2

‘A VEDETTE ACCUSSÍ

Che delusione guagliú e cche ccollera p’’a granna accasiona perza, all’ora d’’a tiella  ajere ô san Paolo addȯ ‘o Napule s’’a vedette cu ‘a scuatra ‘e ll’unnice zappielle d’’a bbonanema ‘e Mazzarri  e êsse avuto assulutamente vencere e ‘mmece quanno Doveri [6] siscaje ‘o niajo (fine) c’êttemo cuntentà ‘e ‘nu scartellato russimmo (pareggio) pe ddoje a ddoje [doppo d’essere statato ‘nvantaggio pe ddoje vote], cosa ch’è acqua ca nun leva sete e nnun ce serve a ‘nu bbiato saciccio! E ttutta ‘a delusiona i ‘a collera d’ajere ‘e ppruvaje   no pecché  ancòra êsse tenuto quacche speranziella ‘mpurtanta [visto ca nun me ne fotte cchiú nniente d’’o campiunato e dd’’o scutetto, ch’è rrobba d’’a vecchia zoccola ca puntualmente vene ajutata a vvencere i ‘o ffà appunto cu ‘a faccia d’’e zzoccole vecchie senza scuorno nè ddignità...], ma pecché me piacesse ‘e vedé vencere ‘o Ciuccio sempe ‘ncasa e ffora e nno vederlo sciupà accasione soprattutto ‘ncasa. E ‘mmece proprio chesto succedette ajere  e mme ‘ntussecaje ‘o ppoco ‘e magnà.  Passammo ê ppaggelle:

REINA 5  Me dispiace, ma tanto se mmereta! Durante ô primmo ajone(tempo) nun fove maje chiammato ‘ncausa; a ll’arrancua (ripresa) êsse avut’’a dimustrà cchiú  riattività ‘ncopp’â deviazzione d’’o Vampiro, mmece se facette spiazzà, surpreso; peggio ancòra ‘ncopp’ô doje a ddoje quanno ‘mmece d’ascí rummanette fremmo ‘int’â terra ‘e nisciuno e sse facette fottere centralmente! E cche saciccio!

HYSAJ[Meza Cucchiara] 6 Fove overo ca ‘a primma addaffa (rete) turinista arrivaje dô lato suojo, ma tutto summato itimme (colpe) nun ne tenette e ffove chillo ca sbagliaje meno ‘e ll’ate. 

ALBIOL [‘O Masto] 5,5  miezu zifo (voto) mancante pecché cu ‘o Vampiro jucaje meno pallune d’’o nnicessario e soprattutto pecché ‘ncopp’ô doje a ddoje nun s’alliniaje a mmestiere! 

CHIRICHES[‘O Vampiro] 6 – Turnato  ‘ncampo doppo quatto mise fove prutacunista ‘e ‘na bbona atalossa  (prova) cu ggranna perzunalità,pulezzia  e cqualità quanno êtte âscí.Iellato cchiú ca che quanno, ô 55’, deviaje ‘a cianfata ‘e Baselli facenno ‘a frittata. 

MARIO RUI 5  Ajere nun me piacette troppo soprattutto quanno  a ll’83’ se perdette a dDe Silvestre cu ttutt’’e ccunsequenzie d’’o caso. Certo si ‘o Masto êsse fatto scattà ll’attasallulo (fuorigioco), ma purtropppo nunn ‘o ffacette!  

ALLAN[‘O ‘Ncrifato] 6 – Currette pe ttre luttanno cu ccegna (grinta), ma sbagliaje quacche ppallone ‘e troppo. Peccato!

JORGINHO 6  Gestiunaje (gestí) ‘nu tummolo ‘e pallune  In però cu cquacche prano (errore) ‘e troppo soprattutto durante a ll’urdemu quarto d’ora.

ZIELINSKI 5  No! ‘O guaglione ajere nun me piacette: miso dô primmo minuto ô posto d’’o capitano nun riuscette maje a ‘nzertarse (inserirsi) periculosamente, nè mmaje tentaje ‘nu tiro ‘a fora e sbagliaje paricchi ppalle  aizanno porvera nsi’ô 68’, quanno finalmente Sarri s’’o chiammaje ‘mpanca .[dô 68’ HAMSIK 6,5  Trasuto ô mumento cchiú ddifficultuso, Marekiaro, ô 71’, favurito dô muvimento ‘e sant’Arcadio ca ll’arapette ‘a trasera (difesa) truvaje ll’addaffa (rete) ca ce purtaje ‘ncopp’ô doje a uno e lle permettette d’arrivà a cciento stuche (gol) ‘nserie A. Che ccollera e cche ppecato ca ‘o vantaggio duraje sulo ddurice minute!]

CALLEJON[Peppe ‘a ‘nguenta] 5 Manch’isso me piacette! Stracquo e ssenza ficre (idee) sulo ‘na vota ‘mpignaje a  sSirigu e pp’’o riesto sulo muvimento senza zuco, nè ccunnimma![Da ll’88’  OUNAS sv  E ppe fforza! Fove ‘na presa ‘ngiro p’’o fracese farlo trasí pe dduje minute; che puteva fà?]

MERTENS [Ciruzzo] 6,5  ‘O miezu zifo (voto) ‘e cchiú sulo pe cchell’addaffa (rete) ô 25’, signata da granne figlio ‘e ‘ntrocchia apprufittanno ‘e ‘na fessaria ‘e ‘nu  turinista, ma p’’o riesto l’atalossa (prova) ‘e Ciruzzo, ca cupuliaje (dialogò) poco e nniente  cu ‘e cumpagne,  nun se chiammaje ll’applavuso. So’ ccerto ca si sant’ Arcadio fósse stato miso dô primmo minuto êsse fatto ‘e cchiú dd’isso.[dô 69' MILIK[sant’Arcadio] 6  Trasette e sse facette apprezzà súbbeto cunfermanno ‘e stà meglio ‘e Ciruzzo; dètte cchiú ppresenzia ‘int’â muntaca (area di rigore) e ggià ô siconno pallone tuccato spaventaje a sSirigu cuglienno ‘o palo cu ‘na cagliosa ‘e mancino.]

INSIGNE[Lorenzigno] 5,5 miezu zifo (voto) mancante pecché è overo ca se facette ‘nu mazzo tanto nsi’ ô  95',ma senza zuco, cunnimma e ppricisione. Stracquo pur’isso!

all. Sarri  Quanno nun se vence ‘o primmo a sbaglià è ‘o muntarribbo (allenatore) ca ajere sbagliaje furmazziona ‘e partenza e nnun gestiunaje bbuono ‘e cagne.

arb.  DOVERI 6 ‘Na vota tanto niente ‘a dicere!Fetenzie nun ce ne facette.

E ffermammoce cca. Collera e ddelusione v’aggiu ditto e vv’’e cunfermo pure si ‘ncopp’ô campiunato ‘o crucione ggià ce ll’êvo miso doppo d’’a mazziata casalinca ‘ncassata dâ Roma. Mo dico  sulo ch’âmm’’a vencere ll’ati dduje sibbacche (match) ca rummanono pe ‘nchiudere allimmeno a 91 punte. Accussí sperammo e vve saluto. Staveti bbe’!

R.Bracale Brak