FAVEZE PEZZELLE

FAVEZE PEZZELLE

trasetura sfezziosa pe quatto perzone

chello ca ce vo’

12 fellocce ‘e pane casareccio aute miezu centimetro,

400 gramme ‘e fiorelatte d’ Agerola a ffelle aute ‘nu centimetro,

24 sulumiglie d’alicesalate sott’uoglio,

250 gramme ‘e passata ‘e pummarola,

‘nu spiculo d’aglio ammunnato e ntretato finu fino,

‘nu bicchiere e mmiezo d’uoglio auliva dunciglio,

dduje cucchiare d’arecheta,

sale fino e ppepe niro mmacenato a ffrisco.

comme se fa

Dinto a ‘na tianella ricà ‘nu bicchiere d’uoglio e a ffuoco allero fà suassà ll’aglio ntretato, agnadí ‘a passata ‘e pummarole, ‘nu pizzeco d’arecheta, accumcià ‘e sale  e ppepe e lassà cocere ‘sta sarzulella pe ‘nu quarto d’ora.

Sistimà una vicina a ll’ata ‘ncopp’ a n’asciuarro ‘e fellocce ‘e pane; verniciarle cu ‘nu cucchiaro ‘e sarza peduna e mettere ‘ncopp’ a ogne fella ‘na fella ‘e fiorelatte e dduje sulumiglie d’alicesalate, macchià cu tutta ll’ata sarza e sistimà dinto a ‘na cummedità p’ ‘o tiesto verniciata d’uoglio tutt’ ‘e fellocce ‘e pane guarnite, spruzzarle cu ll’arecheta e ll’uoglio  rummase, cu sale e ppepe e passà dint’ ô tiesto caudo a 180° e tenerle nfi’ a quanno ‘o fiorelatte nun s’è accumpliato.

Serví caudo ‘e tiesto.

Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà.

Mangia Napoli, bbona salute! Scialàteve e cunzulàteve ‘o vernecale!

Raffaele Bracale