‘O RUOTO Ô FURNO

‘O RUOTO Ô FURNO

Chesta ricetta  a Nnapule  ‘a chiammammo " ‘o ruoto ô furno" (pecché s’appronta dinto a ‘na cummedità tonna  (si fa in una  teglia tonda));   pe pripararla se po’ ausà qualunque tipo ‘e carne, pure ammiscata: spezzato d’annecchia, spezzato ‘e puorco, sacicce)... ma cu ‘o crapetto o cu ‘o piecuro, che v’aggio ‘a dicere?..., tène tutto n’atu sapore e uno s’allicca pure ‘e ddete...e tant’è vero ca ‘sta ricetta è mmeglia cu ‘o crapetto o cu ‘o corachiatta( agnello laticauda);  anticamente ‘sta ricetta era chiamata nun sulo ‘o ruoto ô furno, ma pure, (comme  a ddinto â canzone POPOLO, PÒ ‘e Ernesto Murolo e Ernesto Tagliaferri) ‘o quarticiello cu ‘e ppatane e a Nnapule, se sape ca ‘o quarticiello (cfr.prof.  R. D’Ambra) è ‘o quarto ‘e  crapetto o ‘o quarto ‘e piecuro cuotto ô furno!  Jammo annante

Chello ca serve pe sseje perzone

‘Nu kilò e mmiezo ‘e  carne ‘e crapetto/piecuro corachiatta etc.,
‘nu kilò ‘e patane vecchie ammunnate, lavate e tagliate a ffarínule (cubi),
Ddoje vecchie cepolle rusate ammunnate, lavate e tagliate fine fine,
Ciento gramme ‘e  pesielle nuvielle,frische o surgelate,
‘Na buatta ‘e ‘nu kilò ‘e pummarole pelate,
  cinquanta gramme ‘e  ‘e  pecurino ‘rattato,
‘Nu bicchiere d’ uoglio ‘auliva dunciglio (extravergine) primma spremmetura a ffriddo,

2 cucchiare ‘e ‘nzogna,
sale fino ‘nu cucchiaro e mmiezo,

pepe niro macenato a ffrisco quanto ve ne piace.

Comme se fa :

Pigliate  ‘a carne, sciacquatela cu acqua fredda currente e  e mettitela a bbagno pe mez’ora dinto a ‘na zuppiera cu  acqua fredda  e ‘nu cucchiaro ‘e  sale fino,sgrunnàtela e mettítela dinto a ‘nu  ruoto prupurziunato. Aunítece ‘e patane tagliate a ffarínule , ‘e cepolle tagliate  fine fine, ‘a buatta  ‘e pummarole pelate,’e pesielle e ‘a ‘nzogna e rignite quase pe mmità o ruoto cu acqua cauda, aunite ll’uoglio, regulate ‘e sale e ppepe, aunite ‘o ppecorino  e  ‘nfurnate a 180° pe quase n’ora.Cuntrullate ‘a cuttura... ca si ‘o ruoto s’êsse’a asciuttà troppo âte auní n’ a’ ppoco d’acqua cauda. ffine cuttura assicurateve ca ‘o zuco ‘e  ‘sta ricetta risulta abbunnante pecché doppo d’avé sistimate ‘e piezze ‘e carne dint’ô piatto ‘e purtata, cupierte cu tantu zuco, cu chello ca avanza se ponno cunní seicente gramme ‘e vermicellune o ‘e pirciatielle chine ‘e pecurino e ppepe e songo accussí sapurite ca doppo ca ve ll’avite magnate v’âte a fforza fà ‘a scarpetta!

Vini: Curpuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza ‘a magnà.

Mangia Napoli, bbona salute! Scialàteve e aggarbbatéve ‘o vernecale!

raffaele bracale