domenica 21 ottobre 2012

JUVENTUS – NAPOLI (20/10/12) 2 A 0LL’AGGIU VISTA ACCUSSÍ

JUVENTUS – NAPOLI (20/10/12) 2 A 0 LL’AGGIU VISTA ACCUSSÍ Guagliú tenco ‘o vveleno nfi’ a ‘mpont’ô musso! M’ero sunnato ‘o tramme elettrico e me penzavo ca doppo ca ‘o Napule aveva resistito pe uttanta minute fossemo turnate ‘a Turino cu allimmeno ‘nu punto. Ma, mannaggia chello ca nun se po’ ddicere..., nun fuje accussí e ‘a zoccola janca e nnera,ma ajere tutta nera..., a ll’urdemu quarto d’ora truvaje ‘nterra ddoje rredde e ce ne mannaje â casa cu ‘o stesso risultato ‘e Pichino e ‘sta vota nun m’ ‘a putette piglià manco cu ll’arbitro, ma sulo cu sciorta ‘ngrata ca ce perseguita e cu chillu ciuccio ‘e Mazzarri ca sbagliaje quanto cchiú puteva accumminciano dâ furmazziona, dâ mentalità sparagnina e da ll’anticaste (sostituzioni) sballate e telose (tardive)! Certo fósse stato overamente primmuruso (magnifico) nchiudere ‘a jurnata jenno a vvencere a Ttorino....dimustranno ca‘a zoccola janca e nnera nun è cchiú fforte d’ ‘o Napule. Ma ‘o Cielo e Mazzarri nun vuletteno e fujemo custrette a turnarcene cu dduje giundujotte ‘nfilate dint’ ê rrecchie e i’ me songo ‘ncazzato assaje pecché, pure si so’ ddoce, ‘e giandujotte dint’ê rrecchie fanno male e mmo pe c’ ‘e llevà âmm’ ‘a aspettà sulo ‘o ggirone ‘e ritorno! Passammo ê ppaggelle va’! DE SANCTIS 5 E sso’ stato largo ‘e maneca pecché Amleto[Jesco, nun ghiesco, chist’è ‘o bbusillo!...]tenette ‘ncopp’â cuscienza ‘a primma rredda (visto ca ‘na palla ca arriva dint’â cama piccerella à dda essere assulutamente d’ ‘o purtiere)e ppure, pe ‘na mmità, ‘a siconna (visto ca partette cu mez’ora ‘e ritardo ‘ncopp’ô tiro ‘e Pogbà). CAMPAGNARO 6+ Granna atalossa (prova) d’ ‘o Toro argentino ca cchiú ‘e ‘na vota sbrugliaje ‘a matassa cu paríbbase (interventi) dicisive. Accompagnaje spisso ll'azziona ma nun riuscette a ffà ‘a diafòrasa (differenza),pure pe bbia d’ ‘a scadente atalossa ‘e Maggio ca nun ll’ajutaje. Peccato pe chella respinta troppo corta ca cunzignaje (nun vulenno) ‘a palla a Pogbà ca pe parta soja nun fuje stuppato nè ‘a Cannavaro, nè ‘a quacche ato! E ppeccato soprattutto p’ ‘o cartellino jalizzo ca s’abbuscaje pe bbia ca jette a ttirà ‘o pallone ‘a mano a cchillu scurnacchiato ‘e Chiellini ca nun ‘o vuleva mullà pure si attuccava ô Napule! CANNAVARO 5,5 È overo ca cuncedette poco o niente a cQuagliarella e ssulo quaccosa a gGiovinco, ma ‘ncopp’ê tire ‘e squina ‘nu centrale ca se rispetta nun po’ permettere ô primma ca passa ‘e cogliere ‘e capa ‘o pallone a ccentro d’ ‘a cama piccerella; à dda appurrittà (respingere) ‘e capa, specie quanno ‘o purtiere, cumpagno suĵo, tène ‘a guallera e nun ghiesce dê pale! Comme pure ‘nu centrale ca se rispetta quanno n’atu cumpagno appurritta (respinge) curto, à dda ascí a stuppà ‘o mediano avverzario! Purtroppo ‘o capitano d’ ‘o Napule è scadente e se sape! GAMBERINI 6,5 Atalossa diaprésa (sontuosa) ‘e ll'ecchese viola. Sbrugliaje tanti situazzione periculose e nun concedette niente a gGiovinco. (da ll’85° INSIGNE sv - Quacche bbona jucata ‘ncopp’â mancina, ma trasette troppo,troppo tarde quann’ ‘a frettata era fatta...) MAGGIO 3 Trasette cu ‘a capa ancòra dint’â sala parto e sufferette trummeramente (tremendamente) ‘a bima (il passo) d’ ‘o mammone Asamoah ca arrivaje comme e quanno vulette ‘ncopp’â linia ‘e funno. Chella grama vota ca pruvaje a attaccà sbagliaje mumento e llusa (soluzione) jenno a sbattere ‘nfacci’ô muro juventino...Doppo vinte minute Mazzarri ggià ll’êsse avut’ ‘a cagnò cu mMesto, tanto cchiú nnera d’ ‘a mezanotta nun puteva vení. HAMSIK 5 Maje ‘mpartita, nun ghiucaje manco chilli diece minute solite nun riuscenno a ttruvà ‘na jucata ca risulvesse ‘a rencontra,nè riuscenno a ‘ncarrà n’urdemu passaggio. Sprecato a ffà ‘o mediano ‘ncuollo a pPirlo, se vedette assaje poco. INLER 6,5 Facette ‘na granna atalossa riuscenno a essere pulitelico (prezioso) ‘nnante â difesa a ffà muro, e aspierto (svelto) ‘nfase ‘e ‘mpustazione. E sinamparco (comunque) fuje ll'urdemo a mmullà. BEHRAMI 6 Se facette ‘o mazzo tanto luttanno ‘ncopp’ a ògne pallone e vincenno spisso ‘a sfita cu Vidal(lo),po stracquo perdette quacche pallone e Mazzarri ll’êsse avut’ ‘a sustituí sott’â mmità ‘e ll’arranqua ‘mmece aspettaje a ffarlo e quanno ‘o facette fuje troppo tarde! (da ll’87° DZEMAILI sv) ZUNIGA 6 Miezu voto ‘e cchiú p’esserse sparagnato ‘e solite inutile garabbate(ghirigori) Riuscette a cuntènere n’accunto disculo (difficile) comme a Lichtsteiner e se prupunette spisso pure si senza teléseme (risultati)’mpurtante. PANDEV 5 M’aspettavo ‘e cchiú. Pruvaje quacche vvota a mannà dinto ê cumpagne ma nun fuje priciso.Ô finale sciupaje, sbaglianno ‘o passaggio, ‘nu contropiete duuje contro a uno, ch’êsse pututo permettere a Insigne ‘e signà ‘a rredda d’ ‘a bbannera! CAVANI 6 P’ ‘o Pintauro cuano nun fuje ‘úcolo (facile) truvà spazzio dint’â difesa juventina e isso allora ce pruvaje ‘a fora: cu ‘nu granne tiro ‘e punizzione centraje ‘o diàbaso (l’incrocio) d’ ‘e pale, mentre n’ata spettaculare superasma (cunclusione) fernette fora. Tanta corza, ma senza zuco. Peccato! E ppeccato p’ ‘o cartellino jalizzo ca s’abbuscaje. MAZZARRI 4,5 ‘E rrencontre se jocano pe vencerle no pe pariggiarle, mmece isso jette a Turino p’ ‘o quarto ‘e bullito d’ ‘o zzero a zzero e nfi’ a ll’uttantesimo lle riuscette; po dinto a dduje minute perdettemo a fFelippo e ô panaro. Nun liggette bbuono ‘a rencontra e sbagliaje a nun cagnà a mMaggio e a pPandev, comme sbagliaje ‘o mumento d’ati anticataste (sostituzioni) da farese assaje primma. Dich’ i’ ma comme se fa a nun addunarse ca Maggio nun ce ‘a fà a luttà cu chillu mammone d’ Asamoah e s’à dda sustituí, comme se fa a nun addunarse ca è ‘na strunzata aspettà d’arrivà a cientovinte siconne dâ fine pe fà trasí a Dzemaili ô posto ‘e Behrami stracquo muorto p’avé secutato a chiunque pe tutt’ ‘o campo? Comme se fa a nun renderse conto ca ô posto ‘e Pandev(vo) era nicessario mettere ‘a frischezza ‘e Insigne pe pognere ‘nvelocità? Ma chillo Erode Mazzarri era juto a tTurino p’ ‘o zzero a zzero e nno ppe vvencere! E se sape ca, comme dicette, a llengua ttaliana, ‘a bonanema ‘e Carosio, difienne difienne... ‘a rredda ce scappa e pierde ‘a rencontra! Accussí succedette a nnuje. Pe ffurtuna pare ca â fine ‘e tempurata Mazzarri leva mano e ce leva ‘o scòmmeto. Fósse ‘a Maronna! arbitro DAMATO 5 Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà fastidio ê cuane mettennose pe ‘mmiez’ê piere d’ ‘e napulitane custrette a scartà primma a isso e ppo ê jucature d’ ‘o parrucchino e nun vedenno ‘o juoco viulento e pruvucatorio d’ ‘e delinquente cu ‘a maglia nera; ausaje dduje pise e ddoje mesure; largo ‘e maneca cu ‘e delinquente juventine: ‘mprimmese cu Chiellini, cu Lichtsteiner, cu Giovinco, cu Vidal(lo) etc. e stritto ‘e pietto cu ‘e napulitaneCampagnaro e Cavani ca â primma accasione s’abbuscajeno ‘o cartellino jalizzo. M’aspettavo però ‘e peggio ‘a ‘stu barlettano, ca ripeto – comme a ttutte ‘e puglise – quase certamente è tifoso juventino...,ma nun fuje nicessario ca isso ce mettesse ‘o carico; avastaje Mazzarri pe farce perdere ‘a rencontra! Cunchiudenno che putimmo dicere? Ca p’ ‘o Napule ‘o campiunato fernette ajere? Gnernò: ‘o campiunato è ancòra luongo e, si Mazzarri cagna mentalità, quaccosa ‘e bbuono ‘o putimmo ancòra fà... pure si i’ nce spero poco (sapenno ‘o tipo) e m’accuntentasse ‘e riuscí a difennere ‘o siconno posto; p’’o vencerlo ‘o scutetto aspettammo ‘e cagnà allenatore e ddirettore generale e aspettammo ca De Chiacchiaroniis addeventa quaccuno dint’ ô Palazzo. Ca si no levàmmoce ‘stu penziero ‘a capa e nun ce facimmo zimàire (illusioni) inutile! Staveti bbe’ e si dDi’ vo’ ce sentimmo viernarí ca vene! R.Bracale Brak

Nessun commento: