CANNARUNCIELLE SAFRUNATE

CANNARUNCIELLE SAFRUNATE

 

Chello ca serve pe cquatto perzone

400 gramme ‘e cannaruncielle,

‘nu bicchiere d’uoglio ‘auliva dunciglio,

150 gramme ‘e lardiciello a vvarriglie ‘e cm. 5 pe 2 pe 1,

‘na cepolla ndurata ‘e Muntoro ammunnata e ntretata,

200 gramme ‘e ricotta ‘e pecura dellajata cu miezu bicchiere ‘e  latte retunno caudo,

2 bustine ‘e safrone,

100 gramme ‘e caso pecurino rattato finu fino,

sale duppio ‘na vrancata.

‘nu tuppeto ‘e prutusino lavato, asciuttato e ntretato finu fino,

 sale fino e ppepe niro mmacenato a ffrisco q.n.p.

 comme se fa

 

Ricà ll’uoglio dinto a ‘na prupurziunata tiella e a ffuco allero fà piglià culore ô ttrigliato ‘e cepolla; a ‘stu punto agnadí ‘e vvarriglie ‘e lardiciello e ssempe  a ffuoco allero farle  accumplià pe cinche minute e accuncià ‘e sale e ppepe; fraditanto arvere teniente teniente ‘e cannaruncielle dinto a ‘na caurara cu otto litre d’acqua vullente salata (vrancata ‘e sale duppio). Scularle e revacarle dint’ â tiella agnadenno apprimma  ‘a ricotta dellajata cu ‘o llatte retunno caudo,  e ppo ‘e ddoje bbustine ‘e safrone accumpliate cu ‘nu poco d’acqua ‘e cuttura d’ ‘a pasta, e tenercele pe quatto mminute sempe a  ffuoco allero, ammiscanno e  derrammanno cu ‘o ccaso pecurino,e cu  ‘o ppepe niro macenato a ffrisco; fora d’ ‘o ffuoco derrammà   cu ‘o tuppeto ‘e prutusino lavato, asciuttato e ntretato finu fino;  ammiscà ancòra e ‘mpiattà.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

Raffaele Bracale