martedì 1 agosto 2017

ATLETICO MADRID –NAPOLI (am.le 01.08.17) 2 A 1



ATLETICO MADRID  –NAPOLI (am.le 01.08.17) 2 A 1

Mannaggia chello ca nun se po’ ddicere guagliú! Ajere ce facettemo ‘a croce cu ‘a mana storta e accumminciajemo ‘a tempurata (stagione) cu n’azzimma (sconfitta) ca nun sta né ‘ncielo, né ‘nterra  e ca te fa magnà ‘o fecato pe nnun dicere auto. E ccumminfatte da ajeressera sto’ magliecanno, magliecanno e nnun me riesce d’agliottere d’avé perzo contro a ‘na scuatra ‘e quattuordece, quinnece curdische ca pe ttutt’’o sibacco (match) nun facetteno ato ca menà mazzate e pazziajeno a ffà male sotto a ll’uocchie ‘e ‘nu sacchetto ‘e mmunnezza [ll’arbitro terisco Brand (2)surdo, muto e ccecato] ca ‘e llassaje fà senza jettarne cchiú dde uno fora e cquanno ‘o ffacette, cacciannone a uno  ggià fove troppo tarde e s’era ggià fritto ‘o fecato cu ‘o Napule ‘nsotto pe ddoje a uno ca nunn’ avette cchiú ‘o tiempo d’adderezzà ‘a varca. Cumplessivamente però ‘o Napule nun ghiucaje malamente, ma nun sapette vencere, anze ce refunnette ‘e ppennep’’e solite difette: mancanza d’attenziona e mancanza ‘e cazzimma;  ‘nzomma n’azzimma (sconfitta) ca dipennette dâ fessaggine nosta e dô mazzo rutto lloro ca apprufittajeno ‘e duje rimpalle favurevule [‘na vota ô 73’ cu tTorresse e n’ata vota a ll’81’ cu vVietto] pe ffottere a rReina ca nun tenette nisciuna sfarma, mentre nujeautre nun fovemo crestiane ‘e farce dduje o tre stuche (gol) comme ce fóssemo mmeretate p’’o juoco fatto, ma sulo uno ô 56’ cu pPeppe ‘a ‘nguenta ca mettette a ffrutto cu ‘nu granne tiro a vvolo ‘nu bbellu jabbro (cross) da mancina a zzuco ‘e caramella  ‘e Ghoulamme purtannoce ‘nvantaggio... cosa ca durante ô primmo ajone nun era riuscita a sant’Arcadio ca ô 34’ s’era appresentato ‘ncopp’ô dischetto pe ttirà ‘nu ricore avuto pe ‘nu carí (fallo) ‘ncull’a  pPeppe ‘a ‘nguenta stiso ‘nterra da ‘nu passo dô purtiere; mbe’ guagliú sant’Arcadio ‘mmece ‘e tirà ‘na straccarellata ferma ccentro ‘e porta [comme s’à dda fà p’essere sicure ‘e signà ‘nu ricore, dàtose ca tutte ‘e purtiere o se meneno a ddritta o a mmancina e llassano sguarnita ‘a via centrale...], neh chillo facette ‘na telefonata ô purtiere lloro menannole ‘na palla bradosa (lenta) addó chillo ggià s’era vuttato ‘a diece minute. E cche saciccio! Forze pe cchesto chella mmunnezza ‘e ll’arbitro terisco Brand nunn’êtt’’a siscarce n’atu ricore a ffavore quanno a ll’arrancua (ripresa) Lorenzigno fove cauciato e stiso da uno d’’e chianchiere ‘e Simeone; forze ll’arbitro êtte ‘a penzà:     ”Che ce ‘o donco a ffà? Tanto chiste manco ‘o segnano”.
E accussí jette a fferní ca fovemo azzimmate (sconfitti) e ccomme v’aggiu ditto ce facettemo ‘o croce cu ‘a mana storta. E tutto chesto pe nun dicere ‘e doje cose pure  ‘mpurtante e ciové mazzeca e uno  ca uno d’’e duje armujllacche (commentatori) ‘e SKY fove chillu cestariello ‘e Beppe Bergomi ca nunn’ appena   sant’Arcadio s’appresentaje ‘ncopp’ô dischetto ce menaje ‘a favetta cundicenno ca ‘o purtiere ll’êsse parato, comme succedette  e mazzeca e ddoje chella cacchia ‘e muntazzima (divisa) sciveta ajere dô Napule culore sciorda ‘e criatura malata ‘e viscere ca certamente nun porta bbuono e sperammo ca nun s’’a metteno cchiú. Arrivato a ‘stu punto êsse annutà  ‘e ppaggelle; ma sto’ troppo ‘ntessecato pe ffarlo: zimmere e crapette faccio una mbulletta e mmetto quatto a ttutte quante, juste e peccature, e cchi nunn’ è d’accordo s’arrangiasse! Ve ringrazzio ‘e ll’attenziona, ve saluto e ssi dDi’ ‘o vo’ ve donco appuntamento a llunerí ca vene doppo ll’uadí (amichevole) ‘e dummeneca a ssera contro ll’A.F.C. Bournemouth   ‘na scuatra ‘ngrese ca, perdunateme, ve cunfesso nun saccio che ppanne veste. Staveti bbe’! R.Bracale Brak


Nessun commento: