lunedì 21 novembre 2011

ALICE ALL’ACITO

ALICE ALL’ACITO
chello ca serve pe 6 perzone
‘nu kilò d’alice grosse,
farina q.n.s.,
ddoje cepole ndurate ‘e Muntoro ammunnate e ntretate,
tre fronne ‘e lauro frisco,
‘nu bicchiere e mmiezo d’acito janco,
miezu bicchiere d’uoglio ‘auliva dunciglio
abbunnante uoglio pe frijere,
sale duppio e ppepe janco macenato a ffrisco q.n.s.

comme se fa:
Lavà e pulezzà ll’alice levanno ‘a capa, mmennute e ‘a spina; arapí a llibbro ogneduna p’ ‘o lluongo, lavarle ancòra e asciuttarle.
Passarle dint’â farina e frijerle a mano a mano dinto a abbunnante uoglio pe frijere vullente; appena songo ndurate,aizarle ‘a ll’uoglio cu ‘na ‘spumàdera e appujarle ‘ncopp’a ‘nu fuoglio ‘e carta asciugante a pperdere ll’uoglio supierchio; salarle, ma nun troppo.

Dinto a ‘na prupurziunata caccavella ‘e terracotta zuffrijere a ffuoco allero, cu ll’uoglio dunciglio, ‘e cepolle ammunnate e ntretate;appena songo suassate agnadirve ll’acito, miezu bicchiere d’acqua cauda, ‘e ffronne ‘e lauro, ‘nu pizzeco ‘e sale fà fèrvere pe cinche minute e stutà ‘o ffuoco. Sistimà dinto a ‘na sperlonga, pruvvista ‘e cupierchio, ll’alice fritte, ricarle cu ‘o zuco d’acito caudo, cummiglià e lassà ‘scabbiscà (marinare) pe quase vintiquatt’ore primma ‘e servirle comme parte ‘e ‘na sabbrosa trasetura. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e aggarbbatéve ‘o vernecale!!
Raffaele Bracale

Nessun commento: