CRUSTUNE CAPRISE

CRUSTUNE CAPRISE

chello ca serve pe sseje perzone
12 bbelli ffelle ‘e pane casareccio arruscate dint’ô tiesto(dujeciento grade) o a sciamma auta ‘e furnello,
tre pummarole custulute p’’a ‘nzalata,
500 gramme ‘e muzzarella,tagliata a ffelloce doppie miezu centimetro,
‘Nu bicchiere d’uoglio ‘auliva dunciglio,
arecheta,sale fino cunnito e ppepe janco macenato a ffrisco q.n.s.

comme se fa
Pulezzà, lavà e asciuttà ‘e ppummarole e tagliarle a ffelloce doppie miezu centimetro; arruscà dint’ô tiesto o a sciamma auta ‘e furnello ‘e ffelle ‘e pane, sistimarle una vicina a ll’ata dinto a ‘na sperlonga e mettere ‘ncopp’ a ògne fella apprimma ‘na felloccia ‘e pummarola, ppo una ‘e muzzarella, po ancòra ‘na felloccia ‘e pummarola e a ll’urdemo n’ata felloccia e muzzarella; cuncià ògne cuscio cu ‘nu poco e sale cunnito ppepe janco macenato a ffrisco e arecheta e rricà ‘o ttutto cu ll’uoglio a ffilo. Serví comme trasetura.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e aggarbbatéve ‘o vernecale!!
Raffaele Bracale