PIRCIATIELLE CU ‘O CAVELISCIORE

PIRCIATIELLE CU ‘O CAVELISCIORE

chello ca serve pe 6 perzone
400 gramme ‘e cemmetelle ‘e cavulisciore pulezzate e lavate,
600 gramme ‘e pirciatielle spezzate (piezze’e quatto centimetre),
‘nu bicchiere d’uoglio dunciglio,
‘nu spiculo d’aglio ammunnato e ntretato finu fino,
‘nu bicchiere ‘e vino janco asciutto,
‘nu puparunciello pirciante (piccante)lavato, asciuttato e grabbato (inciso) p’ ‘o lluongo,

sale duppio ‘na vrancata e mmeza,
sale fino e ppepe janco macenato a ffrisco q.n.s.,
dduje cucchiare ‘e pignuole arruscate ô tiesto (220°)
‘nu tuppeto ‘e prutusino lavato asciuttato e ntretato finu fino.
comme se fa:
Pulezzà ‘nu cavulisciore janco scartanno fronne e pparte cchiú toste; sarvarne quattuciento gramme ‘e cemmetelle. tennere. Mettere a ffuoco allero ‘na marmitta cu quatto dete d’acqua salata (meza vrancata ‘e sale duppio) e farla ascí a vvollere; farve àrvere teniente teniente pe cinche minute ‘e cemmetelle ‘e cavulisciore. Scularle e refreddarle sotto a ‘nu strèpeto d’acqua fredda. Fraditanto dinto a ‘na prupurziunata tiella, auta ‘e sponna,ricarve ll’uoglio e farlo callentà a ffuoco allero agnadenno ‘o ttrigliato d’aglio e ‘o puparunciello; appena ll’aglio è culurito agnadirve ‘e cemmetelle arvate e farle ‘nzapurí pe diece minute.Spruzzarle cu ‘o bicchiere ‘e vino janco e farlo svapurà.
Àrvere ‘e pirciatielle spezzate dinto a otto litre ‘e acqua vullente salata (vrancata ‘e sale duppio), scularle e revacarle dint’ â tiella cu ‘o zzuco caudo.Agnadí ‘e pignuole arruscate ô tiesto e tuiglià.Tenerle a ffuoco allero pe ‘nu paro ‘e minute e a ll’urdemo, fora dô ffuoco, derrammàrle cu ‘nu tuppeto ‘e prutusino lavato, asciuttato e ntretato. Ammiscà, ‘mpiattà e serví ‘sti sabruse pirciatielle cu ‘o cavelisciore cumpletanno ‘e piatte cu ‘na bbella mmacenata ‘e pepe janco. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale