mercoledì 16 luglio 2008

'O DIABBETE

’O Diabbète


Mettite ’a meglia! E che m’è capitato!…
’o zzúcchero ’int’ ô sango! E m’ è ssagliuto
accussí assaje, ca nun me ne so’… gghiuto
justo pecché ’a Madonna m’ à aiutato…

Po’, a bbocce ferme, me songo ’nfurmato:
Duttó… se pô sapé ’a d’o m’ è asciuto?…
Rafè – m’ à ditto – steva… annascunnuto,
ma ggià ’o ttenive ’ncuollo: ereditato!

Ereditato? E ’a chi?… Vuje che dicite?
A mme nisciuno m’ à… sedúnto ’a rota!…
Piénzece bbuono… Uno s’ è… divertito!

Che ssaccio mo… Quaccuno! E gira e vvota
âmmo appurato ca,… ’mmece d’ ’e prete,
chesto à lassato ’o nonno…: ’o diabbète!


12 dicembre 1997
Raffaele Bracale
(dal vol. 'E CCOSE D''O PPASSATO ed. Graus Napoli 2006)

Nessun commento: