FELIPPO E ‘O PANARO

FELIPPO E ‘O PANARO A bbocce fremme, doppo d’ ‘a fijura ‘e mmerda fatto dô Napule ggioverí a ssera a Eindhovèn(no) vulesse arricurdà a De Chiacchiaroniis, Mazzarri e Biguncino ca ‘a storia d’ ‘a prioritata (priorità) è ‘na puttanata ca nun fernesce maje. ‘O Napule a ‘stu mumente tène ‘nu nomme ‘nnAiropa e nun ll’à dda ‘nchiavecà accussí comme succedette ggioverí a ssera. De Chiacchiaroniis, Mazzarri e Biguncino ànno voglia d’arrampecarse ‘ncopp’ê specchie e d’ appennerse ê ffelinie; vonno o nun vonno ‘o Napule tène ‘nu cruso (prestigio) e ‘na faccia ‘a difennere e ttène ‘o priciso duvere ‘e annurà(onorare) comme meglio è pussibbile ‘na cumpetizziona ca – nun ce ‘o scurdammo! – è stata pure vinciuta ‘na vota...Stammo dinto a cchillo ca se chiamma ALBO D'ORO e cierti granni fijure ‘e mmerda prugrammate nun se ponno, nè s’ ànn’ ‘a fà pe nisciunu mutivo. Se decidesseno a pparlà chiaro e a ricunoscere ca ànno attrezzata ‘na scuatra ca nun po’ cumpetere ‘ncopp’ a ttre ffronte: campiunato, coppa Italia, E.L. Ce mettesseno ‘a faccia e ‘o ricunuscesseno ‘e avé sbagliato ‘a campagna d’accattà e vvennere; ricunuscesseno ‘e avé sbagliato a nun dà ‘mpriestito a Vargas(so) p’ ‘o fà jucà tutto ‘nu campiunato e farle fà ll’ossa; ricunuscesseno ‘e avé sbagliato a nnun piglià ‘nu centrocampista cu ‘e piede bbuone, ‘nu vero catàstato (sostituto) ‘e Campagnaro e soprattutto ‘e Cavani e chisto êsse pututo essere Gilardino ca pe ttre llire è ghiuto a Bologna! E ricunuscesseno po ‘e avé sbagliato a mullà a Gargano, ca nun po’ essere rempiazzato ‘a ‘nu muorte ‘e ll’incursione aerea comme a Donadel(lo)! Mo vanno smammanno ca nuje avimm’ ‘a luttà e stammo luttanno p’ ‘o scutetto... E chi ce crede? Si uno nun se mette ‘e mmane ‘mcopp’a ll’uocchie ‘o vvede chiaramente ca nun solo ‘a rubbentus(sa), ma pure Intèr(re) e Milàn(no) songo cchiú attrezzate e cchiú scafate ‘e nuje. Pirciò senza fà sbruffunaríe, ca nun stanno nè ‘ncielo e nè ‘nterra, i’ dicesse ‘e accuntentarce ‘e vencere n’ata vota ‘a Coppa Italia,d’arrivà siconne ‘ncampiunato e de nun farce jettà fora súbbeto da ll’E.L., visto ca cca a ccunte fatte stammo arresecanno ‘e perdere a fFelippo e ô panaro... E nun chiammateme jettatore! R.Bracale Brak