MUZZARELLA ‘NCARROZZA

MUZZARELLA ‘NCARROZZA

Chello ca serve pe seje  perzone

Seiciento gramme ‘e muzzarella ‘e vufara tenuta dint’â jacciaja pe dudice ore e ppo  tagliata a ffelle doppie ‘nu centimetro e mmiezo;

6 ova fresche ‘e jurnata;

12 felle ‘e pane casareccio senza scorza doppie ‘nu centimetro e tagliate a cuatrato ‘e otto centimetre ‘e lato;

1 cucchiaro ‘e pecurino rattato fino;

miezu  litro ‘e  latte retunno ( intero) friddo

quacche  cucchiaro  ‘e farina

abbunnante uoglio pe frijere

‘Nu túppeto ‘e vasinicola  (si piace)

sale fino  e ppepe janco macenato a ffrisco   q.n. s.

Comme se fa

‘Mprimmese s’arapono ll’ove  dinto a ‘na ciotola agnadenno  dduje  pizzeche ‘e sale  e ppepe janco macenato a ffrisco , e ‘nu cucchiaro ‘e pecurino rattato fino; se sbattono ll’ova senza farle crescere e se tenono a pparte; se mettono seje felle ‘e pane ‘ncoppa a n’asciuarro (tagliere) e ve  s’appojano ‘ncopp’ a ògni ffella ‘na fella ‘e  muzzarella doppia ‘nu centimetro e mmiezo, ‘na fronna ‘e vasenicola e s’attappa tutto  cu n’ata fella ‘e pane e ppo  se  taglia ‘ndiacunale ‘stu ‘mparetato  (tramezzino), uttenenno  dduje trianguline ‘e pane ‘mbuttunato; ora mo ‘sti  tringuline vanno   ‘nfuse dint’ô  llatte, po’ passate ‘int’â farina e ppo a uno â vota ‘sti trianguline vanno ‘nfuse dint’ a ll’ove sbattute, sgrunnate e pluncate (immersi) p’ ‘e ffrjere dint’  abbunnante uoglio ggià  caudo, e se lassano frijere ‘nfi’ a cche nun so’ addevennate  ndurate,allora se pigliano cu ‘na ‘spumàdera, e se mettono ‘ncopp’ a ‘na carta asciugante p’ ‘a  cucina p’asciuttarle ‘e ll’uoglio supierchio  e se magnano caude caude  quanno ‘a muzzarella sìè sciugliuta ‘nu poco e accumencia a ffilà.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja.

Magna Napule,  bbona salute! Scialàteve e aggarbbatéve ‘o vernecale!!

Raffaele Bracale