NAPOLI- LIVERPOOL ( ciampionsa 03.10.18) 1 A 0 ‘A VEDETTE ACCUSSÍ

NAPOLI- LIVERPOOL ( ciampionsa 03.10.18) 1 A 0

‘A VEDETTE ACCUSSÍ

 Guagliú alleluja! E cchi s’’o ccrereva!Allimmeno ‘ntribbuna divano se diceva ca ‘o Liverpool(lo) fósse troppo tuosto pe nnuje, forze arricurdannose d’’a scutuliata fremma pigliata a austo ‘ncasa lloro cu ‘a primma ammestosa (amichevole) d’’a tempurata (stagione)..., ma - cumme sapite – ‘e mise nun so’ ssempe ‘e trentuno e nn’avettemo cumferma ajere quanno ‘o Ciuccio facette arrecrià ‘e muidde (tifosi) suoje vattenne ‘a scuatra rossa ‘e chillu tamarrone ‘e Klopp(e).e pure si sulo p’uno a zzero i ô 90’, ma se vedette súbbeto ca ‘o Jancone   i ‘e guagliune suoje doppo d’’a scunfitta a tTurino  cu ‘a vecchia zoccola ‘ncampiunato, vulevano subbbeto turnà a vvencere... e ccumminfatte  succedette ajeressera pigliannoce ‘o primmo posto ‘int’a ll’javallo (girone) nuosto cosa ca ce adducette pure ll’amaro russimmo (pareggio) d’’a primma jurnata ‘e Ciampionsa  ‘ncasa d’ ‘a Stella Rossa,addó nun èrêmo state crestiane ‘e vencere. Ajere ce riuscettemo i ô mammone (spauracchio) d’’o Liverpool(lo) ce facettemo ‘nu pernacchio  ! Passammo ê ppaggelle:

OSPINA[Pastacrisciuta] 6,5: ‘E russe ‘e Klopp(e) se vedetteno poco dê pparte soje, ma chelli ppochi vvote ca fove ‘o caso Pastacrisciuta se dimustraje attiento e ccapace soprattutto quann’ascette fora muntaca (area di rigore) a sbruglià ‘e pere ‘na situazziona periculosa.

MAKSIMOVIC[‘O Paglione] 6,5: Miso a ssurpresa ô posto ‘e Meza Cucchiara, riuscette a bbluccà a mMane e pp’’o riesto sustentaje a dduvere  ê centrale.

ALBIOL[‘O Masto] 6,5: Priciso e ppuntale ‘int’ê cchiusure bbricaje (duellò) suprattutto cu fFirmino mettennole ‘a musarola e ssenza sfregazze(sbavature).

KOULIBALY[‘O Ggialante] 7,5: Uno d’’e meglie, se sceruppaje ‘nu cartellino jalizzo (giallo) ô bbedajo (principio), ma po sagliette ‘e tuono, se punette ‘ntusiello  e ccasSaje dô campo a sSalah ca maje nce dètte preoccupaziona.

MARIO RUI 6: Curette pe ttutta ‘a ferza ‘e mancina cu quacche sfregazzo (sbavatura) supierchio, ma dànno bboni ppalle mo a ssant’Arcadio, mo a cCiruzzo.

CALLEJON[Peppe ‘a ‘nguenta] 6,5: Se magnaje n’addaffa (rete) e cce facette magnà ‘e mmane, ma po sturdette a r Robertson(no) scattanno ògne ttanto e soprattutto nun sbagliaje ô 90’ quanno quanno, ricevuta palla da Ciruzzo, ‘a mettette ‘mmiezo a cciammiello p’’o sciuliamazzo ‘e Lorenzigno.

ALLAN[‘O ‘Ncrifato] 7,5: Jucaje cu rraiva (furia), cegna (grinta) e azzaja (rabbia)ricuperanno ‘na cifra ‘e pallune, presente ‘ncopp’ a ttutto ‘o campo,pe tutt’’e nuvantatré mminute  nun lassanno ‘nu mellimetro a ll’avverzarie.

HAMSIK[Marekiaro] 6,5:  Tutto summato atalossa (prestazione) ‘e carattere d’’o capitano però arresecanno coccosa; dètte ‘na bbona mana â scuatra cu cchiú ‘e n’andivinata urtizzazzione (verticalizzazione) p’’e nassie (attaccante). Se ne scennette ô  nijaio (finale) quanno ‘o Jancone s’’o chiammaje ‘mpanca. [Da ll’81 ZIELINSKI 6: Pochi minute, ma nicessarie pe ddà forze fresche ô mumento curminante d’’o sibbacco (match).]

RUIZ[Anema longa] 6:  Chiammato a gghiucà a ‘nu pizzo sbagliato facette ‘o ssuĵo, ma tartagliaje ‘nu poco.

[Dô 68’ VERDI 6: Trasette sùbbeto dint’ô juoco cercanno ‘a porta da luntano, ma senza pricisione. Tutto summato però détte ‘na mana pur’isso!]

MILIK[sant’Arcadio] 6,5: Accumminciaje jucanno  spalle â porta pe mmantenere palla e ffà saglí ‘e suoje facenno a spurtellate cu ‘e chianchiere ‘e Klopp(e).. Ss’ êsse avuto farese nutà ‘e cchiú sotto porta, ma ô bbedajo (principio) fove isso a rubbuttà (impegnare) Alisson(ne) cchiú ‘e ‘na vota.[Dô 68' MERTENS 6.5: Trasuto bbuono ‘nsibbacco (nel match) se dette súbbeto da fà e  ffove overo sfurtunato quanno cugliette ll’afachía (traversa) cu ‘na palla ch’êss’avut’’a trasí! Peccato!].

 INSIGNE [Lorenzigno] 7,5: Se mmeretasse cchiú ppoco pecché ô bbedajo (principio) sbagliaje sotto porta e sse vedette poco, ma po migliuraje passanno ‘o tiempo e sse vedette a mmanuvrà p’’a trecquarte e soprattutto riuscette a llassà ‘o signo e a ddarece ‘a nichemata ô 90’ quanno trasette a sciuliamazzo ‘ncopp’a cchella granna palla misa ‘mmiezo da Peppe ‘a ‘nguenta, servuto da Ciruzzo.

All. ANCELOTTI [‘O Jancone]7 Ajeressera andivinaje quase tutto e avette chello ca vuleva: ‘na nichemata ‘mpurtante!

Arb. VIKTOR KASSAI 5 Nun s’era sbagliato ‘o Jancone! Arbitro scadente ca nun sapette chello ca faceva; pe ffurtuna grossi fetenzie nun ce ne facette, ma se tenette ‘int’â sacca ‘nu paro ‘e cartelline russe da cunzignà ê chianchiere ‘e Klopp(e).

E ffermammoce cca cuntente, ma no suddisfatto, pecché me fósse piaciuto ‘e vencere cchiú llargo,però nun fove accussí e ppaccienza.  Mo sperammo  ca  ‘o Napule ‘o ffà  allimmeno ‘ncampiunato,   accumincianno ggià  da dummeneca ca vène  quanno a ll’ora sconceca ‘e ll’apritivo ô san Paolo scenne ‘o Sassuolo, una d’’e scuatre assineje (satelliti) d’’a vecchia zoccola e lle facimmo capí ‘e che ppanne vestimmo, mannannole â casa soja ‘ntummato ‘e mazzate !  Accussí sperammo e ssi dDi’ vo’ ve ne parlo llunnerí ca vène.

Staveti bbe’. R.Bracale Brak