venerdì 25 novembre 2011

BUCATINE SAPURITE

BUCATINE SAPURITE

chello ca ce vo’ pe sseje perzone
600 gramme ‘e bucatine,
miezu kilò d’alice fresche,
ciento gramme d’alicesalate sott’uoglio,
‘dduje cucchiare ‘e semmente ‘e fenucchio,
‘nu cucchiaro ‘e pignuole
‘nu cucchiaro abbunnante d’uva passa,
ddoje bustine ‘e safrone (zafferano),
‘nu bicchiere d’uoglio ‘auliva dunciglio,
dduje spicule d’aglio ammunnate e ntretate finu fino,
sale duppio ‘na vrancata,
salefino e ppepe janco macenato a ffrisco q.n.s.,
pane rattato tre cucchiare.

comme se fa
Lavà e pulezzà ll’alice levanno capa, coda, mmennute e spina e farne ‘e ognuna dduje sulumiglie, lavarle ancòra e asciuttarle.


Piglià ‘nu rutiello largo, ricarve ll’uoglio e ‘o ttrigliato d’aglio farle culurí a ffuoco sustenuto e agnadirve apprimma ll’alice salate e ppo ‘e sulumiglie d’alice fresche e ffà suassà pe cinche minute; a ‘stu punto agnadí ll’uva passa ammullata e spremmuta, ‘e pignuole, ‘nu cucchiaro ‘e semmente ‘e fenucchio, ‘e ddoje bustine ‘e safrone, pocu ssale fino e ppepe janco macenato a ffrisco q.n.s.; avascià ‘o ffuoco e fà cocere pe ‘nu quarto d'ora.

Fraditanto mettere ô fuoco ‘na caurara cu abbunnante acqua salata (sale duppio) e cumfromme jesce a vvollere agnadirvi l’atu cucchiaro ‘e semmente ‘e fenucchio,e farve àrvere ‘e bucatine teniente teniente; quanno so’ ppronte, scularle e revacarle dint’ ‘o rutiello cu ‘a sarzulella d’alice, ammiscà, derrammarve ‘ncoppa ‘o ppane rattato e ppassà pe ddiece minute ‘o rutiello dint’ô tiesto caudo (200°). Tirà fora, purziunà e serví caude ‘e tiesto ‘sti sabruse bucatine. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e aggarbbatéve ‘o vernecale!!
Raffaele Bracale

.

Nessun commento: