giovedì 3 agosto 2017

BAYERN MONACO – NAPOLI (am.le 02.08.17) 0 A 2




BAYERN MONACO   –NAPOLI (am.le 02.08.17) 0 A 2
Ajere, guagliú,  doppo ‘e ll’azzimma (sconfitta) cu cchilli chianchiere ‘e Simeone me venette ‘na scigna forte, ppigliaje ‘nu zzarro e ppenzaje ‘e lassà perdere ‘o riesto ‘e ll’AUDI Cuppetta. Cumminfatte me pare ca ve dette appuntamento a llunnerí ca vene doppo ll’uadí (amichevole) ‘e dummeneca a ssera contro ll’A.F.C. Bournemouth   ‘na scuatra ‘ngrese ca nun saccio che ppanne veste...ma po nun ce ll’aggiu fatto e ssaputo ca ‘o Napule êsse jucata ‘a finala p’’o terzo e quarto posto contro a ‘na scuatra ‘e jucature e nno ‘e chianchiere [o meglio cu ssule dduje chianchiere: Vidal(le) e Cuman(ne), tutte e dduje scola vecchia zoccola janca e nnera] me ne futtette d’’o calore ‘a murí dint’â stanza cu ‘o schermo gigante e mme mettette a vederme ‘o sibbacco (match) d’’o Napule contr’ô Bayerne-Monaco. E ffacette bbuono pecché fove tutta n’ata storia e p’’o Napule, cu ‘a muntazzima (divisa) luvarda sfriggiata da tre strisce blu-savoia,ca jucaje bbuono pe ttutt’’e nuvanta minute  arrivaje ‘na nichemata (vittoria) pe ddoje a zzero, justa, mmeretata e ssuddisfacente visto ca se jucaje a ppallone e nno a ffà male. ‘Assa fà ô Cielo, e nun me se venesse a ddicere ca Capa-janca Ancelotti, snubbanno ‘a finala p’’o terzo posto,  facette jucà troppi guagliune. Nun vo’ dicere niente: nun me risulta ca cesta quacche mutarribbo (allenatore) ca joca pe pperdere! Passammo ê ppaggelle:


SEPE 7
 Bbona atalossa (prova) p’’o purtiere turrese ca custretto a ffà ‘e  straurdinarie ‘int’ê primme minute ‘e juoche, nun se facette surprennere.
[dô 45’ RAFAEL CABRAL 6  Una parata a mmestiere  e pp’’o riesto nun êtt’’a fà niente.]
MAGGIO 5.5 Dispiace d’’o ddicere ma fove isso ll’aniello debbule d’’a catena difenziva e spisso ll’avverzario diretto, Tillman(ne), ‘nu guaglione, s’’o futtette  ‘nzurea (in velocità).
 [Dô 61’ HYSAJ[Meza cucchiara] 6  Cu ttutto ca Riberý fove n’accunto cumplicato,’o Meza cucchiara appressuraje (spinse) cchiú ‘e  Maggio]
MAKSIMOVIC 6,5  ‘O punto debbule suojo è ‘a zurea (velocità), ma riuscette a essere sempe prisente e ssicuro sfruttanno ll’armadia (fisico) pe mmettere ‘na pezza quanno fove nicessario.
[Dô 61’ CHIRICHES 7  Pure ajere riuscette a essere cunvincente cumme ll’Atletico Madrid(de)].
KOULIBALY 6.5 Miezu zifo (voto) ‘e cchiú  pecché riuscette ô 14’ a ppurtà ‘nvantaggio ‘e suoje facennose truvà ô posto justo, ô mumento justo cumme a n’artigliero (centravanti) isso ca massia (attaccante) nunn’è. Pur’isso êtte ‘a fà ‘e straurdinarie ‘ndifaja (difesa) pe ccuntené ‘a ‘nfijaría (esplosività) d’’e criature d’Ancelotti e ‘o ffacette a mmestiere
GHOULAM 6-  Bbona atalossa (prova) ‘e ll’algerino, ma niente ‘e cchiú.
[Dô 45’ MARIO RUI 6  A ppietto ‘e ll’algerino è cchiú ffrisco e sse vedette.]
DIAWARA 6.5 Me parette cchiú cunvincente ‘e Ggiorgigno comme cumannante ‘e ll’armidanno (centrocampo), pedina funnamentale p’’o juoco ‘e Sarri.
[Dô 61’ JORGINHO 5.5  Nun sta ancòra â stessa mistaua  (livello) ‘e cundizziona d’’e cumpagne.]
ZIELINSKI 6.5 S e facette apprezzà p’’a sustanza appurtata a ll’armidanno (centrocampo) e ppe ll’istiglie (verticalizzazioni) ‘ncerca d’’e nassie (attaccanti).
[Dô 78’ MILIK s.v.Poco cercato e ppoco truvato.]
HAMSIK [Marekiaro] 6 Guvernaje ‘o juoco a mmestiere e urdinatamente, ma nun cercaje maje ‘a porta!
[Dô 45’ ROG [‘A bbelva] 6  Ce mettette cegna (grinta) e ssaluta, ma poca qualità.]
CALLEJON[Peppe ‘a ‘nguenta] 6.5 Cu Ounas(se) ammaccato Sarri nun ne putette fà a mmeno e pPeppe ‘a ‘nguenta cu ‘e tagli suoje mettette paura a ll’avverzarie soprattutto durante ô primmo ajone (tempo); peccato ca ‘nnante ô purtiere cchiú ‘e ‘na vota  mancaje ‘e vuduja (lucidità)!
[Dô 61’ ALLAN[‘O ngrifato] 6 Pe cchella mez’ora ca jucaje ce mettette corza, cegna (grinta) e cqualità!]
MERTENS [Ciruzzo] 6  Se dette da fà, ma nun le riuscette ‘e truvà ‘a porta pure si custringette ‘a trasera (difesa) avverzaria a ffà ‘e straurdinarie. Peccato.
.
[Dô 78’ PAVOLETTI s.v.Ll’icchese dinto a ll’affabbeto]
INSIGNE[Lorenzigno] 6.5 Facette ‘o ssuojo zumpanno sempe ‘o primm’ommo, cercanno ‘o lanzo p’’o cumpagno ‘e ll’auta curzia o cupulianno (dialogando) cu ‘o socio d’armidanno (centrocampo).
[Dô 45’ GIACCHERINI 6.5  Bbona atalossa (prova) d’’o guaglione ca s’abbusca miezu zifo (voto) ‘e cchiú pe ll’addaffa (rete) ca ô 55’ ce dette ‘o doje a zzero e nchiudette ‘a pratteca.]
SARRI 7 Lle se  po’ ssulo dicere bbravo  p’’a fatica fatta priparanno ‘e suoje ca lle stanno dànno quacche piccula suddisfazziona cumme ‘stu terzo scalino cunquistato ajere, ca si nun ce fosseno state ‘e chianchiere ‘e Simeone puteva essere pure cchiú aveto.
E ffermammoce cca. E mmo sí ca overamente ve pozzo dà, si dDi’ vo’ ll’ appuntamento a llunerí ca vene doppo ll’uadí (amichevole) ‘e dummeneca a ssera contro ll’A.F.C. Bournemouth   ‘na scuatra ‘ngrese ca, ve cunfesso e ccunfermo nun saccio chi è e dde  che ppanne veste. Staveti bbe’! R.Bracale Brak
.

Nessun commento: