VERONA – NAPOLI (23.6.20) 0 A 2 ‘A VEDETTE ACCUSSÍ

VERONA – NAPOLI (23.6.20) 0 A 2

‘A VEDETTE ACCUSSÍ

Eccuce cca guagliú, tutto a pposto! Ajere mmerzo ê sette e mmeza doppo n’aramumarra (astinenza) ‘e quase quatto mise se turnaje a gghiucà p’’o campiunato i ‘o Ciuccio jette a Vverona contr’ê lucale e ccu ttutto ca scennette ‘ncampo cu ‘na fetenzia ‘e muntazzimma (divisa) culor fronne aulive turnajee a Nnapule cu ttre ppunte dint’â sacca dimustranno ca ‘a scuatra nosta nun s’era accuntentata d’’a cunquista d’’a coppa itaglia, ma era ‘ntenziunata ‘e farese valé pure ‘ncampiunato. I ‘o doje a zzero [ 38' cu Ssant’Arcadio e 90’ cu  Llozano]cunzignato ê pariente ‘e chella zoccola ‘e Giulietta ne fove ‘a dimustrazziona!   Passammo ê ppaggelle:

 OSPINA 7 ‘E ccuntaje e ccu cquatto tacculle (intervente) uno meglio ‘e ll’ate fove ‘na vera   sarracinesca e se purtaje â casa ‘a porta acrata (inviolata). Bravo!

 DI LORENZO 6  Spisso ‘o vedettemo dint’â mità ccampo avverzaria cuncedenno coccosa a ll’ epata difenziva (in fase difensiva

 MAKSIMOVIC [‘O Ntontero ] 6 Passanno ‘e minute criscette e sse facette apprezzà pure ajere cumme ‘nCoppa itaglia.

 KOULIBALY[‘O Ggialante] 6,5 Atalossa (prestazione) da zaimmo (leader) e nnun me so’ muzzecato ‘a lengua.V’’o pponno dicere Di Carmine e n’atu paro ‘e lloro ca tuzzajeno ‘nfacci’ô cummò cu ‘o specchio!

HYSAJ[Mezacucchiara] 5,5 Miezu zifo (voto) mancante pe bbia ca fove isso ll’aniello àpulo   (debole) d’’a catena difenziva e ffacette bbuono Gattuso a cchiammarselo ‘mpanca. [dô 67' GHOULAM 6,5 Me cummuvette a vvederelo ‘ncampo doppo otto mise abbunnante e mme lustraje ll’uocchie cu cchillu missiddo (assist) pe Llozano. Vivó! È  tturnato finalmente!]

 ZIELINSKI 7 Tutto summato fove isso ‘o cchiú mastato (ispirato)e ddette ê suoje  acciaccature (invenzioni) e ppenzate (soluzioni) mettenno ‘mpericulo ‘a trasera (difesa) d’’e lucale.

 DEMME 6,5  Se piazzaje ‘mmiez’ô campo facennose rispettà e ffaticanno ‘nquantità e cqualità dette ll’armizzanno (equilibrio) nicessario. Bravo. [dô 72' LOBOTKA 6  Facette ‘o ssuĵo ‘mmiez’ô campo ô niajo  (nel finale)].

ALLAN[‘O ‘Ncrifato] 5,5 L’attocca pure a isso miezu zifo (voto) mancante pecché si levammo n’accasiona sprecata a ll’arrancua (nella ripresa) nun se vedette ato e ‘ntribbuna divano nun piacette a nnisciuno! [dô 67' FABIAN RUIZ[Anemalonga ] 6  Nun facette cape d’angiulo, ma certamente fove cchiú zzeruso  (dinamico) e aiuejo (efficace) d’’o  cumpagno ‘e sezziona (reparto)].

 POLITANO 6,5  M’aspettavo coccosa ‘e cchiú, ma cuntentanmmoce d’’o missiddo (assist) d’’e tire ‘e squina (angoli) e dde chille da fora. Po’ mmigliurà. [da ll'84'  LOZANO 6,5 Trasette, signaje e ppo se ne magnaje n’ato. E nunn’è ppoco!]

 MILIK[Sant’Arcadio] 7 Fove isso ca ô 38’ cu ‘na granna cabbesera (colpo di testa) mannanno ‘o pallone ‘mporta mmerzo ô palo cchiú lluntano nce schianaje ‘a strata p’affuzzà (vincere). Nun se po’ ca sbattere ‘e mmane a ‘nu jucatore ca cumme a ssant’Arcadio te segna   47 addaffe (reti) dint’a ccientoeddurice  sibbacche (match), uno ògne 132 minute.Ave raggiona  Giuntoli a ddicere ca chi se ll’accatta à dda pavà assaje sorde. I’dico: Cercammo ‘e ce ‘o tené!  [dal 72'  MERTENS[Ciruzzo] 6  Se vedette poco, ma fove nicessario.]

INSIGNE 5,5 Me dispiace, ma ll’attocca pure a isso miezu zifo (voto) mancante pecché nun fove ‘nserata e sse scetaje sulo ô niajo (nel finale) cu ‘nu tiro a ggiro fora mesura e ‘nu missiddo (assist) nun sfruttato; troppo poco!

all.  GATTUSO 7  S’’o mmereta tutto pecché  nun se cuntentaje d’avé vattuto â vecchia zoccola ‘ncoppa itaglia cunquistanno ‘o trufeo, ma sapette taffezzà (mativare) ‘e jucature suoje e affuzzaje  (vinse) ancòra pure ‘ncopp’a ‘nu campo scamuso; ‘a scuatra oramaje è ttutta cu isso i ‘e frutte se vedono. ‘Ncarraje pure tutt’’e cagne. Cumprimente a Rringhio.

Arb. PASQUA 6 Tutto summato facette ‘o duvere suĵo.

E facimmo punto cca . Mo si ‘o Cielo ‘o vvo’ ce sentimmo llnnerí vintinove pe ccuntareve cumme è gghiuta ‘a mubbara (partita) casalinca contr’â cuatra ca scenne da Ferrara. Gattuso à miso ‘e mmano annante dicenno ca nunn’è ffacile, ma i’ ‘a veco ‘e n’ata manera. Vedimmo chi se sbaglia. Staveti bbe’.

R.Bracale Brak