VERMICIELLE CU TTUNNO E ALICE SALATE

VERMICIELLE CU TTUNNO E ALICE SALATE
Chello ca serve pe 4 perzone:
quattuciento gramme ‘e vermicielle,
ciento gramme ‘e tunno sott’uoglio,
uttanta gramme ‘e alice salate sott’uoglio,
cinquanta gramme ‘e chiapparielle lavate e asciuttate
tre pummarole tipo san Marzano lavate asciuttate e ffatte a ppiezze,
‘nu bicchiere e mmiezo d’uoglio d’auliva stravergine,
‘nu spiculo d’aglio spugliato e scamazzato,
‘nu túppeto( un ciuffo) ‘e prutusino ‘ntritato fine fine
‘na vrancata e ‘na presa ‘e sale duppio,
pepe niro macenato a ffrisco quanto ve ne piace.

prucedimento
Passate pe setaccio o pe muleniello(frullatore) ciento gramme ‘e tunno sott’uoglio ‘nzieme a uttanta gramme ‘e alice salate sott’uoglio.
Suffrijte dinto a ‘nu bicchiere e mmiezo d’uoglio d’auliva stravergine ‘nu spiculo d’aglio spugliato e scamazzato nfino a cche addeventa bello junno junno e levatelo senza farlo abbruscià. Aunite cinquanta gramme ‘e chiapparielle lavate e asciuttate e subbeto subbetotre pummarole tipo san Marzano lavate asciuttate e ffatte a ppiezze ‘nzieme ô ttunno e a ll’ alice passate a setaccio o pe muleniello, ’na presa ‘e sale duppio , paricchiu pepe niro macenato a ffrisco e facite cocere a
ffuoco doce pe quinnece minute.
Fraditanto facite cocere vierde vierde,dinto a paricchia acqua salata cu ‘na vrancata ‘e sale duppio, appena asciuta a vvollere, quattuciento gramme ‘e vermicielle, sculatele e menatele dint’â tiella cu ‘o zuco appruntato, arremescate e cumpletate fora d’ ‘o ffuoco cu ‘nu túppeto( un ciuffo) ‘e prutusino ‘ntritato fine fine. Arremescate ancòra e ammenestate.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco di Tufo) fridde ‘e jacciaja.
Mangia Napoli, bbona salute! E scialàteve!
raffaele bracale